କେସିଙ୍ଗା,୬।୯(ତୁମେଶ୍ବର ସାହୁ): କଳାହାଣ୍ଡି ରେଳଯାତ୍ରୀ ସଂଘର ମୁଖ୍ୟ ପରାମର୍ଶ ଦାତା ତଥା କେସିଙ୍ଗା ସିଟିଜନ ଫୋରମ ସଭାପତି ଡାକ୍ଟର ହେମସାଗର ସାହା ଭୁବନେଶ୍ବରରେ ଅନୁଷ୍ଠିତ ଜେଡ.ଆର୍.ୟୁ.ସି.ସି ବୈଠକରେ ଯୋଗ ଦେଇଥିଲେ। ଅଞ୍ଚଳର ବିଭିନ୍ନ ସମସ୍ୟାକୁ ନେଇ ୧୩ ଦଫାଦାବି ପତ୍ର ରେଳ ବିଭାଗର ଉଚ୍ଚତମ ଅଧିକାରୀମାନଙ୍କ ପାଖରେ ଦୃଷ୍ଟି ଆକର୍ଷଣ କରିଥିଲେ। ଏଥିରେରେ ମୁଖ୍ୟତଃ କେସିଙ୍ଗା ରେଳ ଷ୍ଟେଶନ ଓ ଆଖପାଖ ରେଳ ଷ୍ଟେଶନର ବିଭିନ୍ନ ସମସ୍ୟା ସମ୍ପର୍କରେ ଡାକ୍ତର ସାହା ନିଜ ଦାବିପତ୍ର ଉପସ୍ଥାପନ କରିଥିଲେ। କେସିଙ୍ଗାରୁ ରାଜଧାନୀ ପାଇଁ ସିଧାସଳଖ ଟ୍ରେନ, କୋରାପୁଟ ରାୟଗଡା ଭାୟା ଟିଟଲାଗଡ ଦେଇ ଭୁବନେଶ୍ବରକୁ ଟ୍ରେନ, ସପ୍ତାହକୁ ତିନି ଦିନ ହାୱଡା ଇସ୍ପାତ ଏକ୍ସପ୍ରେସକୁ ଟିଟଲାଗଡ ପରିବର୍ତ୍ତେ କେସିଙ୍ଗା ଯାଏ ସମ୍ପ୍ରସାରଣ କରିବା ସହ , କେସିଙ୍ଗାରୁ ଜୁନାଗଡ଼ ଭଦ୍ରାଚଲମ ରେଳ କରିଡ଼ରର ଶୀଘ୍ର କାମ ଆରମ୍ଭ କରିବା ପାଇଁ ଦାବି କରାଯାଇଛି। କେସିଙ୍ଗା ରେଳ ଷ୍ଟେଶନରେ ପାର୍କିଙ୍ଗର ସୁବ୍ୟବସ୍ଥା ସାଙ୍ଗକୁ ପାର୍କି ଫି ଦର କମାଇବା, କେସିଙ୍ଗା ଷ୍ଟେଶନରେ ପ୍ଲାଟ ଫର୍ମ ନଂ ୧ ରେ ଟିକେଟ ବୁକିଂ କାଉଣ୍ଟର ବ୍ୟବସ୍ଥା, ପ୍ଲାଟ ଫାର୍ମ ନଂ ୨,୩ ଓ ୪ ରେ ଟି ଷ୍ଟଲର ବ୍ୟବସ୍ଥା, ରେଳ ଷ୍ଟେଶନରେ ରହୁଥିବା ସମସ୍ତ ଗାଡ଼ି ୨ ମିନିଟ ପରିବର୍ତ୍ତେ ୫ ମିନିଟ ରହିବାର ପାଇଁ ଦାବି ଜଣାଇଥିଲେ। ଉକ୍ତ ଷ୍ଟେଶନରେ ମାଲ ପରିବହନର ସୁଦୃଢ ବ୍ୟବସ୍ଥା କରିବା, ରେଳ ଷ୍ଟେଶନରେ ଥିବା ଶୌଚାଳୟର ନବୀକରଣ, ସମ୍ବଲପୁର ରାୟଗଡ଼ା ତପଶ୍ବିନୀ ଏକ୍ସପ୍ରେସ ଦୁଇ ମିନିଟ ପାଇଁ କାଣ୍ଡେଲ ରୋଡରେ ରହଣି ପାଇଁ ଉକ୍ତ ଦାବି ପତ୍ରରେ ଉଲ୍ଲେଖ କରାଯାଇଛି। ଷ୍ଟେଶନରେ ସୁଦୃଢ ଆଲୋକିକରଣ ଓ ପାନୀୟ ଜଳର ବ୍ୟବସ୍ଥା ଓ ଯାତ୍ରୀ ମାନଙ୍କ ସୁବିଧା ପାଇଁ ସମ୍ବଲପୁର ପର୍ଯ୍ୟନ୍ତ ଆସୁଥିବା ମୟୂରାକ୍ଷି ଏକ୍ସପ୍ରେସକୁ ଟିଟିଲାଗଡ ଷ୍ଟେଶନ ପର୍ଯ୍ୟନ୍ତ ଏକ୍ସଟେନସନ କରିବା ପାଇଁ ସିଟିଜନ ଫୋରମ ସଭାପତି ୧୩ ଦଫାଦାବି ପତ୍ର ଉପସ୍ଥାପନ କରିଥିବାର ପ୍ରକାଶ କରିଛନ୍ତି।
