ଦାରିଙ୍ଗବାଡି,୧୧।୬(ଅରୁଣ ସାହୁ): ନିଜ ବଂଶଧର ଲୋକଙ୍କ ସହ ଯୋଡି ହେବା ସେମାନଙ୍କୁ ଚିହ୍ନିବା ଓ ଜାଣିବା ପାଇଁ ଏକ ପ୍ରୟାସ କରୁଛି କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ଅଞ୍ଚଳରେ ବସବାସ କରୁଥିବା ଗେଦେ ବଂଶ । ଏଥିପାଇଁ ଚଳିତ ବର୍ଷ ତୃତୀୟତମ ସମ୍ମିଳନୀ ବୁଧବାର ଉକ୍ତ ବ୍ଲକ ପେନାପୁସୀ ଗ୍ରାମରେ ଅନୁଷ୍ଠିତ ହୋଇଯାଇଛି । ଗେଦେ ବଂଶର ସଭାପତି ନକୁଳ ପ୍ରଧାନଙ୍କ ଅଧ୍ୟକ୍ଷତାରେ ଏହି ସମ୍ମିଳନୀ ଅନୁଷ୍ଠିତ ହୋଇଥିବା ବେଳେ ଏହାର ମୂଳ ଲକ୍ଷ ଅନୁସୂଚିତ ଜନଜାତି ଅଧ୍ୟୁଷିତ କନ୍ଧମାଳ ଜିଲାରେ କେଉଁ ସବୁ ଅଞ୍ଚଳରେ ଗେଦେ ବଂଶଧାରୀ ଲୋକମାନେ ବସବାସ କରୁଛନ୍ତି ସମସ୍ତଙ୍କ ରକ୍ତ ସମ୍ପର୍କରେ କିଏ କାହାକୁ କ’ଣ ସମ୍ବୋଧିତ କରିବେ ସେନେଇ ଆଲୋଚନା ହୋଇଥିଲା । ସେହିପରି ଅନେକ ଯୁବତୀଯୁବକ ଦାଦନ ଖଟିବାକୁ ଯାଇ ପ୍ରେମ ବିବାହ କରୁଛନ୍ତି ତେବେ ଗୋଟିଏ ବଂଶ ବା ରକ୍ତ ସମ୍ପର୍କରେ ଯେଉଁଭଳି ବିବାହ ରୋକାଯାଇପାରିବ ସେନେଇ ଏହି ସସମ୍ମିଳନୀ ର ମୂଳଲକ୍ଷ୍ୟ ବୋଲି କୁହାଯାଇଛି ।
ସେହିପରି ଗତ ୩ ବର୍ଷ ଧରି ଏହି ସମ୍ମିଳନୀରେ ଗେଦେ ବଂଶ ନାମରେ ୨୫ଟି ବୃକ୍ଷ ରୋପଣ ସହ ଅସହାୟ ବୃଦ୍ଧା, ବୃଦ୍ଧ, ବିଧବା, ଦିବ୍ୟାଙ୍ଗ, ଅନାଥଙ୍କୁ ପୋଷାକ, ଶୀତ ବସ୍ତ୍ର ପ୍ରଦାନ କରାଯାଉଛି । ସେହିପରି ଜୈବିକ ଚାଷ, ଜୈବିକ ଖତ ବ୍ୟବହାରକୁ ଗୁରୁତ୍ୱ ଦିଆଯିବା ସହ କୁଇ ସଂସ୍କୃତି ପରମ୍ପରାକୁ ସୁଦୃଢ଼ କରିବା ଓ ତାକୁ ମାନି ଚଳିବାକୁ ପରାମର୍ଶ ଦିଆଯାଇଛି । ସେହିପରି ଏହି ବଂଶର ସମସ୍ତ ପରିବାର ଏକତା ଓ ପ୍ରେମରେ ଓ ପରସ୍ପର ମଧ୍ୟରେ ବିଶ୍ୱାସ ଓ ଭାଇଚାରା, ଶାନ୍ତି ସଦଭାବନାରେ ଚଳିବାକୁ ପରାମର୍ଶ ଦିଆଯାଇଥିଲା । ଏହି ସମ୍ମିଳନୀରେ ଉକ୍ତ ବଂଶର ପ୍ରାୟ ୫ ଶହରୁ ଉର୍ଦ୍ଧ୍ବ ଲୋକ ଉପସ୍ଥିତ ରହିଥିଲେ । ଅନ୍ୟମାନଙ୍କ ମଧ୍ୟରେ ସମ୍ପାଦକ ତ୍ରିଲୋଚନ ପ୍ରଧାନ, ପରାମର୍ଶଦାତା ଗଙ୍ଗାଧର ପ୍ରଧାନ, ହେରଦ ପ୍ରଧାନ, ମନୋଜ ପ୍ରଧାନ ପ୍ରମୁଖ କାର୍ଯ୍ୟକ୍ରମକୁ ପରିଚାଳନା କରିଥିଲେ ।
