ନୂଆପଡ଼ା ଅଫିସ, ୪।୬: ନୂଆପଡା ସଦର ବ୍ଲକ ଧରବନ୍ଧା ଥାନା ଆମାନାରା ଗାଁରେ ମାଓବାଦୀ ପରିଚୟ ଦେଇ ଡକାୟତି କରୁଥିବା ଅଭିଯୋଗରେ ୬ ଆନ୍ତଃ ରାଜ୍ୟ ଡକାୟତଙ୍କୁ ନୂଆପଡା ପୋଲିସ ଗିରଫ କରି କୋର୍ଟ ଚାଲାଣ କରିଛି। ସେମାନେ ହେଲେ ଖରିଆର ରୋଡ ବଜାରପଡା ସୁନୀଲ ଚନ୍ଦ୍ରକାର (୩୨), ରାୟପୁରର ଦୀପକ ରାୟ (୨୬), ଖଲାରୀ ଗାଁର ମୁକେଶ ୟାଦବ (୩୦), ଖଲାରୀର ମହାବୀର ୟାଦବ (୨୨), ଭୀମଖୋଜର ଓମ ପ୍ରକାଶ ବରିହା (୨୩) ଓ ଖମତରାଇର ବଜରଙ୍ଗୀ ଔରଫ ଅବିନାଶ ସିଂ (୨୪)। ସେମାନଙ୍କଠାରୁ ସିଜି୦୬ଜିଟି ୪୯୪୩ ଏକ ବାଇକ୍, ଗୋଟେ କିପେଡ ମୋବାଇଲ ଫୋନ, ୨ଟି ଖଣ୍ଡା, ଗୋଟେ ଛୁରୀ, ଗୋଟେ ଭଙ୍ଗା ତାଲା, ଗୋଟେ ଆରି ପତି ଜବତ କରାଯାଇଛି ବୋଲି ଶନିବାର ସଦର ଥାନା ପରିସରରେ ଅନୁଷ୍ଠିତ ଖବରଦାତା ସମ୍ମିଳନୀରେ ନୂଆପଡା ଆରକ୍ଷୀ ଅଧୀକ୍ଷକ ଗୁନ୍ଦାଳା ରେଡ୍ଡୀ ରାଘବେନ୍ଦ୍ର ସୂଚନା ଦେଇଛନ୍ତି।
ଗତ ୩୦ରେ ଆମାନାରା ଗାଁର ମୋତିନବାଇ ସାହୁଙ୍କ ଦୋକାନ ଘର ଗ୍ରୀଲ ତାଲା କାଟି ଘରେ ପଶି ମାରଣା ଅସ୍ତ୍ର ଦେଖାଇ ଲାଲ ସାଲମ କହି ଏହି ଡକାୟତମାନେ ଭୟଭିତ କରି ଡକାୟତ ଉଦ୍ୟମ କରିଥିଲେ। ପରିବାର ଲୋକେ ଘେରି ଯିବାରୁ ସାଙ୍ଗରେ ଆଣିଥିବା ମାରଣା ଅସ୍ତ୍ର ସହ ଗାଡି, ମୋବାଇଲ ଛାଡି ଫେରାର ହୋଇଯାଇଥିଲେ। ଏ ନେଇ ଧରମବନ୍ଧା ଥାନାରେ ମୋତିନ ବାଇ ସାହୁ, ସ୍ବାମୀ ପିଲାରାମ ସାହୁ ଅଭିଯୋଗ କରିଥିଲେ। ଉପଖଣ୍ଡ ପୋଲିସ ଅଧିକାରୀ ପ୍ରଶାନ୍ତ କୁମାର ପଟ୍ଟନାୟକଙ୍କ ନେତୃତ୍ୱରେ ଏକ ସ୍ବତନ୍ତ୍ର ଟିମ ଗଠନ କରି ତଦନ୍ତ ଜାରି ରଖିଥିଲା। ଏହି ଡକାୟତି ଦଳ ଖରିଆର ରୋଡ ସମେତ ଛତିଗଡ ରାୟପୁର ଓ ମହାସମୁଦ ଜିଲାର ଅଛନ୍ତି ବୋଲି ପୋଲିସ ବିଶ୍ୱସ୍ତ ସୂତ୍ରରୁ ଖବର ପାଇଁ ଥିଲା। ଡକାୟତି ଦଳର ମାଷ୍ଟର ମାଇଣ୍ଡ ଖରିଆର ରୋଡ ବଜାର ପଡାର ସୁନୀଲ ଚନ୍ଦ୍ରକାରଙ୍କ ଘରେ ସବୁ ଯୋଜନା କରି ଓଡିଶା ସମେତ ଛତିଶଗଡରେ ଅନେକ ଘଟଣା ଘଟାଇ ଚାଲିଥିଲେ। ଏମାନଙ୍କ ନାମରେ ଛତିଶଗଡ ସମେତ ଖରିଆର ରୋଡ, ନୂଆପଡା, କୋମନା ଥାନାରେ ଅନେକ ମାମଲା ରହିଛି ବୋଲି ଏସ୍ପି ରାଘବେନ୍ଦ୍ର କହିଛନ୍ତି। ମାଷ୍ଟର ମାଇଣ୍ଡ ସୁନୀଲଙ୍କୁ କାବୁ କରିବା ପରେ ସମସ୍ତ ଡକାୟତଙ୍କୁ ଧରିବାରେ ପୋଲିସ ସଫଳ ହୋଇଛିି। ଏ ନେଇ ଧରବନ୍ଧା ଥାନାରେ ଅଣ୍ଡରସେକସନ ୪୫୭/୩୯୨/୩୪ରେ ଏକ ମାମଲା (ନଂ.୩୫/୨୩) ରୁଜୁ କରି ଅଧିକ ତଦନ୍ତ ଚାଲିଛି।
