ହିନ୍ଦୁ ଧର୍ମରେ ବିବାହକୁ ପବିତ୍ର ଓ ସାତ ଜନ୍ମର ସମ୍ପର୍କ ଭାବେ ବିବେଚନା କରାଯାଏ। ଏଠାରେ ବିବାହର ଅନେକ ପ୍ରକାର ନୀତି ନିୟମ ଦେଖିବାକୁ ମିଳିଥାଏ। କିଛି ବିବାହର ପ୍ରଥା ତ ବହୁତ ଅଜବ ହୋଇଥାଏ, ଯାହା କି ବହୁ ବର୍ଷ ଧରି ଚାଲି ଆସିଥାଏ। ସେମିତି ଏକ ଅଜବ ବିବାହ ପ୍ରଥା ମଧ୍ୟପ୍ରଦେଶ, ହରଦା ଜିଲାର ଆଦିବାସୀ ସମ୍ପ୍ରଦାୟରେ ଦେଖିବାକୁ ମିଳେ। ମଧ୍ୟପ୍ରଦେଶର ଆଦିବାସୀ ଅଧ୍ୟୁଷିତ ଗ୍ରାମ ମୋରଗଢିରେ ପ୍ରତିବର୍ଷ ଦୀପାବଳିର ଏକ ସପ୍ତାହ ପରେ ଏକ ମେଳାର ଆୟୋଜନ କରାଯାଏ। ଏଥିରେ ବହୁ ସଂଖ୍ୟାରେ ଯୁବତୀ ଯୁବକ ସାମିଲ ହୁଅନ୍ତି। ଏହି ମେଳାରେ ଆଦିବାସୀ ଯୁବତୀ ଯୁବକ ପରସ୍ପରକୁ ପାନ ଖୁଆଇ ଜୀବନସାଥୀ ବାଛନ୍ତି। ଏହି ପରମ୍ପରା ବହୁ ପୁରୁଣା। ମେଳା ଦିନ ଯୁବତୀ ଯୁବକ ଦିନ ସାରା ସାଙ୍ଗ ହୋଇ ବୁଲନ୍ତି, ଆଉ ସନ୍ଧ୍ୟାରେ ପରସ୍ପରକୁ ପାନ ଖୁଆଇ ଜୀବନସାଥୀ ଭାବେ ବାଛି ନିଅନ୍ତି। ଆଉ ବିବାହ ପାଇଁ ଘୋଷଣା କରନ୍ତି। ପରେ ଦୁହେଁ ନିଜ ନିଜ ଘରକୁ ଚାଲି ଯାଆନ୍ତି। ବିବାହର ଖବର ଝିଅ ଘରକୁ ପଠାଇ ଦିଆଯାଏ। ଏହାପରେ ଝିଅ ଯଦି ଘରକୁ ନ ଫେରେ, ତଥାପି ଝିଅ ଘର ଝିଅକୁ ଖୋଜନ୍ତି ନାହିଁ।
