ନୂଆଦିଲ୍ଲୀ,୧୦।୩: ଅଧିକାଂଶ ଲୋକ ଶେୟାର ବଜାରରେ ଟଙ୍କା ନିବେଶ କରି ବହୁ ପରିମାଣରେ ଟଙ୍କା କମାଉଥିବା ବିଷୟରେ ଆପଣ ନିଶ୍ଚେ ଶୁଣିଥିବେ। ଏହି କିଛିମାସ ମଧ୍ୟ ଶେୟାର ବଜାରରରେ ନିବେଶକଙ୍କ ସଂଖ୍ୟା ଢେର ବଢିଛି। ତେବେ କେତେକ କ୍ଷେତ୍ରରେ ବଜାରର ଗତିବିଧିକୁ ନ ଜାଣି ପାରିବାରୁ ଷ୍ଟକ ମାର୍କେଟରେ ଅନେକଙ୍କୁ କ୍ଷତି ସହିବାକୁ ପଡିଥାଏ। କିନ୍ତୁ ଆଜି ଆମେ ଏମିତି କିଛି ନିବେଶକଙ୍କ ବିଷୟରେ କହିବାକୁ ଯାଉଛି ଯେଉଁମାନେ ଷ୍ଟକ ମାର୍କେରେ ଟଙ୍କା ଲଗାଇ ମାଲାମାଲ ହୋଇଛନ୍ତି। ଏବେ ସେମାନଙ୍କୁ ଷ୍ଟକ ମାର୍କେଟର ଧନ କୁବେର କୁହାଯିବା ସହ ଦେଶର ବଡ ବଡ ଧନୀ ତାଲିକାରେ ମଧ୍ୟ ଅଛନ୍ତି।
ସାଧାରଣ ଲୋକରୁ ଷ୍ଟକ୍ ମାର୍କେଟରେ ଟଙ୍କା ନିବେଶ କରି ମାଲାମାଲା ହୋଇଛନ୍ତି ରାକେଶ ଝୁନଝୁନଓ୍ବାଲା। ତାଙ୍କର ଶେୟାର ବଜାରରେ ୪୦ବର୍ଷରୁ ଉର୍ଦ୍ଧର ଅନୁଭବ ରହିଛି। କୁହାଯାଏ କି, ସେ ଯେଉଁ ଶେୟାରରେ ହାତ ଦିଅନ୍ତି ସେଥିରେ ସଫଳତା ପାଆନ୍ତି। ମାତ୍ର ୧୮ବର୍ଷ ବୟସରେ ସେ ଶେୟାର ବଜାରରେ ପାଦ ଥାପିଥିଲେ। ଯେଉଁଥିରେ ସେ ତାଙ୍କର ଏତେ ବଡ ସାମ୍ରାଜ୍ୟ ଗଢି ପାରିଥିଲେ। ଝୁନଝୁନଓ୍ବାଲାଙ୍କୁ ଭାରତୀୟ ଶେୟାର ବଜାରର ‘ଓ୍ବାରେନ ବଫେଟ’ କୁହାଯାଏ।
ଝୁନଝୁନଓ୍ବାଲା ତାଙ୍କ କ୍ୟାରିୟରର ଆରମ୍ଭ ୫ହଜାର ଟଙ୍କାରୁ କରିଥିଲେ। ଏହି ଦିଗ୍ଗଜ ନିବେଶକ ଜଣକ ଦଲାଲ ଷ୍ଟ୍ରିଟରୁ ନିଜ ଯାତ୍ରା ଆରମ୍ଭ କରିଥିଲେ। ସେତେବେଳେ BSE ସେନସେକ୍ସ ୧୫୦ ଅଙ୍କର ଥିଲା। ଝୁନଝୁନଓ୍ବାଲାଙ୍କ ଅନୁସାରେ ୧୯୮୮ରେ ତାଙ୍କର ନିଟ୍ ଓ୍ବର୍ଥ ଏକ କୋଟି ଟଙ୍କା ଥିଲା, କିନ୍ତୁ ୧୯୯୩ରେ ୨୦୦ କୋଟିରେ ପହଞ୍ଚିଥିଲା। ଫୋର୍ବସ ମୁତାବକ, Rakesh Jhunjhunwala ଙ୍କ ପାଖରେ ଏବେ ୩୬ ହଜାର କୋଟିରୁ ଅଧିକ ଟଙ୍କାର ସମ୍ପତ୍ତି ରହିଛି।
ଝୁନଝୁନଓ୍ବାଲାଙ୍କ ପରେ ଦ୍ୱିତୀୟ ଷ୍ଟକ ମାର୍କେଟର ଧନୀ ହେଲେ Radhakishan Damani। ସେ ସବୁବେଳେ ଲାଇମଲାଇଟ୍ରୁ ଦୂରେଇ ରହିଥା’ନ୍ତି। ସେ ଜଣେ ସଫଳ ନିବେଶକ ସହ ଜଣେ ବଡ଼ ବିଜନେସ ମ୍ୟାନ ମଧ୍ୟ ଅଟନ୍ତି। ଡି-ମାର୍ଟ ନାମକୁ ଏକ ରିଟେଲ ଚେନର ମାଲିକ ରାଧାକିଷନ ଅଟନ୍ତି। ଭାରତର ରିଟେଲ କିଙ୍ଗ କୁହାଯାଉଥିବା ରାଧାକିଷନ ଦିଗଗ୍ଜ ନିବେଶକ ଝୁନଝୁନଓ୍ବାଲାଙ୍କର ଗୁରୁ ଅଟନ୍ତି। ଶେୟାର ବଜାରରେ ତାଙ୍କର ଟିପ୍ସକୁ ସମସ୍ତେ ଫଲୋ କରନ୍ତି। ରାଧାକିଷନ ଦେଶର ଟପ୍ ୧୦ ଧନୀ ତାଲିକାରେ ସାମିଲ୍ ଅଛନ୍ତି। ନିକଟରେ ସେ ଦକ୍ଷିଣ ମୁମ୍ବାଇର ମଲାବର ହିଲ୍ସ ଇଲାକାରେ ୧୦୦୧ କୋଟି ଟଙ୍କାର ଘର କିଣିଛନ୍ତି। ରାଧାକିଷନ, ୫ ହଜାର ଟଙ୍କାରୁ ନିବେଶ ଆରମ୍ଭ କରିଥିଲେ। ବ୍ଲୁମବର୍ଗ ବିଲେୟାନୟାର ଇଣ୍ଡେକ୍ସ ମୁତାବକ, ତାଙ୍କ ପାଖରେ ୧.୪୨ ଲକ୍ଷ କୋଟି ଟଙ୍କାର ସମ୍ପତ୍ତି ରହିଛି। ସମ୍ପତ୍ତି ହିସାବରେ ରାଧାକିଷନ ଦୁନିଆର ଧନୀ ତାଲିକାରେ ୯୭ତମ ସ୍ଥାନରେ ଅଛନ୍ତି। ସେ ଇଣ୍ଡିଆ ସିମେଣ୍ଟ, ବ୍ଲୁ ଡାର୍ଟ, ସିନେପ୍ଲୋକସ କମ୍ପାନୀ ଓ ଅନ୍ୟ କିଛି ତମ୍ବାକୁ କମ୍ପାନୀରେ ନିବେଶ କରିଛନ୍ତି।
କେବଳ ପୁରୁଷ ନୁହନ୍ତି ଜଣେ ମହିଳା ମଧ୍ୟ ଅଛନ୍ତି ଯିଏ ଶେୟାର ମାର୍କେଟରୁ କୋଟିପତି ହୋଇଛନ୍ତି। ଚେନ୍ନାଇର ଦିଗଗ୍ଜ ନିବେଶକ Dolly Khanna, ଷ୍ଟକ ମାର୍କେଟରୁ ମୋଟା ଅଙ୍କର ଟଙ୍କା କମାଉଛନ୍ତି। ସେ ବହୁ ବଡ଼ ବଡ଼ କମ୍ପାନୀର ଅଂଶୀଦାର ଅଛନ୍ତି। ତାଙ୍କର ନିଟଓ୍ବର୍ଥ ୩୫୭.୪ କୋଟି ଟଙ୍କା।
