ଏମାନେ ସଚିନ ତେନ୍ଦୁଲକରଙ୍କୁ ମଧ୍ୟ ବିଦା କରିଦେଇଥାନ୍ତେ: ବଡ଼ ପ୍ରଶ୍ନ ଉଠାଇଲେ ପୂର୍ବତନ କ୍ରିକେଟର୍‌

ୱେଲିଂଟନ,୨୦।୧୧:ନ୍ୟୁଜିଲାଣ୍ଡ ବିପକ୍ଷ ୱେଲିଂଟନ ଟେଷ୍ଟରେ ମହମ୍ମଦ ସିରାଜଙ୍କୁ ପ୍ଲେଇଂ-୧୧ ସ୍ଥାନ ନ ମିଳିବାକୁ ନେଇ ଟିମ ମ୍ୟାନେଜମେଣ୍ଟକୁ ସମାଲୋଚନା କରିଛନ୍ତି ପୂର୍ବତନ କ୍ରିକେଟର୍‌ ମହମ୍ମଦ କୈଫ। ଗୋଟିଏ ଖରାପ ସିରିଜ ଆଧାରରେ ଜଣେ ଅଭିଜ୍ଞ ଖେଳାଳିଙ୍କୁ ବାଦ ଦେବା ଅନ୍ୟାୟ ବୋଲି ସେ କହିଛନ୍ତି।

କୈଫ କହିଛନ୍ତି, ଇଂଲଣ୍ଡ ବିପକ୍ଷ ପାଞ୍ଚ ଟେଷ୍ଟରେ ସିରାଜ ୨୩ଟି ଉଇକେଟ ନେଇ ଭାରତର ସଫଳତମ ବୋଲର୍‌ ଥିଲେ। ଓଭାଲ ଟେଷ୍ଟରେ ମଧ୍ୟ ସେ ୯ଟି ଉଇକେଟ ନେଇ ଭାରତକୁ ୬ ରନ୍ରେ ବିଜୟୀ କରାଇବାରେ ବଡ଼ ଭୂମିକା ନେଇଥିଲେ। ଶ୍ରୀଲଙ୍କା ଭଳି ସ୍ପିନ ସହାୟକ ପିଚ୍‌ରେ ଉଇକେଟ ନମିଳିବାର ଅର୍ଥ ସିରାଜ ଖରାପ ବୋଲର୍‌ ନୁହନ୍ତି ବୋଲି କୈଫ ଯୁକ୍ତି ବାଢ଼ିଛନ୍ତି। ଗୋଟିଏ ଖରାପ ସିରିଜ ପାଇଁ ଖେଳାଳିଙ୍କ ପୂର୍ବ ସଫଳତାକୁ ଭୁଲିଯିବା ଉଚିତ୍‌ ନୁହେଁ ବୋଲି ସେ କହିଛନ୍ତି।

କୈଫ ରବୀନ୍ଦ୍ର ଜାଡେଜାଙ୍କୁ ଦଳରୁ ବାଦ ଦେବା ନିଷ୍ପତ୍ତି ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି। ଇଂଲଣ୍ଡ ସିରିଜ୍ରେ ଜାଡେଜା ୫୧୬ ରନ କରିଥିଲେ। ଏଭଳି ଅଭିଜ୍ଞ ଅଲରାଉଣ୍ଡରଙ୍କୁ ବାହାରେ ବସାଇ ୱାଶିଂଟନ ସୁନ୍ଦରଙ୍କୁ ସୁଯୋଗ ଦେବା ଠିକ ନୁହେଁ ବୋଲି ସେ କହିଛନ୍ତି।
ସଚିନ ତେନ୍ଦୁଲକରଙ୍କ ଉଦାହରଣ ଦେଇ କୈଫ କହିଛନ୍ତି, ଏଭଳି ଚୟନ ନୀତି ଜାରି ରହିଲେ ଦୁଇ-ତିନିଟି ଖରାପ ମ୍ୟାଚ ପରେ ସଚିନଙ୍କୁ ମଧ୍ୟ ଦଳରୁ ବାଦ ଦିଆଯାଇପାରେ।

ଅନ୍ୟପଟେ, ସୁନୀଲ ଗାଭାସ୍କର ଓ ରବି ଶାସ୍ତ୍ରୀଙ୍କ ଭଳି ପୂର୍ବତନ କ୍ରିକେଟରମାନେ ମଧ୍ୟ ଦଳ ଚୟନକୁ ନେଇ ଆଶ୍ଚର୍ଯ୍ୟ ପ୍ରକାଶ କରିଥିବା ରିପୋର୍ଟରେ କୁହାଯାଇଛି। ତେବେ ବ୍ୟାଟିଂ କୋଚ ସୀତାଂଶୁ କୋଟକଙ୍କ କହିବା ଅନୁଯାୟୀ, ମ୍ୟାନେଜମେଣ୍ଟ ସର୍ବଶ୍ରେଷ୍ଠ ଏକାଦଶ ଚୟନ କରିଛି।

 

Dharitri – Odisha’s No.1 Odia Daily

 

Share