ନୂଆଦିଲ୍ଲୀ, ୧୩।୯ : ଅତ୍ୟାବଶ୍ୟକ ଔଷଧ ଦେଶରେ ଏବେ ଶସ୍ତା ହେବାକୁ ଯାଉଛି। ଆଇଭର୍ମେକ୍ଟିନ, ମୁପିରୋସିନ, ନିକୋଟିନ ରିପ୍ଲେସମେଣ୍ଟ ଥେରାପି ଭଳି କେତେକ ଆଣ୍ଟି-ଇନଫେକ୍ସନ ଔଷଧ ମଧ୍ୟ ନ୍ୟାଶନାଲ ଲିଷ୍ଟ ଅଫ ଏସେନସିଆଲ ମେଡିସିନରେ ଯୋଗ କରାଯାଇଛି। ବର୍ତ୍ତମାନ ଏହି ତାଲିକାରେ ୩୮୪ ଔଷଧ ଅନ୍ତର୍ଭୁକ୍ତ କରାଯାଇଛି। ଏଥି ସହିତ, ରାନିଟିଡାଇନ, ସୁକ୍ରାଲଫେଟ, ହ୍ବାଇଟ ପେଟ୍ରୋଲାଟମ, ଆଟେନୋଲଲ ଏବଂ ମିଥାଇଲୋଡୋପା ସମେତ ୨୬ ଟି ଔଷଧ ଏହି ଜାତୀୟ ତାଲିକାରୁ ହଟାଯାଇଛି।
ଅତ୍ୟାବଶ୍ୟକ ଔଷଧ ତାଲିକାରେ ଯୋଡିବା ଦ୍ୱାରା ଅନେକ ଆଣ୍ଟିବାୟୋଟିକ, ଟିକା ଏବଂ କର୍କଟ ଔଷଧ ଶସ୍ତା ହେବ । କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡବ୍ୟ ମଙ୍ଗଳବାର ଏହି ନୂଆ ଔଷଧ ତାଲିକା ପ୍ରକାଶ କରିଛନ୍ତି।
ମାଣ୍ଡବ୍ୟ ଟୁଇଟ କରି କହିଛନ୍ତି, ଜାତୀୟ ତାଲିକାର ଅତ୍ୟାବଶ୍ୟକ ଔଷଧ-୨୦୨୨ ପ୍ରକାଶ ପାଇଛି। ଏଥିରେ ୨୭ଟି ବର୍ଗରେ ୩୮୪ ଔଷଧ ଅନ୍ତର୍ଭୁକ୍ତ। ଅନେକ ଆଣ୍ଟିବାୟୋଟିକ, ଟିକା, କର୍କଟ ଔଷଧ ଏବଂ ଅନ୍ୟାନ୍ୟ ଅତ୍ୟାବଶ୍ୟକ ଔଷଧ ସୁଲଭ ହେବ ଏବଂ ରୋଗୀଙ୍କ ଖର୍ଚ୍ଚ ହ୍ରାସ ପାଇବ ।
ଏହି ତାଲିକାରେ ଏଣ୍ଡୋକ୍ରାଇନ ଏବଂ ଗର୍ଭନିରୋଧକ ଔଷଧ ଯେପରିକି ଫ୍ଲୁଡ୍ରୋକର୍ଟିସୋନ, ଅର୍ମେଲୋକ୍ସିଫେନ, ଇନସୁଲିନ ଗ୍ଲାର୍ଜିନ ଏବଂ ଟେନେଲାଇଟିସ ମଧ୍ୟ ଯୋଗ କରାଯାଇଛି। ଏହା ବ୍ୟତୀତ ମୋଣ୍ଟେଲୁକାଷ୍ଟ (ଶ୍ୱାସକ୍ରିୟା ଔଷଧ) ଏବଂ ଲାଟାନୋପ୍ରୋଷ୍ଟ (ଚକ୍ଷୁ ଚିକିତ୍ସା) ର ନାମ ମଧ୍ୟ ଏହି ତାଲିକାରେ ଅନ୍ତର୍ଭୁକ୍ତ ହୋଇଛି। ଏହା ବ୍ୟତୀତ ହୃଦରୋଗ, ଡାବିଗାଟ୍ରାନ ଏବଂ ଟେନେଟେପ୍ଲେଜ ମଧ୍ୟ ଏହି ତାଲିକାରେ ସ୍ଥାନ ପାଇଛି।
ମେଡିସିନ ଉପରେ ଷ୍ଟାଣ୍ଡିଂ ନ୍ୟାଶନାଲ କମିଟି ଉପାଧ୍ୟକ୍ଷ ଡାକ୍ତର ଓ୍ବାଇ.କେ. ଗୁପ୍ତା କହିଛନ୍ତି ଯେ ଆଇଭର୍ମେକ୍ଟାଇନ, ମେରୋପେନେମ, ସେଫୁରୋକ୍ସାଇମ, ଆମିକାସିନ, ବେଡାକୁଇଲିନ, ଡେଲାମାନିଡ, ଇଟ୍ରାକୋନାଜୋଲ ଆବ ଡୋଲୁଟେଗ୍ରାଭିର ଭଳି ଡ୍ରଗ୍ସ ଏନଏଲଏମ ତାଲିକାରେ ଯୋଗ କରାଯାଇଛି। ଡକ୍ଟର ଗୁପ୍ତା କହିଛନ୍ତି ଯେ ନ୍ୟାଶନାଲ ଲିଷ୍ଟ ଅଫ ମେଡିସିନରେ ଥିବା ଔଷଧଗୁଡିକ ନିର୍ଦ୍ଧାରିତ ବର୍ଗରେ ଅନ୍ତର୍ଭୂକ୍ତ କରାଯାଇଛି ଏବଂ ଏହାର ମୂଲ୍ୟ ଜାତୀୟ ଫାର୍ମାସ୍ୟୁଟିକାଲ ପ୍ରାଇସିଂ ଅଥରିଟି ଦ୍ୱାରା ନିୟନ୍ତ୍ରିତ ହୋଇଛି।
ଗତ ବର୍ଷ ଇଣ୍ଡିଆନ କାଉନସିଲ ଅଫ ମେଡିକାଲ ରିସର୍ଚ୍ଚ (ଆଇସିଏମଆର) ଅଧୀନରେ ଥିବା ଏକ ବିଶେଷଜ୍ଞ କମିଟି ୩୯୯ ଔଷଧର ସଂଶୋଧିତ ତାଲିକା ଦାଖଲ କରିଥିଲେ। ବ୍ୟାପକ ବିଶ୍ଳେଷଣ ପରେ, ମାଣ୍ଡବ୍ୟଙ୍କ ଦ୍ୱାରା ଅଧିକ ପରିବର୍ତ୍ତନ ଦାବି କରାଯାଇଥିଲା।