ନୂଆଦିଲ୍ଲୀ,୧୦।୫: ଆଇପିଏଲ ୨୦୨୪ର ୫୮ତମ ମ୍ୟାଚରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ପଞ୍ଜାବ କିଙ୍ଗସକୁ ୬୦ ରନରେ ପରାସ୍ତ କରିଛି। ଏହି ପରାଜୟ ସହିତ ପଞ୍ଜାବ ଦଳ ଆଇପିଏଲ ୨୦୨୪ରୁ ବିଦା ହୋଇଛି। ୧୨ଟି ମ୍ୟାଚ ପରେ ସେମାନଙ୍କର ଆଠ ପଏଣ୍ଟ ଅଛି ଏବଂ ଦଳ ସର୍ବାଧିକ ୧୨ ପଏଣ୍ଟରେ ପହଞ୍ଚିପାରିବ, ଯାହା ପ୍ଲେ ଅଫରେ ପହଞ୍ଚିବା ପାଇଁ ଯଥେଷ୍ଟ ହେବ ନାହିଁ।ପ୍ଲେ ଅଫ ରେସ୍ରୁ ବାଦ୍ ପଡିବାରେ ମୁମ୍ବାଇ ପରେ ପଞ୍ଜାବ ହେଉଛି ଦ୍ୱିତୀୟ ଦଳ। ଏଥି ସହିତ ଆରସିବି ବିଜୟ ସହିତ ପ୍ଲେ ଅଫ ଆଶାକୁ ଜୀବନ୍ତ ରଖିଛି । ୧୨ଟି ମ୍ୟାଚ ପରେ ତାଙ୍କର ୧୦ ପଏଣ୍ଟ ରହିଛି । ଦଳ ସର୍ବାଧିକ ୧୪ ପଏଣ୍ଟରେ ପହଞ୍ଚିପାରିବ। ତଥାପି ସେମାନଙ୍କୁ ଅନ୍ୟ ଦଳର ଫଳାଫଳ ଉପରେ ନିର୍ଭର କରିବାକୁ ପଡିବ। ବେଙ୍ଗାଲୁରୁର ପରବର୍ତ୍ତୀ ଉଭୟ ମ୍ୟାଚ ଚିନ୍ନାସ୍ବାମୀ ଷ୍ଟାଡିୟମରେ ଅଛି। ମେ ୧୨ରେ ଦଳ ଦିଲ୍ଲୀ କ୍ୟାପିଟାଲ୍ସ ଏବଂ ମେ ୧୮ରେ ଚେନ୍ନାଇ ସୁପର କିଙ୍ଗ୍ସ ସହ ଖେଳିବ।
