ନୂଆଦିଲ୍ଲୀ,୪।୨(ପି.ଟି.): ଆବଶ୍ୟକ ପଡିଲେ ୨୦୨୧-୨୨ ବର୍ଷ ପାଇଁ କ୍ରୀଡ଼ା କ୍ଷେତ୍ରରେ ମିଳିବାକୁ ଥିବା ବଜେଟ୍ ଆବଣ୍ଟନରେ ସଂଶୋଧନ କରାଯାଇ ପାରିବ ବୋଲି କେନ୍ଦ୍ର କ୍ରୀଡ଼ାମନ୍ତ୍ରୀ କିରେନ ରିଜିଜୁ କହିଛନ୍ତି। ଖେଳାଳିଙ୍କ ପାଇଁ ଅର୍ଥର ଅଭାବ ରହିବ ନାହିଁ ଓ ଟୋକିଓ ଅଲିମ୍ପିକ୍ସରେ ଅଂଶଗ୍ରହଣ କରିବାକୁ ଥିବା ସବୁ ଖେଳାଳିଙ୍କର ଆବଶ୍ୟକତା ପୂରଣ କରାଯିବ ବୋଲି ସେ ସ୍ପଷ୍ଟ କରିଛନ୍ତି।
ସୋମବାର କେନ୍ଦ୍ର ସରକାର ବଜେଟରେ କ୍ରୀଡ଼ା ପାଇଁ ୨୫୯୬.୧୪ କୋଟି ଟଙ୍କା ଆବଣ୍ଟନ କରିଛନ୍ତି। ଗତବର୍ଷ ତୁଳନାରେ ଏହା ୨୩୦.୭୮ କୋଟି ଟଙ୍କା କମ୍ ରହିଛି। କୋଭିଡ୍-୧୯ ପାଇଁ ସାରା ବିଶ୍ୱରେ କ୍ରୀଡ଼ା ସାଂଘାତିକ ଭାବେ କ୍ଷତିଗ୍ରସ୍ତ ହୋଇଥିବାରୁ ସରକାର ଏପରି ନିଷ୍ପତ୍ତି ନେଇଛନ୍ତି।
ଯଦି ଆବଶ୍ୟକ ହୁଏ କ୍ରୀଡ଼ା ପାଇଁ ଅଧିକ ଅର୍ଥ ଆବଣ୍ଟନ କରାଯିବ ବୋଲି ରିଜିଜୁ ସ୍ଥାନୀୟ ଜବାହରଲାଲ ନେହେରୁ ଷ୍ଟାଡିୟମସ୍ଥିତ ଫିଟ୍ ଇଣ୍ଡିଆ ଅଫିସ୍ରେ କହିଛନ୍ତି। ଗତ ଆର୍ଥିକ ବର୍ଷରେ ସରକାର କ୍ରୀଡ଼ା ପାଇଁ ୨୮୨୬.୯୨ କୋଟି ଟଙ୍କା ଆବଣ୍ଟନ କରିଥିଲେ। ତେବେ ମହାମାରୀ ପାଇଁ ଏଥିରେ ସଂଶୋଧନ ଅଣାଯାଇଥିଲା ଓ ଏହି ପରିମାଣକୁ ୧୮୦୦.୧୫ କୋଟି ଟଙ୍କା ରଖାଯାଇଥିଲା। ଏଥର କିନ୍ତୁ ଏହି ସଂଶୋଧିତ ବଜେଟଠାରୁ ଆହୁରି ୭୯୫.୯୯ କୋଟି ଟଙ୍କା ଅଧିକ ପ୍ରଦାନ କରାଯାଇଛି। କ୍ରୀଡ଼ା ମନ୍ତ୍ରଣାୟ କ୍ରୀଡ଼ାବିତ ଓ ନ୍ୟାଶନାଲ ସ୍ପୋଟର୍ସ ଫେଡେରେଶନ (ଏନ୍ଏସ୍ଏଫ୍)ଗୁଡିକର ଯତ୍ନ ନେବ। ତେଣୁ ଆଥଲେଟ୍ ଓ ଏନ୍ଏସ୍ଏଫ୍ଗୁଡିକର ଦାବି ପୂରଣ କରିବାକୁ ଆମେ ରହିଛୁ। ବିଦେଶରେ ଆଥ୍ଲେଟମାନଙ୍କ ଟ୍ରେନିଂ ଓ ବିଦେଶୀ କୋଚ୍ ନିଯୁକ୍ତି ନେଇ କୌଣସି ବୁଝାମଣା କରାଯିବ ନାହିଁ ବୋଲି ରିଜିଜୁ କହିଛନ୍ତି।
କ୍ରୀଡ଼ା ସଚିବ ରବି ମିତ୍ତଲ ମଧ୍ୟ ସମାନ କଥା କହିଛନ୍ତି। ୨୦୨୦-୨୧ର ପ୍ରାରମ୍ଭିକ ବଜେଟକୁ ଆମେ ବିଚାର କରୁନାହୁଁ। କାରଣ ଏହା କୋଭିଡ୍-୧୯ ଦ୍ୱାରା ପ୍ରଭାବିତ ହୋଇଥିଲା। ୨୦୨୧-୨୨ ଓ ୨୦୧୯-୨୦୨୦ ବଜେଟକୁ ତୁଳନା କଲେ ଏଥର ୧୯.୧୩ ପ୍ରତିଶତ ବୃଦ୍ଧି ହୋଇଛି ବୋଲି ସେ କହିଛନ୍ତି।
