ଭୁବନେଶ୍ୱର,୫।୧୦(ବ୍ୟୁରୋ): ଶିଳ୍ପର ବିକାଶ ପାଇଁ ରାଜ୍ୟ ସରକାର ଏବେସୁଦ୍ଧା ୯ଟି ସ୍ବତନ୍ତ୍ର ନୀତି ଆଣିଛନ୍ତି। ଏହାମଧ୍ୟରେ ଆପାରେଲ ପଲିସି, ବାୟୋଟେକ୍ନୋଲୋଜି ପଲିସି, ଓଡ଼ିଶା ଫୁଡ୍ ପ୍ରୋସେସିଂ ପଲିସି, ଓଡ଼ିଶା ଏମ୍ଏସ୍ଏମ୍ଇ ଡେଭଲପ୍ମେଣ୍ଟ ପଲିସି, ହେଲ୍ଥକେୟାର ଇନ୍ଭେଷ୍ଟମେଣ୍ଟ ପ୍ରମୋଶନ ପଲିସି, ଓଡ଼ିଶା ଷ୍ଟାର୍ଟଅପ୍ ପଲିସି, ଟୁରିଜମ୍ ପଲିସି, ଫାର୍ମାସ୍ୟୁଟିକାଲ ପଲିସି ଏବଂ ରିନ୍ୟୁଏବୁଲ୍ ଏନର୍ଜି ପଲିସି ରହିଛି। ଆଗାମୀଦିନରେ ‘ଓଡ଼ିଶା ଇଣ୍ଡଷ୍ଟ୍ରିଆଲ ପଲିସି’, ‘ବିପିଓ ପଲିସି ୨୦୨୦’, ‘ଓଡ଼ିଶା ଷ୍ଟେଟ୍ ଡାଟା ପଲିସି ୨୦୨୦’ ଏବଂ ‘ଆଇଟି ଆଣ୍ଡ୍ ଇଲେକ୍ଟ୍ରୋନିକ୍ସ ପଲିସି’ ଭଳି ୪ଟି ନୂଆ ପଲିସି ଆଣିବାକୁ ସରକାର ଯୋଜନା କରିଛନ୍ତି ବୋଲି ଏମ୍ଏସ୍ଏମ୍ଇ ଏବଂ ଶିଳ୍ପମନ୍ତ୍ରୀ ଦିବ୍ୟ ଶଙ୍କର ମିଶ୍ର ବିଧାନସଭାରେ ତଥ୍ୟ ଦେଇଛନ୍ତି। ରାଜ୍ୟରେ ଶିଳ୍ପାୟନକୁ ପ୍ରୋତ୍ସାହିତ କରିବା ପାଇଁ ଗତ ୫ବର୍ଷରେ ୭୯ ଶିଳ୍ପମେଳାରେ ଓଡ଼ିଶା ଅଂଶଗ୍ରହଣ କରିବା ସହ ଆୟୋଜନ କରିଛି। ଏହାମଧ୍ୟରୁ ଓଡ଼ିଶା ଭିତରେ ୨୪ଟି ଏବଂ ଓଡ଼ିଶା ବାହାରେ ୫୫ଟି ଶିଳ୍ପମେଳା କରାଯାଇଛି। କରୋନା ମହାମାରୀ ଯୋଗୁ ୨୦୨୦-୨୧ ବର୍ଷରେ ୨ଟି ଶିଳ୍ପମେଳା ଭର୍ଚୁଆଲ ପ୍ଲାଟ୍ଫର୍ମରେ କରାଯାଇଛି। ଏହି ଶିଳ୍ପମେଳା ଦ୍ୱାରା ରାଜ୍ୟ ସରକାର ବିପୁଳ ପରିମାଣର ପୁଞ୍ଜିନିବେଶ ଆକୃଷ୍ଟ କରିପାରିଛନ୍ତି। ବିଭିନ୍ନ ସଂସ୍ଥା ଦ୍ୱାରା ମୋଟ ୬,୨୬,୩୫୯.୫୩ କୋଟି ଟଙ୍କାର ପୁଞ୍ଜିନିବେଶ ପାଇଁ ୨୮୬ଟି ପ୍ରସ୍ତାବ ଦାଖଲ ହୋଇଛି। ରାଜ୍ୟ ଏକକ ବାତାୟନ ପ୍ରଣାଳୀ ମାଧ୍ୟମରେ ଏହାମଧ୍ୟରୁ ୨୧୨ଟି ପ୍ରସ୍ତାବକୁ ଅନୁମୋଦନ ମିଳିଛି। ଫଳରେ ଓଡ଼ିଶାରେ ୫,୨୮,୬୦୯ କୋଟି ଟଙ୍କାର ପୁଞ୍ଜିନିବେଶ ସମ୍ଭବ ହୋଇଛି।
ମାଇକ୍ରୋ ଆଣ୍ଡ ସ୍ମଲ୍ ଏଣ୍ଟରପ୍ରାଇଜେସ୍ କ୍ଲଷ୍ଟର ଡେଭଲପ୍ମେଣ୍ଟ ପ୍ରୋଗ୍ରାମ୍ (ଏମ୍ଏସ୍ଇସିଡିପି) ଯୋଜନା ମାଧ୍ୟମରେ କଟକ ଜିଲାର ଇନ୍ଦ୍ରାଣୀପାଟଣାଠାରେ ଏକ ଇଞ୍ଜିନିୟରିଂ କ୍ଲଷ୍ଟର ପ୍ରତିଷ୍ଠା କରିବାକୁ ସରକାର ଯୋଜନା କରିଛନ୍ତି। କେନ୍ଦ୍ର ସରକାରଙ୍କ ଏମ୍ଏସ୍ଇସିଡିପି ନିୟମାବଳୀ ଅନୁଯାୟୀ ୨୫ଟି ସମାନ ବା ଆନୁଷଙ୍ଗିକ ଉତ୍ପାଦ ପ୍ରସ୍ତୁତ କରୁଥିବା ଏମ୍ଏସ୍ଏମ୍ଇକୁ କ୍ଳଷ୍ଟର ମାନ୍ୟତା ଦେବାର ନିୟମ ରହିଛି। ରାଜ୍ୟ ସରକାରଙ୍କ ଇନ୍ଭେଷ୍ଟମେଣ୍ଟ ଫ୍ରେଣ୍ଡଲି ମନୋଭାବ ରାଜ୍ୟର ବୃହତ୍, ମଧ୍ୟମ ଏବଂ କ୍ଷୁଦ୍ର ଶିଳ୍ପକୁ ଆଉପାଦେ ଆଗକୁ ନେବାରେ ପ୍ରମୁଖ ଭୂମିକା ଗ୍ରହଣ କରିଛି। ବିଶେଷକରି ଇଲେକ୍ଟ୍ରୋନିକ୍ସ, ଆଇଟି ଓ ଆଇଟି ସମ୍ପର୍କିତ ଷ୍ଟାର୍ଟଅପ୍ ପାଇଁ ଏବେ ଓଡ଼ିଶା ପ୍ରଥମ ପସନ୍ଦ ପାଲଟିଛି। ବେଙ୍ଗାଲୁରୁ, ଚେନ୍ନାଇ ଭଳି ସହର ତୁଳନାରେ କମ୍ ଟ୍ରାଫିକ୍, କମ୍ ପ୍ରଦୂଷଣ ଭୁବନେଶ୍ୱରକୁ ଏବେ ଆଇଟି କମ୍ପାନୀଗୁଡିକର ପ୍ରଥମ ପସନ୍ଦରେ ପରିଣତ କରିଛି। କେବଳ ଭୁବନେଶ୍ୱର ନୁହେଁ, ବ୍ରହ୍ମପୁର, ରାଉରକେଲା ଏବଂ ବାଲେଶ୍ୱରକୁ ମଧ୍ୟ ସମାନଭାବେ ପ୍ରାଥମିକତା ଦିଆଯାଉଛି। ଓଡ଼ିଶା ଷ୍ଟାର୍ଟଅପ୍ କାଉନ୍ସିଲ୍ ତଥ୍ୟ ଅନୁଯାୟୀ ୨୦୧୦ରୁ ୨୦୨୦ ମଧ୍ୟରେ ରାଜ୍ୟରେ ୨୦୯ଟି ଇଲେକ୍ଟ୍ରୋନିକ୍ସ, ଆଇଟି ଓ ଆଇଟି ସମ୍ପର୍କିତ ଷ୍ଟାର୍ଟଅପ୍ ଶିଳ୍ପ ପ୍ରତିଷ୍ଠା ହୋଇଛି। ଏହି ଷ୍ଟାର୍ଟଅପ୍ଗୁଡ଼ିକୁ ଇଡ୍କୋ ଏବଂ ଇପିକଲ୍ ମାଧ୍ୟମରେ ରାଜ୍ୟ ସରକାର ଜମି ଏବଂ ଅଫିସ ଗୃହ ଯୋଗାଇ ଦେଇଛନ୍ତି। ଭୁବନେଶ୍ୱରର ଓକାକ୍ ଟାଓ୍ବାରରେ ବର୍ତ୍ତମାନ ୧୬ଟି ଷ୍ଟାର୍ଟଅପ୍ ସଂସ୍ଥାକୁ ଇନ୍କ୍ୟୁବେଶନ ଏବଂ ୧୪ଟି ଆଇଟି କମ୍ପାନୀକୁ ସ୍ଥାନ ଯୋଗାଇ ଦିଆଯାଇଥିବାବେଳେ ଆଗାମୀଦିନରେ ଏଠାରେ ଆହୁରି ୨୦ଟି ଇନ୍କ୍ୟୁବେଶନ ଓ ୧୨,୯୯୪ ବର୍ଗଫୁଟ ଜାଗା ଷ୍ଟାର୍ଟଅପ୍ ଓ ଆଇଟି କମ୍ପାନୀକୁ ଦିଆଯିବ ବୋଲି ମନ୍ତ୍ରୀ ମିଶ୍ର ବିଧାନସଭାରେ ତଥ୍ୟ ଦେଇଛନ୍ତି।
