ପିପିଲି,୨୫।୭(ଡି.ଏନ୍.ଏ.): ରାଜ୍ୟ ସରକାର ଗ୍ରାମାଞ୍ଚଳରେ ରହୁଥିବା ଲୋକଙ୍କୁ ଉନ୍ନତମାନର ସେବା ଯୋଗାଇବା ପାଇଁ ବିଭିନ୍ନ ଯୋଜନା କରୁଛନ୍ତି। ହେଲେ ଠିକ୍ ସମୟରେ ଗ୍ରାମାଞ୍ଚଳବାସୀଙ୍କୁ ସହାୟତା ମିଳୁ ନ ଥିବାରୁ ଅନେକେ ବିଭିନ୍ନ ଯୋଜନାରୁ ବଞ୍ଚତ୍ତ ଥିବା ପରିଲକ୍ଷିତ ହେଉଛି। ଏଭଳି ଏକ ଘଟଣା ପୁରୀ ଜିଲା ପିପିଲି ବ୍ଲକ ଅଞ୍ଚଳରେ ଦେଖିବାକୁ ମିଳିଛି। ଏହି ବ୍ଲକ ସରସ୍ବତୀପୁର ପଞ୍ଚାୟତ ଅନ୍ତର୍ଗତ ଦକ୍ଷିଣସାହି ନଦୀବନ୍ଧରେ ଆଜକୁ ୩୦ବର୍ଷ ହେବ ଝୁମ୍ପୁଡିଘରେ ରହି ଆସୁଛନ୍ତି ୪ ପରିବାର। ପ୍ରଥମେ ମହାବାତ୍ୟା ପରେ ଫନୀରେ ଏହି ଝୁମ୍ପୁଡିଘର ସମ୍ପୂର୍ଣ୍ଣ ଭାଙ୍ଗି ଯାଇଥିଲେ ବି ଏଯାବତ ସରକାରୀ ସହାୟତା ମିଳି ନାହିଁ। ଏ ନେଇ ପ୍ରଶାସନ ନିକଟରେ ବାରମ୍ବାର ଅଭିଯୋଗ କରିଆସୁଥିଲେ ମଧ୍ୟ କେହି ଶୁଣୁ ନ ଥିବା ଉକ୍ତ ପରିବାର ଲୋକ ଅଭିଯୋଗ କରିଛନ୍ତି। ସୂଚନାଯୋଗ୍ୟ, ରମେଶ ଶିକାରୀ, କିଷ୍ଣା ଶିକାରୀ, ପ୍ରଫୁଲ୍ଲ ଶିକାରୀ ଓ ତୋଫାନ ଶିକାରୀଙ୍କ ପରିବାର ଦୀର୍ଘବର୍ଷ ହେବ ଦକ୍ଷିଣସାହି ନଦୀବନ୍ଧରେ ରହିଆସୁଛନ୍ତି। ବାତ୍ୟାରେ ସେମାନଙ୍କ ବାରମ୍ବାର ଘର ଭାଙ୍ଗୁଥିବାବେଳେ ଅଭିଯୋଗ ସତ୍ତ୍ୱେ ସହୟତା କି ସହଯୋଗଟିଏ ମିଳିପାରୁ ନାହିଁ। ଏଥିସହ ସେମାନଙ୍କ ଆଧାରକାର୍ଡରେ ଠିକଣା ସରସ୍ବତୀପୁର ଦକ୍ଷିଣସାହି ଛକ ରହିଥିବାବେଳେ ଅଞ୍ଚଳରେ ସେଭଳି କିଛି ଠିକଣା ପ୍ରକୃତରେ ନାହିଁ। ଏପିରିକି ସେହି ପରିବାରର ୨ଜଣ ବୃଦ୍ଧା ରହିଥିବା ବେଳେ ସେମାନଙ୍କର ପରିଚୟପତ୍ର କି ଅଧାରକାର୍ଡ ନାହିଁ। ଫଳରେ ବାର୍ଦ୍ଧକ୍ୟ ଭତ୍ତା ମଧ୍ୟ ମିଳିପାରୁ ନାହିଁ। ଅନ୍ୟପଟେ କରୋନା କଟକଣା ଥିବାରୁ ପରିବାର ଚଳାଇବା କଷ୍ଟକର ହୋଇପଡ଼ିଛି। ବେଳେବେଳେ ଭିକ୍ଷାବୃତ୍ତି କରି ମଧ୍ୟ ପରିବାର ଭରଣ ପୋଷଣ କରୁଥିବା କହିଛନ୍ତି। ଗରିବଙ୍କ ପାଇଁ ସରକାର ବହୁ ଯୋଜନା କରିଥିବାବେଳେ ସେମାନଙ୍କ ପାଇଁ ଏସବୁ ସାତସପନ ହୋଇପଡ଼ିଛି। ଏହି ଭୂମିହୀନ ବ୍ୟକ୍ତିମାନଙ୍କୁ ଜମିପଟ୍ଟା ଯୋଗାଇ ଦେବା ସହ ପିଲାମାନଙ୍କ ଭବିଷ୍ୟତ ଉଜ୍ଜ୍ୱଳ ପାଇଁ ସରକାରଙ୍କ ନିୟମ ମୁତାବକ ସରକାରୀ ସହାୟତା ଯୋଗାଇ ଦେବାକୁ ସାମାଜିକ କର୍ମୀ ସତ୍ୟନାରାୟଣ ସାମନ୍ତରାୟ ଦାବି କରିଛନ୍ତି। ଏ ନେଇ ବିଡିଓ ରଶ୍ମିତା ନାଥ କହିଛନ୍ତି, ଏ ଅଭିଯୋଗ ବିଷୟରେ ସୂଚନା ପାଇଛି। ମଙ୍ଗଳବାର ଏହାର ତଦନ୍ତ କରାଯିବା ସହ ପ୍ରାଥମିକତା ଦୃଷ୍ଟିରୁ କିଛି ସହାୟତା ଦିଆଯିବ। ପରେ ତଦନ୍ତ ରିପୋର୍ଟ ଅନୁଯାୟୀ ସମ୍ପୂର୍ଣ୍ଣ ସରକାରୀ ସହାୟତା ମିଳିବ। ଏବେ ଫନୀ ସହାୟତା ବଣ୍ଟନ ହେଉଥିବାରୁ ନୂତନ ଭୂମିହୀନଙ୍କୁ ତାଲିକାରେ ଯୋଗ କରାଯିବ ନାହଁ ବୋଲି ସେ କହିଛନ୍ତି।
