ଋଷିକେଶ,୨୮।୯: ଉତ୍ତରାଖଣ୍ଡର ବହିଷ୍କୃତ ଭାଜପା ନେତାଙ୍କ ପୁଅ ପୁଲକିତ ଆର୍ଯ୍ୟଙ୍କ ରିସର୍ଟରେ ୧୯ ବର୍ଷୀୟା ରିସିପ୍ସନିଷ୍ଟ ଅଙ୍କିତା ଭଣ୍ଡାରୀ ହତ୍ୟା ମାମଲାରେ ଜଣେ ପୂର୍ବତନ କର୍ମଚାରୀ ମୁହଁ ଖୋଲିଛନ୍ତି। ପୁଲକିତଙ୍କ ରିସର୍ଟରେ ନିୟମିତ ଡ୍ରଗ୍ସ କାରବାର ଓ ଗଣିକା ବୃତ୍ତି ଚାଲିଥିଲା। ରିସର୍ଟ ପରିଚାଳନା ବିଭାଗ ଗ୍ରାହକମାନଙ୍କୁ ବେଆଇନ ନିଶାଦ୍ରବ୍ୟ, ଗଞ୍ଜେଇ ଓ ଅନ୍ୟାନ୍ୟ ଡ୍ରଗ୍ସ ଯୋଗାଇଦେବା ସହ ଝିଅ ଯୋଗାଇ ଦେଉଥିଲେ ବୋଲି ରିଶିତା ନାମ୍ନୀ ପୂର୍ବତନ କର୍ମଚାରୀ କହିଛନ୍ତି। ଦୁଇ ମାସ ପୂର୍ବରୁ ରିଶିତା ଓ ତାଙ୍କ ସ୍ବାମୀ ବିବେକ ଉକ୍ତ ରିସର୍ଟରେ କାମ କରୁଥିଲେ। ଅଗଷ୍ଟରେ ଅଙ୍କିତା ସେଠାରେ ଯୋଗଦେବା ପୂର୍ବରୁ ସେମାନେ ଛାଡ଼ିଦେଇଥିଲେ। ଗଣିକା ବୃତ୍ତିରେ ସାମିଲ ହେବା ଲାଗି ଅଙ୍କିତା ମନା କରିବାରୁ ପୁଲକିତ ଓ ତାଙ୍କ ରିସର୍ଟର ଦୁଇଜଣ କର୍ମଚାରୀ ତାଙ୍କୁ ହତ୍ୟା କରିଥିବା ପୋଲିସ ତଦନ୍ତରୁ ଜାଣିବାକୁ ପାଇଛି। ସେମାନଙ୍କୁ ଗିରଫ କରାଯାଇଛି।
