ଭୁବନେଶ୍ୱର,୨୩।୧୨(ବ୍ୟୁରୋ): ସର୍ବଭାରତୀୟ ଅଭିଭାବକ ସଂଘ (ଆଇପା) ପକ୍ଷରୁ ବିଭିନ୍ନ ରାଜନୈତିକ ଦଳ, ଶିକ୍ଷାବିତ୍, ଶିକ୍ଷକ ସଂଘ, ଅଭିଭାବକ ଓ ଶିକ୍ଷା ଅଧିକାର କର୍ମୀଙ୍କୁ ନେଇ ଲୋହିଆ ଏକାଡ଼େମୀଠାରେ ବୁଧବାର ମିଳିତ ରାଜ୍ୟସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି। ଡ. ଅମୀୟ ମହାନ୍ତିଙ୍କ ସଭାପତିତ୍ୱରେ ଆୟୋଜିତ ଏହି ବୈଠକରେ ‘ରାଜ୍ୟରେ ଘରୋଇ ବିଦ୍ୟାଳୟ ପରିଚାଳନା ଓ ଫି ନିର୍ଦ୍ଧାରଣ ଆଇନ୍’ର ଏକ ପ୍ରସ୍ତାବିତ ଖସଡ଼ାକୁ ଉପସ୍ଥାପନ କରାଯାଇଥିଲା। ଏହିକୁ କଡ଼ାକଡ଼ି ଲାଗୁକରି ଛାତ୍ରୀଛାତ୍ର ଓ ଅଭିଭାବକଙ୍କୁ ଶୋଷଣରୁ ମୁକ୍ତ କରିବାକୁ ଦାବି ଉଠିଥିଲା।
ରାଜ୍ୟରେ ଚାଲିଥିବା ବହୁ ଇଂଲିଶ ମାଧ୍ୟମ ସ୍କୁଲ୍ ଓ ଧାର୍ମିକ ଅନୁଷ୍ଠାନର ଓଡ଼ିଆ ସ୍କୁଲ ନିଜ ମାଲିକାନାରେ ପରିଚାଳିତ ହେବା ସହିତ ଛାତ୍ର ଓ ଅଭିଭାବକଙ୍କୁ ଗୁଣାମତ୍କ ଶିକ୍ଷା ପ୍ରଦାନ ନାମରେ ଶୋଷଣ କରୁଛନ୍ତି। ନାମଲେଖା ଫି, ମାସିକ ଟ୍ୟୁଶନ ଫି, କମ୍ପ୍ୟୁଟର, ଖେଳ, ଲାଇବ୍ରେରୀ ଫି, ହଷ୍ଟେଲ, ପରିବହନ ଓ ଭିତ୍ତିଭୂମି ନିର୍ମାଣ ଇତ୍ୟାଦି ଫି’ ମନଇଚ୍ଛା ନେଉଛନ୍ତି। କରୋନା ମହାମାରୀ ସମୟରେ ବର୍ଷାଧିକ କାଳ ଶିକ୍ଷାଦାନ ବନ୍ଦ ଥିବା ସମୟରେ ଓ ଲକ୍ଷ ଲକ୍ଷ ଅଭିଭାବକ ରୋଜଗାର ହରାଇଥିବାବେଳେ ଅନ୍ଲାଇନ୍ ଶିକ୍ଷା ପ୍ରଦାନ ନାଁରେ କୋର୍ଟ ଓ ସରକାରୀ ନିର୍ଦ୍ଦେଶନାମାକୁ ବେଖାତିର କରି ସ୍କୁଲ୍ କର୍ତ୍ତୃପକ୍ଷମାନେ ପୂର୍ଣ୍ଣମାତ୍ରାରେ ଫି’ ଆଦାୟ କରୁଛନ୍ତି। ଅଭିଯୋଗ କଲେ ପୋଲିସ ଓ ପ୍ରଶାସନକୁ ହାତ କରି ଅଭିଭାବକଙ୍କୁ ଥାନାରେ ପୂରା ଯାଉଛି। ଫି’ ଦେଇପାରି ନ ଥିବା ଛାତ୍ରୀଛାତ୍ରଙ୍କ ଅନଲାଇନ୍ ଶିକ୍ଷା ଲିଙ୍କ୍ କାଟିଦେଇ ସେମାନଙ୍କୁ ମାନସିକ ଓ ସାମାଜିକ ନିର୍ଯାତନା ମଧ୍ୟ ଦିଆଯାଉଛି। ଯେଉଁ ଅଭିଭାବକ ନିଜ ପିଲାଙ୍କୁ ସରକାରୀ ବିଦ୍ୟାଳୟକୁ ନେବାକୁ ଚାହୁଁଛନ୍ତି ସେମାନଙ୍କୁ ଟିସି ନ ଦେଇ ହଇରାଣ କରାଯାଉଛି। ତେଣୁ ଏହା ବିରୋଧରେ ସ୍ବର ଉଠାଇବା ପାଇଁ ବୈଠକରେ ଉପସ୍ଥିତ ରାଜନେତା, ଶିକ୍ଷକ ନେତା, ସାମ୍ବାଦିକ ପ୍ରମୁଖ ପ୍ରତିଶ୍ରୁତି ଦେଇଥିଲେ।
