କଟକ ଅଫିସ,୧୧ା୫: ଉନ୍ନତ ଶିକ୍ଷାଦାନ ସହ ବିଦ୍ୟାଳୟ ଭିତ୍ତିଭୂମିର ବିକାଶ ପାଇଁ ସରକାର ପ୍ରଚୁର ଟଙ୍କା ଖର୍ଚ୍ଚ କରୁଛନ୍ତି। ଏପରିକି ୫-ଟି ଅଧୀନରେ ବିଦ୍ୟାଳୟ ରୂପାନ୍ତରଣ କାର୍ଯ୍ୟକ୍ରମ କରାଯାଉଛି। ତଥାପି ଅନେକ ବିଦ୍ୟାଳୟର ସ୍ଥିତି ସୁଧୁରିପାରୁନାହିଁ। କେଉଁଠି ଶିକ୍ଷକ ସମସ୍ୟା ତ ଆଉ କେଉଁଠାରେ ଶ୍ରେଣୀଗୃହ ସମେତ ଅନ୍ୟ ଭିତ୍ତିଭୂମିର ଅଭାବ ଲାଗିରହିଛି। କଟକ ଜିଲାର ଅନେକ ପ୍ରାଥମିକ ସ୍କୁଲରେ ଏଭଳି ସମସ୍ୟା ଦେଖିବାକୁ ମିଳିଛି। ଜିଲାରେ ୫୩ଟି ପ୍ରାଥମିକ ବିଦ୍ୟାଳୟରେ ମାତ୍ର ଗୋଟିଏ ଲେଖାଏ ଶ୍ରେଣୀଗୃହ ରହିଛି, ଯାହା ପ୍ରାଥମିକ ଶିକ୍ଷା ବ୍ୟବସ୍ଥାର ଅସଲ ଚିତ୍ରକୁ ପଦାରେ ପକାଉଛି।
ବିଦ୍ୟାଳୟ ପ୍ରତି ପିଲାଙ୍କୁ ଆକର୍ଷିତ କରିବା ଲାଗି ଅନେକ ସରକାରୀ ଯୋଜନା କାର୍ଯ୍ୟକାରୀ ହେଉଛି। ଯେପରି ୬ରୁ ୧୪ବର୍ଷର ସମସ୍ତ ପିଲା ବିଦ୍ୟାଳୟକୁ ଆସି ପାଠ ପଢିବେ ସେଥିପ୍ରତି ଗୁରୁତ୍ୱ ଦିଆଯାଉଛି। ଏପରିକି ଛାତ୍ରୀଛାତ୍ରଙ୍କୁ ଆକର୍ଷିତ କରିବା ଲାଗି ମଧ୍ୟାହ୍ନଭୋଜନ, ଡ୍ରେସ୍ କୋଡ୍, ମାଗଣା ପୁସ୍ତକ ଯୋଗାଣ ଭଳି ଅନେକ ଯୋଜନା ହୋଇଛି। ମାତ୍ର ପ୍ରାଥମିକ ଶିକ୍ଷା ନେଇ ଭିତ୍ତିଭୂମିର ବିକାଶ ପ୍ରତି ଗୁରୁତ୍ୱ ଦିଆଯାଉନାହିଁ। ସରକାରୀ ଉଚ୍ଚ ବିଦ୍ୟାଳୟକୁ ୫-ଟି ଯୋଜନାରେ ସୌନ୍ଦର୍ଯ୍ୟକରଣ କରାଯିବା ସହ ଅତ୍ୟାଧୁନିକ ଶିକ୍ଷାଦାନ ବ୍ୟବସ୍ଥା ହୋଇଛି। ମାତ୍ର ପ୍ରାଥମିକ ଶିକ୍ଷା କ୍ଷେତ୍ରରେ ଅନେକ ସମସ୍ୟା ଲାଗିରହିଛି। କଟକ ଜିଲାରେ ଥିବା ୮୨୨ରୁ ଅଧିକ ପ୍ରାଥମିକ ବିଦ୍ୟାଳୟ ମଧ୍ୟରୁ ୫୩ ବିଦ୍ୟାଳୟରେ ଗୋଟିଏ ଲେଖାଏ ଶ୍ରେଣୀଗୃହ ରହିଥିବା ବେଳେ ୫୦୦ଟି ବିଦ୍ୟାଳୟରେ ୨ଟି ଲେଖାଏ ଶ୍ରେଣୀଗୃହ ରହିଛି। ସେହିପରି ୨୬୨ଟି ବିଦ୍ୟାଳୟରେ ୩ରୁ ଅଧିକ ଶ୍ରେଣୀଗୃହ ଥିବା ସରକାରୀ ତଥ୍ୟରୁ ସୂଚନା ମିଳିଛି। ପ୍ରାଥମିକ ଶିକ୍ଷା ପ୍ରତ୍ୟେକ ଛାତ୍ରୀଛାତ୍ରଙ୍କ ଜୀବନରେ ଗୁରୁତ୍ୱ ବହନ କରିଥାଏ। ଏହିଠାରୁ ହିଁ ଶିକ୍ଷାର ମୂଳଦୁଆ ପଡ଼ିିଥାଏ। ମାତ୍ର ପ୍ରାଥମିକ ଶିକ୍ଷା କ୍ଷେତ୍ରରେ ସରକାରୀ ବିଦ୍ୟାଳୟରେ ଭିତ୍ତିଭୂମିର ଅଭାବ ପରିଲକ୍ଷିତ ହୋଇଛି। ବହୁ ବିଦ୍ୟାଳୟରେ ଆବଶ୍ୟକ ଶ୍ରେଣୀଗୃହ ନାହିଁ। ଏପରିକି ଗୋଟିଏ ଶ୍ରେଣୀଗୃହରେ ଏକାଧିକ ଶ୍ରେଣୀର ବିଦ୍ୟାର୍ଥୀ ବସି ପାଠ ପଢୁଛନ୍ତି। ଭିତ୍ତିଭୂମି ଅଭାବ ଓ ଅତ୍ୟାଧୁନିକ ପଦ୍ଧତିରେ ଶିକ୍ଷାଦାନ କରାଯାଉ ନ ଥିବାରୁ ବିଭିନ୍ନ ଘରୋଇ ବିଦ୍ୟାଳୟ ପ୍ରତି ଆଗ୍ରହ ବଢିବାରେ ଲାଗିଛି। ବହୁ ଅଭିଭାବକ ସେମାନଙ୍କ ପିଲାଙ୍କୁ ସରକାରୀ ସ୍କୁଲ ପରିବର୍ତ୍ତେ ଘରୋଇ ବିଦ୍ୟାଳୟରେ ନାମ ଲେଖାଉଛନ୍ତି। ଅନ୍ୟପକ୍ଷରେ ଏ ନେଇ ବିଭାଗୀୟ ଅଧିକାରୀଙ୍କ ପ୍ରତିକ୍ରିୟା ମିଳିପାରିନାହିଁ।
