ପାରାଦୀପ,୧୫ା୨(ଶରତ ରାଉତ)ଜଗତ୍ସିଂହପୁର ଜିଲା ପାରାଦୀପ ପୌରାଞ୍ଚଳରେ ଥିବା ୧୨ ସରକାରୀ ବିଦ୍ୟାଳୟରେ ଯାବତୀୟ ବ୍ୟତିକ୍ରମ ଥିବା ଜନସୂଚନା ଅଧିକାରୀ ଆଇନ ତଥ୍ୟରେ ଜଣାପଡ଼ିଛି। କେଉଁଠାରେ ବିଦ୍ୟାଳୟ ପାଇଁ ସରକାରଙ୍କ ନିଜସ୍ବ ଘର ନାହିଁ। ସେଠାରେ ପୌର ପରିଷଦ ଗୋଷ୍ଠୀ କେନ୍ଦ୍ର, ପୋର୍ଟ ଘର, ବାତ୍ୟା ଆଶ୍ରୟସ୍ଥଳରେ ପାଠପଢ଼ା ହେଉଛି। କିନ୍ତୁ ସେହି ଘର ପାଇଁ ଶିକ୍ଷା ବିଭାଗ ପ୍ରତିବର୍ଷ ଲକ୍ଷାଧିକ ଟଙ୍କା ବ୍ୟୟ କରୁଛନ୍ତି। ଏମିତି ଅନେକ ତଥ୍ୟ ହସ୍ତଗତ ହୋଇଛି। ତାକୁ ତର୍ଜମା କଲେ ଅନେକ ଦୁର୍ନୀତି, ଶିକ୍ଷୟିତ୍ରୀ ଶିକ୍ଷକଙ୍କୁ ଥଇଥାନ ଭଳି ବ୍ୟତିକ୍ରମ ରହିଛି। ଏପରିକି ଗୋଟିଏ ବିଦ୍ୟାଳୟରେ ଥିବା ସହକାରୀ ଶାସ୍ତ୍ରୀୟ ଶିକ୍ଷୟିତ୍ରୀଙ୍କ ନାମ ୨ ପ୍ରକାର ରହିଛି। ନୂଆବଜାର କ୍ଲଷ୍ଟର ସରକାରୀ ସଞ୍ଜୟ ଗାନ୍ଧୀ ସରକାରୀ ଉଚ୍ଚ ବିଦ୍ୟାଳୟରେ ୧୫ଜଣ ଶିକ୍ଷୟିତ୍ରୀ ଶିକ୍ଷକ ଅଛନ୍ତି। ସେଥିରେ ସହକାରୀ ଶାସ୍ତ୍ରୀୟ ଶିକ୍ଷୟିତ୍ରୀଙ୍କ ନାମ ସମଗ୍ର ଶିକ୍ଷା ତଥା ଜିଲା ଶିକ୍ଷାଧିକାରୀ କାର୍ଯ୍ୟାଳୟ ସୂତ୍ରରୁ ମିଳିଥିବା ସୂଚନା ଚିଠି ନଂ. ୨୩୦୧/୧୯ା୧୨ା୨୦୨୩ରେ ଦର୍ଶାଯାଇଛି ଶାସ୍ତ୍ରୀୟ ଶିକ୍ଷୟିତ୍ରୀଙ୍କ ନାମ ଗୀତାଞ୍ଜଳି ସିଂ। ସମାନ ବିଦ୍ୟାଳୟର ଶିକ୍ଷୟିତ୍ରୀ ଶିକ୍ଷକ ଓ ଛାତ୍ରୀଛାତ୍ରଙ୍କ ତାଲିକାରେ କୁଜଙ୍ଗ ମଣ୍ଡଳ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ଜନସୂଚନା ଅଧିକାରୀ କୈଳାସ ଚନ୍ଦ୍ର ସ୍ବାଇଁ ଚିଠି ନଂ. ୧୯୧୭/୨୧ା୧୧ା୨୦୨୩ ଦେଇଛନ୍ତି। ସେଥିରେ ଦର୍ଶାଯାଇଛି ଶାସ୍ତ୍ରୀୟ ଶିକ୍ଷୟିତ୍ରୀଙ୍କ ନାମ ଉଷାରାଣୀ ସିହ୍ନା। ଏ ସମ୍ପର୍କରେ ସଞ୍ଜୟ ଗାନ୍ଧୀ ସରକାରୀ ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ସବିତା ପରିଡାଙ୍କୁ ପଚାରିବାରେ ଶାସ୍ତ୍ରୀୟ ଶିକ୍ଷୟିତ୍ରୀ ହେଉଛନ୍ତି ଉଷାରାଣୀ ସିହ୍ନା ବୋଲି କହିଛନ୍ତି।
ସୂଚନାଯୋଗ୍ୟ, ପାରାଦୀପର ସରକାରୀ ବିଦ୍ୟାଳୟ ସମ୍ପର୍କରେ ୮ଟି ପ୍ରଶ୍ନ ସହ ଶିକ୍ଷା ଆୟୁକ୍ତଙ୍କୁ ୧୩ା୯ା୨୦୨୩ରେ ଜନସୂଚନା ଅଧିକାର ଆଇନ ଅନୁସାରେ ତଥ୍ୟ ମଗାଯାଇଥିଲା। ସେଗୁଡ଼ିକ ହେଲା କେତେଜଣ ଶିକ୍ଷକ, ଛାତ୍ରୀଛାତ୍ର ସଂଖ୍ୟା, ସିଆର୍ସିସି ନିଯୁକ୍ତି, କେଉଁ ବିଦ୍ୟାଳୟକୁ କେତେ ଟଙ୍କା ପ୍ରତିବର୍ଷ ସରକାର ଦେଉଛନ୍ତି, କ୍ରୀଡା ବାବଦରେ ଖର୍ଚ୍ଚ ଆଦି ସମ୍ପର୍କରେ ତଥ୍ୟ ଥିଲା। ଧାର୍ଯ୍ୟ ସମୟ ମଧ୍ୟରେ ଆୟୁକ୍ତଙ୍କ କାର୍ଯ୍ୟାଳୟ ଶିକ୍ଷା ବିଭାଗର ଡାଇରେକ୍ଟର, ସମଗ୍ର ଶିକ୍ଷା, ଓଏସ୍ଇପିଏ, ଜଗତ୍ସିଂହପୁର ଜିଲା ଶିକ୍ଷାଧିକାରୀ, ଡିପିସିଙ୍କୁ ଅବଗତ କରି ସୂଚନା ଦେବା ପାଇଁ ଚିଠି ନଂ.୨୨୬୨୬ କରିଥିଲେ। ପରବର୍ତ୍ତୀ ସମୟରେ ୬ଟି ଉତ୍ତର ଭିନ୍ନ ଭିନ୍ନ ବିଭାଗ ପକ୍ଷରୁ ମିଳିଥିଲା। ୧୦ା୧୦ା୨୦୨୩ରେ ଜିଲା ଶିକ୍ଷାଧିକାରୀଙ୍କ କାର୍ଯ୍ୟାଳୟ ଚିଠି ନଂ.୧୮୫୪ରେ ଜଣାଇଥିଲେ ଯେ, ୮ଟି ପ୍ରଶ୍ନ ସମ୍ପର୍କରେ ଉକ୍ତ ଅଫିସରେ ଉପଲବ୍ଧ ନାହିଁ। ପରେ ଅପିଲ କରାଯିବାରେ କେତେକ ତଥ୍ୟ ସମ୍ପର୍କରେ ସୂଚନା ମିଳିଛି। ଏବେ ସୁଦ୍ଧା ଜଗତ୍ସିଂହପୁର ଜିଲାର ବିଭିନ୍ନ ମଣ୍ଡଳ ଶିକ୍ଷାଧିକାରୀଙ୍କ କାର୍ଯ୍ୟାଳୟ, ଜିଲା ଶିକ୍ଷାଧିକାରୀଙ୍କ କାର୍ଯ୍ୟାଳୟ ପକ୍ଷରୁ ୧୨ଟି ଚିଠି ହସ୍ତଗତ ହୋଇଛି। ସେଥିରେ ଯଦିଓ ସମ୍ପୂର୍ଣ୍ଣ ସୂଚନା ଏ ପର୍ଯ୍ୟନ୍ତ ମିଳିନାହିଁ, କିନ୍ତୁ ପ୍ରାୟ ୭୦ ପୃଷ୍ଠାର ସୂଚନା ମିଳିଛି। ସେଥିରେ ୧୨ଟି ବିଦ୍ୟାଳୟ ପାଇଁ ବାର୍ଷିକ ୧୭ ଯୋଜନା ଅର୍ଥ ମିଳିବା ଏବଂ ଖର୍ଚ୍ଚ ସମ୍ପର୍କରେ ତଥ୍ୟ ଅଛି। ୨୦୧୮ରୁ ୨୦୨୩ ଆର୍ଥିକ ବର୍ଷ ମଧ୍ୟରେ କୋଟିଏରୁ ଅଧିକ ଟଙ୍କା ବ୍ୟୟ ହୋଇଛି। ପ୍ରତ୍ୟେକ ସରକାରୀ ବିଦ୍ୟାଳୟକୁ ଯେଉଁ ୧୭ ଯୋଜନାରେ ଅର୍ଥ ଦିଆଯାଉଛି, ସେଗୁଡ଼ିକ ହେଲା ଏସ୍ସି, ଏସ୍ଟି, ବିପିଏଲ୍, ବାଳିକା ପାଇଁ ପୋଷାକ, ଏପିଏଲ୍ ଛାତ୍ରୀଛାତ୍ରଙ୍କ ପାଇଁ ସ୍କୁଲ ପୋଷାକ, କମ୍ପୋଜିଟ୍ ଗ୍ରାଣ୍ଟ, ସ୍ପୋଟର୍ସ, ଯୁବ ଓ ଜାତୀୟ ସବୁଜ ବାହିନୀ, ସୁରକ୍ଷା ନିରାପତ୍ତା, ଶାଲା ସିଦ୍ଧି, କମ୍ୟୁନିଟି ମୋବିଲାଇଜେଶନ, ଏସ୍ଏମ୍ସି ତାଲିମ, ଝାନ୍ସିରାଣୀ ବାଳିକା ଆତ୍ମସୁରକ୍ଷା, ଲାଇଫ ସ୍କିଲ୍, ଷ୍ଟୁଡେଣ୍ଟ ରିପୋର୍ଟ କାର୍ଡ, ପାଠାଗାର, କୋଭିଡ୍, ସୃଜନୀ ଓ ଲୋଗୋ। ଏହାବାଦ୍ ମୋ ସ୍କୁଲ ଯୋଜନା ଅର୍ଥ ଅଲଗା ଆସିଛି। ପାରାଦୀପର ୧୨ ସରକାରୀ ବିଦ୍ୟାଳୟରେ ପ୍ରଥମରୁ ଦଶମ ଶ୍ରେଣୀ ମଧ୍ୟରେ ୨୦୨୩-୨୪ ବର୍ଷରେ ୨୩୧୫ ଛାତ୍ରୀଛାତ୍ର ଥିବା ବେଳେ ଶିକ୍ଷୟିତ୍ରୀ ଶିକ୍ଷକ ସଂଖ୍ୟା ୯୩ ରହିଛି। ସଞ୍ଜୟ ଗାନ୍ଧୀ ବିଦ୍ୟାଳୟରେ ଶାସ୍ତ୍ରୀୟ ଶିକ୍ଷୟିତ୍ରୀ ରିପୋର୍ଟ ଶିକ୍ଷାଧିକାରୀଙ୍କୁ ଦେଇଥିବା ସମ୍ପର୍କରେ ସିଆର୍ସିସି ସୁକାନ୍ତ ସ୍ବାଇଁଙ୍କୁ ପଚାରିବାରେ ସେ କଥା ମୁଁ ଜାଣିନି, ତୁମେ ଡିଇଓଙ୍କୁ ପଚାର ବୋଲି କହିଥିଲେ।
