ନୂଆଦିଲ୍ଲୀ,୪।୪: ମାର୍ଚ୍ଚରେ ହୋଇଥିବା ଦମଦାର ପ୍ରଦର୍ଶନ ପାଇଁ ଆଇସିସି ପୁରୁଷ ଏବଂ ମହିଳା ପ୍ଲେୟାର ଅଫ ଦି ମନ୍ଥ ପୁରସ୍କାର ପାଇବାକୁ ପ୍ରତିଯୋଗୀମାନଙ୍କ ସର୍ଟଲିଷ୍ଟ ଗୁରୁବାର ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ପ୍ରକାଶ କରିଛି। ମାର୍ଚ୍ଚ ୨୦୨୪ ପାଇଁ ଆଇସିସି ପୁରୁଷ ପ୍ଲେୟାର ଅଫ ମନ୍ଥ ପାଇଁ ସର୍ଟଲିଷ୍ଟରେ ଶ୍ରୀଲଙ୍କା ଅଲରାଉଣ୍ଡରଙ୍କ ସହ ଆୟର୍ଲାଣ୍ଡ ଏବଂ ନ୍ୟୁଜିଲ୍ୟାଣ୍ଡର ଦୁଇଜଣ ଦ୍ରୁତ ବୋଲର ମଧ୍ୟ ସାମିଲ ହୋଇଛନ୍ତି। କୌଣସି ଭାରତୀୟ ଖେଳାଳି ଏଥିରେ ସ୍ଥାନ ପାଇ ନାହାଁନ୍ତି।
ମାର୍କ ଅଦାୟାର ୨୦୧୯ରେ ତାଙ୍କର ଆନ୍ତର୍ଜାତୀୟ ଡେବ୍ୟୁ କରିବା ପରଠାରୁ, ସେ ସମସ୍ତ ଫର୍ମାଟରେ ଆୟର୍ଲାଣ୍ଡ ସେଟଅପର ଏକ ଅବିଚ୍ଛେଦ୍ୟ ଅଙ୍ଗ ହୋଇପାରିଛନ୍ତି। ମାର୍ଚ୍ଚରେ ଆଫଗାନିସ୍ତାନ ଉପରେ ତାଙ୍କ ଦଳର ଐତିହାସିକ ଟେଷ୍ଟ ବିଜୟରେ ମାର୍କ ଅଦାୟର ପ୍ରମୁଖ ଭୂମିକା ଗ୍ରହଣ କରିଥିଲେ। ସେ ପ୍ରଥମ ଥର ପାଇଁ ୫ ୱିକେଟ ନେଇ ସଫଳତା ହାସଲ କରିଥିଲେ। ମ୍ୟାଚରେ ତାଙ୍କର ଭଲ ପ୍ରଦର୍ଶନ ପାଇଁ ଅଦାୟରଙ୍କୁ ପ୍ଲେୟାର ଅଫ ଦି ମ୍ୟାଚ ଭାବେ ମନୋନୀତ କରାଯାଇଥିଲା। ତାଙ୍କର ଆଠଟି ୱିକେଟ ହାରାହାରି ୧୧.୮୭ ରେ ଆସିଥିଲା । ଏହା ପରେ ସେ ଓ୍ବାନଡେ ସିରିଜରେ ୩ ୱିକେଟ ଏବଂ ପରେ ଟି -୨୦ ସିରିଜରେ ୫ ୱିକେଟ ନେଇଥିଲେ।
ଶ୍ରୀଲଙ୍କା ଖେଳାଳି କାମେନ୍ଦୁ ମେଂଡିସ ୨୦୨୨ ପରଠାରୁ ପ୍ରଥମ ଥର ପାଇଁ ଶ୍ରୀଲଙ୍କା ଦଳକୁ ପ୍ରତ୍ୟାବର୍ତ୍ତନ କରି କ୍ରମାଗତ ଭାବରେ ଭଲ ପ୍ରଦର୍ଶନ କରିଛନ୍ତି। ବାଂଲାଦେଶ ବିପକ୍ଷରେ କାମେନ୍ଦୁ ଧନଞ୍ଜୟ ଡି ସିଲଭାଙ୍କ ସହ ଷଷ୍ଠ ୱିକେଟ ପାଇଁ ୨୦୨ ରନ ସଂଗ୍ରହ କରିଥିଲେ। ଦ୍ୱିତୀୟ ଇନିଂସରେ ସେ ଏକ ଭଲ ପ୍ରଦର୍ଶନ କରିଥିଲେ। ଅଷ୍ଟମ ନମ୍ବରରେ ଆସି ସେ ସପ୍ତମ ୱିକେଟ ପାଇଁ ଧନଞ୍ଜୟଙ୍କ ସହ ୧୭୩ ରନ ଯୋଡିଥିଲେ। ଏହି ସମୟ ମଧ୍ୟରେ ସେ ୧୬୪ ରନର ଶ୍ରେଷ୍ଠ ଇନିଂସ ଖେଳିଥିଲେ।
ନ୍ୟୁଜିଲ୍ୟାଣ୍ଡର ଦ୍ରୁତ ବୋଲର ମ୍ୟାଟ ହେନେରୀ ଏକ ଶକ୍ତିଶାଳୀ ଅଷ୍ଟ୍ରେଲିଆ ଦଳ ବିପକ୍ଷରେ ଅସାଧାରଣ ରେଡ-ବଲ ଫର୍ମ ପ୍ରଦର୍ଶନ କରିଥିଲେ। ନ୍ୟୁଜିଲ୍ୟାଣ୍ଡରେ ସମ୍ପ୍ରତି ଶେଷ ହୋଇଥିବା ଟ୍ରାନ୍ସ-ଟାସମାନ ଟ୍ରଫିରେ ଅଷ୍ଟ୍ରେଲିଆ ୨-୦ରେ ଜିତିଥିବା ବେଳେ ହେନେରୀ ହାରାହାରି ୧୫.୭ ରେ ୧୭ଟି ୱିକେଟ ନେଇଛନ୍ତି, ଏଥି ସହିତ ଦୁଇଟି ପାଞ୍ଚ ୱିକେଟ ନେଇଥିବାର ନଜିର ବି ରହିଛି। ସେ ମଧ୍ୟ ହାରାହାରି ୨୫.୨୫ ରେ ୧୦୧ ରନ ସ୍କୋର କରିଥିଲେ।
