କାବୁଲ,୨୪।୯:ଆଫଗାନିସ୍ତାନର ଅଶ୍ରଫ ଗନି ସରକାର ଅମଳରେ କାବୁଲ ମେୟର ଥିବା ଦାଉଦ ସୁଲତାନଜୋୟ ତାଲିବାନ୍ ଶାସନରେ ବି ରାଜଧାନୀକୁ ଚଳାଉଛନ୍ତି। ଏବେ ସେ ତାଲିବାନ୍ ନିଯୁକ୍ତ ନୂଆ କାମଚଳା ପ୍ରଶାସକ ହମିଦୁଲ୍ଲା ନୋମାନିଙ୍କ ସହ ମିଶି ଅଫିସ ପରିଚାଳନା କରୁଛନ୍ତି।
ତାଲିବାନ୍ର ଅଗଷ୍ଟ ୧୫ କାବୁଲ ଦଖଲକୁ ମାସେରୁ ଅଧିକ ସମୟ ବିତିଲାଣି। ଆମେରିକା ସମର୍ଥତ୍ତ ପ୍ରାୟ ସମସ୍ତ ଅଧିକାରୀ ଆଫଗାନିସ୍ତାନ ଛାଡ଼ି ଚାଲିଯାଇଛନ୍ତି ଅଥବା ଭୟରେ ଆତଙ୍କବାଦୀଙ୍କ ନିକଟରେ ପଦବୀ ତ୍ୟାଗ କରିଛନ୍ତି। ତେବେ କାବୁଲର ୬୬ ବର୍ଷୀୟ ମେୟର ଦାଉଦ ସୁଲତାନଜୋୟ ଏବେ ମଧ୍ୟ ନିଜ ଅଫିସକୁ ଯାଇ କାମ କରୁଛନ୍ତି। ସୁଲତାନଜୋୟ ହେଉଛନ୍ତି ଆମେରିକାର ଜଣେ ପୂର୍ବତନ ନାଗରିକ। ତାଲିବାନ୍ ଶାସନରେ କାବୁଲ ମେୟର ଭାବେ ନିଯୁକ୍ତ ହୋଇଥିବା ନୋମାନିଙ୍କ ସହ ସେ ଅଫିସ ଶେୟାର କରି କାମ କରୁଛନ୍ତି। ତାଲିବାନ୍ କାବୁଲ ଦଖଲ କରିବାର ଦିନକ ପରେ ସୁଲତାନଜୋୟଙ୍କୁ ଯୋଗାଯୋଗ କରିଥିଲା। ସୁରକ୍ଷା ଗ୍ୟାରେଣ୍ଟି ଦେବା ସହ ସେ ନିଜ ପଦବୀରେ ରହି କାମ ଜାରି ରଖନ୍ତୁ ବୋଲି କହିଥିଲା। ତେଣୁ ସୁଲତାନଜୋୟ ମ୍ୟୁନିସିପାଲ ଅଫିସକୁ ଯାଇ ଲୋକଙ୍କ ସେବାରେ ନିଜକୁ ନିୟୋଜିତ କରିଛନ୍ତି। ଏଥିଯୋଗୁ କାବୁଲରେ ଏହା ଭିତରେ ଅନେକ ଘଟଣା ଘଟିଯାଇଥିଲେ ସୁଦ୍ଧା ପରିମଳ ଓ ସଫେଇ ଭଳି ଜରୁରୀ କାମ ଅଟକି ଯାଇନାହିଁ। ପୂର୍ବରୁ ଅଶ୍ରଫ ଗନି ସରକାର ଦରମା ବିଳମ୍ବିତ କରିଥିଲେ ଆଉ ଏବେ କର୍ମଚାରୀଙ୍କୁ ଦରମା ଦେବା ପାଇଁ ତାଲିବାନ୍ ହାତରେ ପାଣ୍ଠି ନାହିଁ। ତେଣୁ ବିନା ଦରମାରେ ୩ ମାସ ହେଲା କାମ କରୁଛନ୍ତି।
୧୯୫୨ ସେପ୍ଟେମ୍ବର ୧୨ରେ କାବୁଲରେ ଜନ୍ମିତ ସୁଲତାନଜୋୟ ୧୯୮୦ ଦଶକ ଆଦ୍ୟଭାଗରେ ସୋଭିଏଟ୍ ୟୁନିୟନ ବିରୋଧରେ ଯୁଦ୍ଧ ଲଢ଼ିଥିଲେ। ଏହା ପୂର୍ବରୁ ସେ ଆମେରିକାର ୟୁନିଭର୍ସିଟି ଅଫ୍ ମିଆମିରେ ପ୍ରଫେସନାଲ ପାଇଲଟ ତାଲିମ ନେଇଥିଲେ। ୨୦୦୧ ସେପ୍ଟେମ୍ବର ୧୧ରେ ଆମେରିକା ପକ୍ଷରୁ ଆଫଗାନିସ୍ତାନ ଉପରେ ଆକ୍ରମଣ ହେବା ପରେ ସେ ଗଜନି ପ୍ରଦେଶକୁ ଫେରିଆସିଥିଲେ। ୨୦୧୪ରେ ସୁଲତାନଜୋୟ ରାଷ୍ଟ୍ରପତି ନିର୍ବାଚନ ଲଢ଼ି ହାରିଯାଇଥିଲେ। ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ପାଇଁ ତାଙ୍କୁ ଆମେରିକାର ନାଗରିକତ୍ୱ ତ୍ୟାଗ କରିବାକୁ ପଡ଼ିଥିଲା। କିନ୍ତୁ ତାଙ୍କ ସ୍ତ୍ରୀ ଓ ପିଲାମାନେ ଏବେ ବି ଆମେରିକା ନାଗରିକ ଥାଇ କାବୁଲରେ ରହୁଛନ୍ତି। ୨୦୨୦ ଏପ୍ରିଲ ୧ରେ ତତ୍କାଳୀନ ରାଷ୍ଟ୍ରପତି ଅଶ୍ରଫ୍ ଗନି ସୁଲତାନଜୋୟଙ୍କୁ କାବୁଲ ମେୟର ନିଯୁକ୍ତ କରିଥିଲେ। ସୁଲତାନଜୋୟଙ୍କ ସ୍ତ୍ରୀ ୧୯୭୨ରେ ମିସ୍ ଆଫଗାନିସ୍ତାନ ମୁକୁଟ ବିଜୟିନୀ ହୋଇଥିଲେ। ତାଲିବାନ୍ ଶାସନରେ କାବୁଲ ମେୟର ଭାବେ କାର୍ଯ୍ୟ ଜାରି ରଖିବା ନିଷ୍ପତ୍ତିକୁ ତାଙ୍କ ପରିବାରର ସମର୍ଥନ ମିଳିଛି।
ଓ୍ବାଲ୍ ଷ୍ଟ୍ରିଟ୍ ଜର୍ନାଲକୁ ଏକ ସାକ୍ଷାତ୍କାରରେ ସୁଲତାନଜୋୟ କହିଛନ୍ତି, ସେ ତାଲିବାନ୍ର ରାଜନୀତିରେ ସମ୍ପୃକ୍ତ ନୁହନ୍ତି। କାବୁଲ ବାସିନ୍ଦାଙ୍କ ପ୍ରତି ନିଜ ଉତ୍ତରଦାୟିତ୍ୱ ତୁଲାଇବା ପାଇଁ ସେ ଅଫିସ ଛାଡ଼ି ନାହାନ୍ତି। ଏହା ଏପରି ଏକ ଦାୟିତ୍ୱ, ଯହିଁରୁ ମୁହଁ ଫେରାଇ ଓହରିଯାଇ ହେବ ନାହିଁ। ତାଲିବାନ୍ମାନଙ୍କୁ ସେ ପସନ୍ଦ କରନ୍ତି ନାହିଁ। ତାଲିବାନ୍କୁ ସାହାଯ୍ୟ କରିଥିବାରୁ ନିଜ ଶାସନକୁ ବୈଧ କରିବାରେ ତାଲିବାନ୍ ସକ୍ଷମ ହୋଇଛି କି ବୋଲି ପ୍ରଶ୍ନ କରାଯିବାରୁ ସୁଲତାନଜୋୟ କହିଛନ୍ତି, ସେ ସାହାଯ୍ୟ କରୁନାହାନ୍ତି। କାବୁଲ ସିଟିର ସେବା କରୁଛନ୍ତି। ତାଲିବାନ୍ ପୂର୍ବାପେକ୍ଷା ଏବେ ସହିଷ୍ଣୁ ହୋଇଯାଇଛି। ସେ ଯାହାଙ୍କୁ ଭେଟିଥିଲେ ସେହି ବ୍ୟକ୍ତିଙ୍କ ଆଚରଣ ଅତ୍ୟନ୍ତ ଭଦ୍ର, ସେ ସବୁ ବୁଝୁଥିଲେ। ନୂଆ ମେୟର ନୋମାନି କହିଛନ୍ତି, ତାଲିବାନ୍କୁ ଦେଶ ଚଳାଇବା ପାଇଁ ସୁଲତାନଜୋୟଙ୍କ ଭଳି ପ୍ରଫେସନାଲଙ୍କ ଦକ୍ଷତା ଦରକାର।
