ପାତ୍ରପୁର,୧୯ା୮(ଉମାଚରଣ ନେପାକ): ପକ୍କା ରାସ୍ତା ନ ଥିବାରୁ ଦୁର୍ଗମ ଅଞ୍ଚଳର ଲୋକଙ୍କ ପାଇଁ ଜରୁରୀକାଳିନ ସ୍ବାସ୍ଥ୍ୟସେବା ସାତସପନ। ଏହାର ଏକ ଦୁଃଖଦ ଚିତ୍ର ପାତ୍ରପୁର ବ୍ଲକ ଆଙ୍କୁଲି ପଞ୍ଚାୟତ ଅନ୍ତର୍ଗତ ଗାଇଡା-ଏ ଗାଁରେ ବୁଧବାର ଦେଖିବାକୁ ମିଳିଛି। ଗାଁକୁ ପକ୍କା ରାସ୍ତା ନଥିବାରୁ ଜଣେ ମହିଳାଙ୍କୁ ପ୍ରାୟ ୩ କିଲୋମିଟର ଭାରରେ ବୋହି ନେବାକୁ ପଡ଼ିଛି। ପରେ ବାଦୁଆ ନିକଟରେ ଆମ୍ବୁଲାନ୍ସରେ ଚଢ଼ାଇ ତାଙ୍କୁ ପାତ୍ରପୁର ଡାକ୍ତରଖାନା ନିଆଯାଇଥିବା ଜଣାପଡ଼ିଛି। ସୂଚନା ଅନୁସାରେ ଗାଇଡ଼ା-ଏ ଗାଁର ପୂର୍ଣ୍ଣଚନ୍ଦ୍ର କାର୍ଯୀଙ୍କ ପତ୍ନୀ ବେଙ୍ଗେଇ କାର୍ଯୀ ଗତ କିଛିଦିନ ଧରି ଅସୁସ୍ଥ ଥିଲେ। ତାଙ୍କ ହାତ ଓ ଗୋଡ଼ ଫୁଲିଯିବା ସହ ଶାରୀରିକ ଦୁର୍ବଳତା ଦେଖାଦେଇଥିଲା। ଅବସ୍ଥା ଅଧିକ ଖରାପ ହେବାରୁ ତାଙ୍କୁ ତୁରନ୍ତ ଡାକ୍ତରଖାନା ନେବା ଆବଶ୍ୟକ ହୋଇଥିଲା। ହେଲେ ଗାଁ ଭିତରକୁ ଆମ୍ବୁଲାନ୍ସ ଯିବା ପାଇଁ ଯୋଗାଯୋଗ ରାସ୍ତା ନ ଥିବାରୁ ଗ୍ରାମବାସୀ ଏକାଠି ହୋଇ ଭାର ପ୍ରସ୍ତୁତ କରିଥିଲେ। ଦୁର୍ଗମ ମାଟି ରାସ୍ତା ଦେଇ ପ୍ରାୟ ୩ କିଲୋମିଟର ମହିଳାଙ୍କୁ ବୋହି ଆଣିବା ପରେ ବାଦୁଆଠାରେ ଆମ୍ବୁଲାନ୍ସ ଯୋଗେ ଡାକ୍ତରଖାନା ପଠାଯାଇଥିଲା। ଗାଁକୁ ପକ୍କା ରାସ୍ତା ନ ଥିବାରୁ କେବଳ ଅସୁସ୍ଥ ରୋଗୀ ନୁହେଁ, ଗର୍ଭବତୀ ମହିଳା, ବୃଦ୍ଧାବୃଦ୍ଧ ଓ ଛୋଟ ପିଲାଙ୍କ ଯାତାୟାତ ମଧ୍ୟ ଅତ୍ୟନ୍ତ କଷ୍ଟକର ହୋଇପଡ଼ିଛି। ବର୍ଷାଦିନରେ ସମସ୍ୟା ଆହୁରି ଗମ୍ଭୀର ହେଉଥିବା ଗ୍ରାମବାସୀ କହିଛନ୍ତି। ଏପରି ଦୃଶ୍ୟ ଗ୍ରାମାଞ୍ଚଳର ବିକାଶ ଓ ମୌଳିକ ସୁବିଧା ପହଞ୍ଚିବା ନେଇ ବଡ଼ ପ୍ରଶ୍ନ ଠିଆ କରିଛି। ଗାଇଡ଼ା ନିକଟସ୍ଥ ଗଡ଼ଙ୍ଗ-ଧୋବାଲିଙ୍ଗି ଅଞ୍ଚଳକୁ ପକ୍କା ରାସ୍ତା ନିର୍ମାଣ ଚାଲିଥିବା ବେଳେ ଗାଇଡ଼ା-ଏ ଗାଁକୁ ମଧ୍ୟ ଏହି ରାସ୍ତା ସହ ସଂଯୋଗ କରାଯାଉ ବୋଲି ଗ୍ରାମବାସୀ ଦାବି କରିଛନ୍ତି। ପ୍ରଶାସନ ଏହି ଘଟଣାକୁ ଗୁରୁତ୍ୱର ସହ ନେଇ ଗାଇଡା-ଏ ଗାଁକୁ ଶୀଘ୍ର ପକ୍କା ରାସ୍ତା ଯୋଗାଇଦେବା ସହ ଜରୁରୀ ସ୍ବାସ୍ଥ୍ୟସେବା ପହଞ୍ଚିବାର ସୁବିଧା କରିବାକୁ ଗ୍ରାମବାସୀ ଦାବି କରିଛନ୍ତି।