ନୟାଗଡ଼,୭ା୮(ଲୋକନାଥ ମିଶ୍ର): ନୟାଗଡ଼ ଜିଲାର ବିଭିନ୍ନ ହୋଟେଲ, ଢ଼ାବା, ରେଷ୍ଟୁରାଣ୍ଟ ଓ ଜଳଖିଆ ଦୋକାନରେ ସୁଆଦିଆ ଖାଦ୍ୟ ନଁାରେ ବାସି, ଅପମିଶ୍ରିତ ଓ ନିମ୍ନମାନର ଖାଦ୍ୟ ବିକ୍ରି ହେଉଥିବା ଅଭିଯୋଗ ହୋଇଆସୁଛି। ଗ୍ରାହକ ଆହାର ବଦଳରେ ଜହର ଖାଇ ରୋଗ କିଣିଛନ୍ତି। ପ୍ରଶାସନର ଧରପଗଡ଼, ନମୁନା ସଂଗ୍ରହ ହେଉ ନ ଥିବାରୁ ଅସାଧୁ ତଥା ଲାଭଖୋର ବ୍ୟବସାୟୀମାନେ ଗ୍ରାହକଙ୍କୁ ଏପରି ନିମ୍ନମାନର ଖାଦ୍ୟ ବିକ୍ରି କରୁଛନ୍ତି।
ଜିଲାରେ ପ୍ରତିଦିନ ନୂଆ ହୋଟେଲ, ଢ଼ାବା, ରେଷ୍ଟୁରାଣ୍ଟ ଓ ଜଳଖିଆ ଦୋକାନ ଖୋଲୁଛି ଓ ବନ୍ଦ ହେଉଛି। ସେଥି ମଧ୍ୟରୁ କିଏ ସ୍ବିକୃତୀପ୍ରାପ୍ତ ଓ କିଏ ଅଣସ୍ବିକୃତୀପ୍ରାପ୍ତ ଗ୍ରାହକ ଜାଣି ପାରୁନାହାନ୍ତି। ଜିଲାର ରଣପୁର, ରାଜସୁନଖଳା, ଦର୍ପନାରାୟଣପୁର, ଚାନ୍ଦପୁର, ଡମସାହି, ଖଣ୍ଡପଡ଼ା, ଖଳିସାହି, କଣ୍ଟିଲୋ, ଓଡ଼ଗଁା, ଶରଣକୁଳ, ଗୋଡିପଡ଼ା, କଜଳାଇପଲୀ, ମଗରବନ୍ଧ, ନୂଆଗଁା, ବାହାଡ଼ାଝୋଲା, ମହୀପୁର, ଦଶପଲ୍ଲା, ବାଣିଗୋଛା, ଗଣିଆ, ଛାମୁଣ୍ଡିଆ, ନୟାଗଡ଼, ଇଟାମାଟି, ପଣ୍ଡୁସର, ବାଲୁଗଁା, ଭାପୁର, ଫତେଗଡ଼, ବାଇଗୁଣିଆ, ବାହାଡ଼ା ଅଞ୍ଚଳରେ ରହିଥିବା ଅଧିକାଂଶ ହୋଟେଲ, ଢ଼ାବା ଓ ଜଳଖିଆ ଦୋକାନରେ ଅପମିଶ୍ରିତ ଓ କମ୍ ଦାମର ତେଲ, ଘିଅରେ ପ୍ରସ୍ତୁତ ଜଳଖିଆ ଏବଂ ଖାଦ୍ୟପଦାର୍ଥ ବିକ୍ରି ଚାଲିଛି। ସେହିପରି ଫାଷ୍ଟଫୁଡ୍ ଦୋକାନରେ ମଧ୍ୟ ଦୂଷିତ ଓ ଅପମିଶ୍ରିତ ଖାଦ୍ୟ ବିକ୍ରି ହେଉଛି। ନୟାଗଡ଼ ସହରରେ ୭ ବଡ଼ ହୋଟେଲ, ୬ ମଧ୍ୟମ ଧରଣର ହୋଟେଲ, ୯ରୁ ଊର୍ଦ୍ଧ୍ୱ ଛୋଟ ହୋଟେଲ, ୧୦ ରେଷ୍ଟୁରାଣ୍ଟ, ୧୬ରୁ ଊର୍ଦ୍ଧ୍ୱ ଫାଷ୍ଟଫୁଡ ଦୋକାନ ରହିଛି। ରାଜ୍ୟର ପ୍ରତ୍ୟେକ ଜିଲାରେ ନିଯୁକ୍ତ ଫୁଡ୍ ସେଫ୍ଟି ଅଫିସର ସେମାନଙ୍କ ଅଞ୍ଚଳରେ ବିକ୍ରି ହେଉଥିବା ଖାଦ୍ୟର ପ୍ରକୃତମାନ ନିରୂପଣ ପାଇଁ ଏହାକୁ ପରୀକ୍ଷାଗାରକୁ ପଠାଇବା ପରେ ୪୦ଦିନ ମଧ୍ୟରେ ରିପୋର୍ଟ ମିଳିବାର ନିୟମ ରହିଛି। ଯଦି କୌଣସି ଜରିଆରେ ଅପମିଶ୍ରଣ ଅଥବା ଦୂଷିତ ଖାଦ୍ୟ ବିକ୍ରି ହେଉଥିବା ପ୍ରମାଣଯୋଗ୍ୟ ରିପୋର୍ଟ ମିଳେ ତେବେ ସରକାରଙ୍କ ପକ୍ଷରୁ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାର ନିୟମ ରହିଛି। କିନ୍ତୁ ଜିଲାରେ ଏହି ଆଇନ ଫାଇଲ ଭିତରେ ରହିଯାଇଛି। ଅନେକସ୍ଥାନରେ ଦୂଷିତ ଜଳ ପିଇବାକୁ ଦିଆଯାଉଥିବା ଲକ୍ଷ୍ୟ କରାଯାଉଛି। ବୁଲା ବିକାଳୀମାନେ ଦହିବରା, ଗୁପଚୁପ ଆଦି ନିମ୍ନମାନର ଖାଦ୍ୟପଦାର୍ଥ ଗଁା ଓ ସହରର ବିଭିନ୍ନ ୱାର୍ଡରେ ବିକ୍ରି କରୁଛନ୍ତି। କାର୍ଯ୍ୟାନୁଷ୍ଠାନ ନ ଥିବାରୁ ବଢ଼ି ଚାଲିଛି ଏପରି ଖାଦ୍ୟ ସାମଗ୍ରୀ ବିକ୍ରି।
ଏନେଇ ନୟାଗଡ଼ର ଗ୍ରାହକ ସଦାଶିବ ସାହୁ, ଭାପୁରର ଗୋଲାପ ଦଳେଇ, ନୂଆଗଁାର ସୀତା ପ୍ରଧାନ କୁହନ୍ତି, ବିଭିନ୍ନ କାମ ନେଇ ଲୋକମାନେ ଜିଲା ସଦର ମହକୁମା, ବ୍ଳକ ସଦର ମହକୁମା, ଏନଏସି, ମ୍ୟୁନିସିପାଲିଟି କାର୍ଯ୍ୟାଳୟ ସହ ବିଭିନ୍ନ ଅଫିସକୁ ଆସୁଛନ୍ତି। ସେହି ଲୋକମାନେ ଖାଉଥିବା ଖାଦ୍ୟ କେତେ ନିରାପଦ ତାହା ଜାଣିବାକୁ ଚେଷ୍ଟା କରି ନ ଥାନ୍ତି। ପୁଣି ରୋଷେଇ ହେଉଥିବା ସ୍ଥାନକୁ ଯିବାକୁ ସେମାନଙ୍କ ପକ୍ଷେ ସମ୍ଭବ ନୁହେଁ। ରୋଷେଇ ଘରକୁ ହୋଟେଲ, ଢ଼ାବା, ଜଳଖିଆ ଦୋକାନୀ ଛାଡି ନ ଥାନ୍ତି। ଏଭଳି ସ୍ଥଳେ ଫୁଡ୍ ସେପ୍ଟି ଅଫିସର ଅଚାନକ ପରିଦର୍ଶନ, ଚଢ଼ାଉ ଜାରି ରଖିଲେ ବ୍ୟବସାୟୀମାନେ ଭୟଭୀତ ହୁଅନ୍ତେ। ତେବେ ସେପରି କିଛି ନ ଥିବାରୁ ଅପମିଶ୍ରଣ, ନିମ୍ନମାନର ଓ ବାସି ଖାଦ୍ୟ ଖାଇଲେ କିଛି କରି ହେଉନି। ଖାଦ୍ୟର ମାନ ସମ୍ପର୍କରେ ପାଟିତୁଣ୍ଡ କଲେ ସୁଫଳ ମିଳୁନି। ବରଂ ଗଣ୍ଡଗୋଳ ଓ ଉତ୍ତେଜନା ସୃଷ୍ଟି ହେଉଛି। ଗ୍ରାହକ ଖାଦ୍ୟର ମାନ ଭଲ ନୁହେଁ ଅଭିଯୋଗ କଲାବେଳକୁ ତାଙ୍କର ଅଭିଯୋଗ ଶୁଣିବାକୁ କେହି ନାହାନ୍ତି। କେଉଁଠି ସେ ଅଭିଯୋଗ କରିବ ସେ ଜାଣି ନ ଥାଆନ୍ତି। ଫୁଡ ସେଫ୍ଟି ଅଫିସର ନବ ସାହୁ କୁହନ୍ତି, ଧରପଗଡ଼ ନମୁନା ସଂଗ୍ରହ ଜାରି ରହିଛି। ଏକାଧିକ ହୋଟେଲ ବିରୋଧରେ ମକଦ୍ଦମା କରାଯାଇଛି। ଆଗାମୀ ଦିନରେ ଚଢ଼ାଉକୁ ତ୍ୱରାନ୍ବିତ କରାଯିବ ବୋଲି କହିଛନ୍ତି। ଜିଲା ଜନ ସ୍ବାସ୍ଥ୍ୟ ଅଧିକାରୀ ପୁଷ୍ପା ନୀଳିମା ଲାକ୍ରା କୁହନ୍ତି ବାସି, ଅପମିଶ୍ରିତ ଓ ନିମ୍ନମାନର ଖାଦ୍ୟ ବିକ୍ରି ହେଉଥିବାର ଅଭିଯୋଗ ଆସୁଥିବାରୁ ଖୁବ ଶୀଘ୍ର ଚଢ଼ାଉ କରାଯାଇ ଆଇନ ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ ନିଆଯିବ।
