ବ୍ରହ୍ମପୁର,୨୦ା୧୦(ନରସିଂହ ସାହୁ): ରାଜ୍ୟରେ ୧୯୫୧-୧୯୫୨ରୁ ୨୦୧୯ ସୁଦ୍ଧା ୧୬ ବିଧାନସଭା ନିର୍ବାଚନ ହୋଇଛି। ବୃହତ୍ତମ ଜିଲା ଗଞ୍ଜାମର ୧୩ ନିର୍ବାଚନମଣ୍ଡଳୀ ମଧ୍ୟରୁ ୫ଟି ଯଥା ଛତ୍ରପୁର, ଗୋପାଳପୁର, ହିଞ୍ଜିଳି, ଭଞ୍ଜନଗର ଓ ପୋଲସରାରୁ ବିଧାୟିକା ନିର୍ବାଚିତ ହୋଇନାହାନ୍ତି। ୨୦୨୪ସାଧାରଣ ନିର୍ବାଚନ ନିକଟତର ହୋଇଛି। ତେଣୁ ଏହି ଆସନଗୁଡ଼ିକରେ ବିଜେଡି ପକ୍ଷରୁ ମହିଳାଙ୍କୁ ପ୍ରାର୍ଥୀ କରାଯିବାକୁ ଦଳର ମହିଳା ସଂଗଠନର ନେତ୍ରୀ ଓ ସକ୍ରିୟ କର୍ମୀଙ୍କ ପକ୍ଷରୁ ଗୁରୁତ୍ୱ ଦିଆଯାଇଛି। ନାମ ଗୋପନ ରଖି କେତେଜଣ ନେତ୍ରୀ କହିଛନ୍ତି, ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଭିନ୍ନ କ୍ଷେତ୍ରରେ ମହିଳାଙ୍କୁ ଗୁରୁତ୍ୱ ଦେଇ ଜାତୀୟ ରାଜନୀତିରେ ଚର୍ଚ୍ଚିତ ହୋଇଛନ୍ତି। ତେଣୁ ସୁଯୋଗ ମିଳିବା ଆଶା ଥିବା କହିଛନ୍ତି।
ଜିଲାର ୮ ନିର୍ବାଚନ ମଣ୍ଡଳୀରେ ବିଭିନ୍ନ ସମୟରେ ଅଣକଂଗ୍ରେସ ଓ କଂଗ୍ରେସରୁ ଲଢ଼ି ମହିଳାମାନେ ବିଧାନସଭାକୁ ନିର୍ବାଚିତ ହୋଇଛନ୍ତି। ନିର୍ବାଚନୀ ତଥ୍ୟ ଅନୁସାରେ ଖଲ୍ଲିକୋଟ ଓ କବିସୂର୍ଯ୍ୟନଗର ଆସନରୁ ସୁଜ୍ଞାନ କୁମାରୀ ଦେଓ ବିଭିନ୍ନ ସମୟରେ ଅଣ କଂଗ୍ରେସ ଦଳରୁ ୯ଥର ବିଧାୟିକା ହୋଇଛନ୍ତି। ଚିକିଟିରୁ ଉଷାଦେବୀ ଜନତା ଦଳ ଓ ବିଜେଡିରୁ ୬ ଥର ଜିତିଛନ୍ତି। ଅତୀତରେ ସୋରଡ଼ାରୁ ଶାନ୍ତି ଦେବୀ, ଆସିକା ଓ ସୋରଡ଼ାରୁ କଂଗ୍ରେସରୁ ଲଢ଼ି ଉଷାରାଣୀ ପଣ୍ଡା ଦୁଇଥର ବିଧାୟିକା ହୋଇଥିଲେ। ୨୦୧୪ ନିର୍ବାଚନରେ ସାନଖେମୁଣ୍ଡିରୁ ନନ୍ଦିନୀ ଦେବୀ ନିର୍ବାଚିତ ହୋଇଥିଲେ। ୧୯୫୭ ନିର୍ବାଚନରେ ବଡ଼ଖେମୁଣ୍ଡି ତଥା ବର୍ତ୍ତମାନର ଦିଗପହଣ୍ଡି କ୍ଷେତ୍ରରୁ ଅନଙ୍ଗ ମଞ୍ଜରୀ ବିଧାୟିକା ହୋଇଥିଲେ। ୨୦୧୯ ନିର୍ବାଚନରେ ସୂର୍ଯ୍ୟମଣି ବୈଦ୍ୟ ଖଲ୍ଲିକୋଟରୁ ଏବଂ କବିସୂର୍ଯ୍ୟନଗରରୁ ଲତିକା ପ୍ରଧାନ ବିଧାୟିକା ହୋଇଛନ୍ତି। ଆସିକାରୁ ମଞ୍ଜୁଳା ସ୍ବାଇଁ ନିର୍ବାଚିତ ହୋଇଛନ୍ତି। ୧୯୭୭ ନିର୍ବାଚନରେ ରତ୍ନମଞ୍ଜରୀ ଦେବୀ ବ୍ରହ୍ମପୁର ବିଧାୟିକା ହୋଇଥିଲେ।
ସୂଚନାଯୋଗ୍ୟ, ଲୋକସଭା ଓ ବିଧାନସଭାରେ ୩୩% ସ୍ଥାନ ମହିଳାଙ୍କ ପାଇଁ ସଂରକ୍ଷଣ ଲାଗି ମୁଖ୍ୟମନ୍ତ୍ରୀ ନବୀନ ପ୍ରଥମେ ପ୍ରସଙ୍ଗ ଉଠାଇଥିଲେ। ଏହାକୁ ସମର୍ଥନ ନିମନ୍ତେ ଅନ୍ୟ ରାଜ୍ୟର ମୁଖ୍ୟମନ୍ତ୍ରୀମାନଙ୍କ ସହଯୋଗ ଲୋଡ଼ିଥିଲେ। ବିଳମ୍ବରେ ହେଲେ ମଧ୍ୟ କେନ୍ଦ୍ରା ଏନଡିଏ ସରକାର ଆଇନ ପ୍ରଣୟନ କରିଛନ୍ତି। ଅନ୍ୟପକ୍ଷରେ ମହିଳା ବିଧାୟିକା ହୋଇ ନ ଥିବା ଉପରୋକ୍ତ ନିର୍ବାଚନ ମଣ୍ଡଳୀ ଗୁଡ଼ିକରୁ ଅନ୍ତତଃପକ୍ଷେ ବିଜେଡି ସୁଯୋଗ ସୃଷ୍ଟି କରିବା ନିମନ୍ତେ ମହିଳା ସଂଗଠନ ଗୁରୁତ୍ୱ ଦେଇଛି।
