ଅସ୍ତରଙ୍ଗ,୧୬।୭(ମମତା ଜେନା)ପୁରୀ ଜିଲା ଅସ୍ତରଙ୍ଗ ସମନ୍ବିତ ଶିଶୁ ବିକାଶ ପ୍ରକଳ୍ପ ଅଧୀନ ଅସ୍ତରଙ୍ଗ ପଞ୍ଚାୟତର ୫ ନମ୍ବର ଅଙ୍ଗନବାଡି କେନ୍ଦ୍ରର ନିଜସ୍ବ ଗୃହ ନାହିଁ। ଫଳରେ ପିଲାମାନେ ପଢାରେ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ପୂର୍ବରୁ ଭଡ଼ା ଘରେ ଅଙ୍ଗନଓ୍ବାଡି କେନ୍ଦ୍ର ଚାଲୁଥିବା ବେଳେ ବର୍ତ୍ତମାନ ଅଙ୍ଗନଓ୍ବାଡି କର୍ମୀଙ୍କ ଘରେ ଚାଲିଛି କେନ୍ଦ୍ର। ଯାହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଥିବା ବେଳେ ତୁରନ୍ତ ଏହି ଅଙ୍ଗନଓ୍ବାଡ଼ି କେନ୍ଦ୍ର ପାଇଁ ନିଜସ୍ବ ଗୃହ ଯୋଗାଇ ଦେବାକୁ ପ୍ରଶାସନ ନିକଟରେ ଦାବି ହେଉଛି। ଏହି ଅଙ୍ଗନଓ୍ବାଡି କେନ୍ଦ୍ରରେ ୧୬ଜଣ ଛାତ୍ରୀଛାତ୍ର ପାଠ ପଢୁଛନ୍ତି। ଦୀର୍ଘ ବର୍ଷ ହେବ ଅଙ୍ଗନଓ୍ବାଡି କେନ୍ଦ୍ରର ନିଜସ୍ବ ଘର ଖଣ୍ଡେ ନାହିଁ। କେନ୍ଦ୍ର ପାଇଁ ଜମି ଚୟନ ହୋଇ ନ ଥିବାରୁ ଏକ ଭଡ଼ା ଘରେ ଅଙ୍ଗନଓ୍ବାଡ଼ି କେନ୍ଦ୍ର ଚାଲୁଥିଲା। କିନ୍ତୁ ପରବର୍ତ୍ତୀ ସମୟରେ କୌଣସି କାରଣକୁ ନେଇ ଭଡ଼ା ଘରେ ମଧ୍ୟ କେନ୍ଦ୍ର ବନ୍ଦ କରାଯାଇଥିଲା। ଫଳରେ ପିଲାଙ୍କ ଶିକ୍ଷାକୁ ଗୁରୁତ୍ୱ ଦେଇ ଅଙ୍ଗନଓ୍ବାଡ଼ି କେନ୍ଦ୍ରରେ ଥିବା କର୍ମୀ ସଂଯୁକ୍ତା ବେହେରା ବେଳେବେଳେ ନିଜ ଘରେ ପିଲାଙ୍କୁ ଡକାଇ ଶିକ୍ଷାଦାନ କରୁଥିବା ଦେଖିବାକୁ ମିଳୁଛି। ଏ ନେଇ ଅଙ୍ଗନଓ୍ବାଡି କର୍ମୀ ସଂଯୁକ୍ତା ବେହେରା କହିଛନ୍ତି, ପୂର୍ବରୁ ଏହି ଅଞ୍ଚଳରେ ଅଙ୍ଗନଓ୍ବାଡ଼ି କେନ୍ଦ୍ର ପାଇଁ ଜାଗା ଚୟନ ହୋଇ ନ ଥିଲା। ଫଳରେ ଏକ ଭଡ଼ା ଘରେ କେନ୍ଦ୍ର ଚାଲୁଥିଲା। କିନ୍ତୁ କିଛିମାସ ପରେ ସେଠାରେ ମଧ୍ୟ କୌଣସି କାରଣରୁ କେନ୍ଦ୍ରକୁ ବନ୍ଦ କରିଦିଆଯାଇଥିଲା। ତେଣୁ ବେଳେବେଳେ ପିଲାଙ୍କୁ ଘରକୁ ଡକାଇ ଶିକ୍ଷାଦାନ କରୁଛି ବୋଲି କହିଛନ୍ତି। କେନ୍ଦ୍ରର ଏକ ପକ୍କାଗୃହ କରିବା ପାଇଁ ବାରମ୍ବାର ପ୍ରଶାସନ ନିକଟରେ ଅଭିଯୋଗ କରିଆସୁଛି। ହେଲେ ଏଥିପ୍ରତି କୌଣସି ପଦକ୍ଷେପ ନିଆଯାଉ ନାହିଁ। ସରକାର ତରଫରୁ ନିର୍ଦ୍ଧିଷ୍ଟ ସ୍ଥାନରେ ଅଙ୍ଗନଓ୍ବାଡି କେନ୍ଦ୍ର ଯଥାଶୀଘ୍ର ନିର୍ମାଣ କରିବା ପାଇଁ ପିଲାମାନଙ୍କ ଅଭିଭାବକ ଓ ସ୍ଥାନୀୟ ୱାର୍ଡ ସଭ୍ୟ ପ୍ରଶାସନ ନିକଟରେ ଦାବି କରିଛନ୍ତି l
