ବାରିପଦା ଅଫିସ,୩୦।୧୨: ଉଚ୍ଚ ନ୍ୟାୟାଳୟଙ୍କ ରାୟକୁ ସରକାର ଅଣଦେଖା କରୁଥିବାରୁ ମୟୂରଭଞ୍ଜ ଜିଲା ଆଞ୍ଚଳିକ ପରିବହନ କାର୍ଯ୍ୟାଳୟ(ଆର୍ଟିଓ)ରେ କାର୍ଯ୍ୟରତ ଡାଟା ଏଣ୍ଟ୍ରି ଅପରେଟର(ସ୍ମାର୍ଟ ଚିପ୍)ଙ୍କ ଭବିଷ୍ୟତକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଫଳରେ ନୂତନ ବର୍ଷର ପ୍ରାରମ୍ଭରୁ ପରିବହନ କାର୍ଯ୍ୟାଳୟରେ ଅଚଳାବସ୍ଥା ଆଶଙ୍କା ଦେଖାଦେଇଛି। ଜିଲା ଆଞ୍ଚଳିକ ପରିବହନ କାର୍ଯ୍ୟାଳୟରେ ଦୀର୍ଘ ୧୫ବର୍ଷ ଧରି ସ୍ମାର୍ଟ ଚିପ୍ ଲିମିଟେଡ଼ ନାମକ ସଂସ୍ଥା ନିରବଚ୍ଛିନ୍ନ ସେବା ଯୋଗାଇ ଆସୁଛି। ୨୦୦୬ରୁ ଅଦ୍ୟାବଧି ଦୈନିକ ୧୦ରୁ ୧୬ ଘଣ୍ଟା ପର୍ଯ୍ୟନ୍ତ ଡାଟା ଏଣ୍ଟ୍ରି ଅପରେଟରମାନେ କାର୍ଯ୍ୟ କରୁଥିଲେ। ଚଳିତ ଡିସେମ୍ବର ମାସ ୩୧ତାରିଖରେ ସରକାରଙ୍କ ସହିତ ଉକ୍ତ କମ୍ପାନୀର ଏଗ୍ରିମେଣ୍ଟ ସରିବାକୁ ଯାଉଛି। ଫଳରେ ଡାଟା ଏଣ୍ଟ୍ରି ଅପରେଟରଙ୍କ ଚାକିରି ନିୟମିତ କରିବା ପାଇଁ ସମସ୍ତେ ଉଚ୍ଚନ୍ୟାୟାଳୟର ଆଶ୍ରୟ ନେଇଥିଲେ। ତଦନୁଯାୟୀ ଗତ ଡିସେମ୍ବର ୨୧ରେ ଉଚ୍ଚ ନ୍ୟାୟାଳୟ ଡବ୍ଲୁପି(ସି) ନଂ. ୯୦୪୪(୨୦୨୦) ଅନୁସାରେ ଉକ୍ତ ଡାଟା ଏଣ୍ଟ୍ରି ଅପରେଟରଙ୍କୁ ଯଥାଶୀଘ୍ର ନିୟମିତ କରିବା ନିମନ୍ତେ ନିର୍ଦ୍ଦେଶ ଦେଇଛନ୍ତି। ମାତ୍ର ସରକାର କୌଣସି ପଦକ୍ଷେପ ନେଇ ନ ଥିବାରୁ ସେମାନଙ୍କ ଭବିଷ୍ୟତ ଅନ୍ଧାର ମଧ୍ୟରେ ରହିିଛି। ପରିବହନ କାର୍ଯ୍ୟାଳୟ କାର୍ଯ୍ୟ ସୁଚାରୁ ରୂପେ ପରିଚାଳନା କରିବା ପାଇଁ ସରକାର ଏଥିପ୍ରତି ଦୃଷ୍ଟି ଦେବାକୁ ଅଞ୍ଚଳବାସୀ ଦାବି କରିଛନ୍ତି।
