ମହାକାଳପଡ଼ା,୧୦।୧୦(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳରେ ତୁର୍କୀ ଚାଷ ପ୍ରତି ବେଶ୍ ଅନୁକୂଳ ବାତାବରଣ ରହିଛି। ବ୍ଲକର ସ୍ଥାନୀୟ ବଉଳକଣି ପଞ୍ଚାୟତର ଟାଙ୍କି ବେଲାରିର ସେକ ସୁଲେମାନ ବର୍ଷେ ପୂର୍ବେ ମୟୂରଭଞ୍ଜ-ଝାଡ଼ଖଣ୍ଡ ସୀମାନ୍ତ ଅଞ୍ଚଳରୁ ତୁର୍କୀ ପକ୍ଷୀ ୪ଟି ଛୁଆ ଆଣିଥିଲେ। ଏହି ଛୁଆ ୧ ବର୍ଷ ମଧ୍ୟରେ ୫ରୁ୬ କିଲୋ ଓଜନ ହୋଇଛି। ଏହି ମାଂସର ବଜାର ମୂଲ୍ୟ ହଜାରରୁ ୧୨ଶହ ଟଙ୍କା ରହିଛି। ସରକାରୀ ପ୍ରୋତ୍ସାହନ ମିଳିଲେ ଅଞ୍ଚଳର ଅନେକ ବେକାର ଯୁବତୀଯୁବକ ଏହି ଚାଷ ପ୍ରତି ମନୋନିବେଶ କରିପାରିବେ ବୋଲି ସେ କହିଛନ୍ତି।
ସାଧାରଣତଃ ଦେଶୀ କୁକୁଡ଼ା ଭଳି ଏମାନେ ଘରର ବାଡ଼ି ବଗିଚାରେ ମିଳୁଥିବା କୀଟ ପତଙ୍ଗକୁ ଖାଦ୍ୟ ରୂପେ ଗ୍ରହଣ କରିଥାନ୍ତି। ଆବଶ୍ୟକ ସ୍ଥଳେ ଘରର ଖୁଦ, ମୁଗ, ମୁଢ଼ି, ଧାନ, ଗହମକୁ ଖାଦ୍ୟ ରୂପେ ଦିଆଯାଇଥାଏ। ଏହାକୁ ଛାଡ଼ି ଦେଲେ ବିଭିନ୍ନ ପ୍ରକାର ତୃଣ ଜାତୀୟ ଉଦ୍ଭିଦକୁ ଖାଦ୍ୟ ରୂପେ ତୁର୍କୀ ପକ୍ଷୀଙ୍କୁ ଦିଆଯାଇଥାଏ। ଏହି ପ୍ରଜାତିର ତୁର୍କୀ ବର୍ଷକୁ ୧୨୦ରୁ ଅଧିକ ଅଣ୍ଡା ଦେଇଥାନ୍ତି। ଦେଶୀ କୁକୁଡ଼ାଠାରୁ ଏମାନଙ୍କ ଅଣ୍ଡାର ଆକାର ୨ ଗୁଣ ବଡ଼ ହୋଇଥାଏ। ୨୮ ଦିନରେ ଉଷୁମ ରହିବା ପରେ ମା’ ତୁର୍କୀ ପକ୍ଷୀ ଶାବକ ଜନ୍ମ ଦେଇଥାଏ। ନିଜର ଶାବକମାନଙ୍କୁ ସୁରକ୍ଷା ଦେବା ପାଇଁ ମା’ ତୁର୍କୀ ପକ୍ଷୀ ଶତ୍ରୁକୁ ଦେଖିଲା ମାତ୍ର ଖୁବ୍ ସତର୍କତା ଅବଲମ୍ବନ କରିବା ସହ ନିଜର ପୁଚ୍ଛକୁ ଫୁଲେଇ ଦେଇ ରାବି ବାକୁ ଲାଗେ। ଫଳରେ ତୁର୍କୀ ପକ୍ଷୀ ପାଳକ ତୁର୍କୀ ପ୍ରତି ବିପଦ ଅଛି ବୋଲି ଜାଣିପାରେ। ଏହାର ଗୋଟେ ବିଶେଷ ଗୁଣ ରହିଛି ବିଷଧର ସରୀସୃପମାନେ ଅଗଣାରେ ପଶିବା ପୂର୍ବରୁ ଏମାନଙ୍କ ସହ ଲଢ଼େଇ କରିଥାନ୍ତି। ବିଶେଷକରି ସରକାରୀସ୍ତରରେ ଯଦି ପକ୍ଷୀ ପାଳକମାନଙ୍କୁ ସମସ୍ତ ପ୍ରକାର ସୁବିଧା ସୁଯୋଗ ଯୋଗାଇ ଦିଆଯାଆନ୍ତା ତେବେ ଚାଷ ପ୍ରତି ଯୁବତୀଯୁବକମାନେ ଆଗ୍ରହ ପ୍ରକାଶ କରି ଆତ୍ମନିର୍ଭରଶୀଳ ହୋଇପାରନ୍ତେ। ପରିବେଶବିତ୍ ସମରେନ୍ଦ୍ର ମାହାଳି କହିଛନ୍ତି, ସାଧାରଣ କୁକୁଡ଼ା ମାଂସଠାରୁ ଏହି ପକ୍ଷୀ ମାଂସର ଅଧିକ ଗୁଣବତ୍ତା ରହିଛି। ଏହାର କିଲୋ ପିଛା ଦର ବଜାର ତୁଳନାରେ ଢେର୍ ଅଧିକ ରହିଛି। ଉପଯୁକ୍ତ ଜଳବାୟୁ,ଉତ୍ତମ ବାତାବରଣ ରହିଛି। ସାମାଜିକ କର୍ମୀ ସୁବାସ ସ୍ବାଇଁ କହିଛନ୍ତି, ଆମ ଅଞ୍ଚଳର ପକ୍ଷୀଚାଷୀମାନଙ୍କୁ ସରକାରୀ ସ୍ତରରେ ପ୍ରୋତ୍ସାହନ ମିଳିଲେ ବ୍ୟାପକ ପକ୍ଷୀ ଚାଷକରି ଭଲ ଦୁଇପଇସା ରୋଜଗାର କରିପାରିବେ। ମହାକାଳପଡ଼ା ପ୍ରାଣୀ ଚିକିତ୍ସକ ଅମରେଶ ସ୍ବାଇଁଙ୍କୁ ପଚାରିବାରେ ଏହି ପକ୍ଷୀ ପାହାଡ ଅଞ୍ଚଳରେ ଦେଖା ଯାଆନ୍ତି। ଏ ଅଞ୍ଚଳରେ ଯଦି ଅଛନ୍ତି ସେଥିପ୍ରତି ଦୃଷ୍ଟି ଦିଆଯିବ। ଏଥିପ୍ରତି କୌଣସି ସରକାରୀ ପ୍ରୋତ୍ସାହନ ନାହିଁ ବୋଲି ସେ କହିଛନ୍ତି।
