ବ୍ରହ୍ମପୁର,୧୯ା୩(ନରସିଂହ ସାହୁ):ଗଞ୍ଜାମ ଜିଲାରେ ୧୩ ବିଧାନସଭା ନିର୍ବାଚନମଣ୍ଡଳୀ ମଧ୍ୟରୁ ୬ ଆସନରୁ ହୋଇନାହାନ୍ତି ମହିଳା ବିଧାୟକ। ସେଗୁଡ଼ିକ ହେଲା ଛତ୍ରପୁର, ଗୋପାଳପୁର, ପୋଲସରା, ହିଞ୍ଜିଳି, ଦିଗପହଣ୍ଡି ଓ ଭଞ୍ଜନଗର। ଅବଶିଷ୍ଟ ୭ କ୍ଷେତ୍ରରୁ ଅଣକଂଗ୍ରେସ ଓ କଂଗ୍ରେସରୁ ସୁଜ୍ଞାନ କୁମାରୀ ଦେଓ ଖଲ୍ଲିକୋଟ ଆସନରୁ ୮ ଥର ଓ କବିସୂର୍ଯ୍ୟନଗରରୁ ୨ ଥର ବିଧାୟିକା ହୋଇଥିଲେ। ୨୦୧୯ ନିର୍ବାଚନରେ ଖଲ୍ଲିକୋଟରୁ ସୂର୍ଯ୍ୟମଣି ବୈଦ୍ୟ ଓ କବିସୂର୍ଯ୍ୟନଗରରୁ ଲତିକା ପ୍ରଧାନ ନିର୍ବାଚିତ ହୋଇଛନ୍ତି। ୧୯୭୭ ନିର୍ବାଚନରେ ବ୍ରହ୍ମପୁର କ୍ଷେତ୍ରରୁ ରତ୍ନ ମଂଜରୀ ଦେବୀ, ଚିକିଟିରୁ ଉଷା ଦେବୀ ୬ ଥର ବିଧାୟିକା ହୋଇଥିବା ବେଳେ ସୋରଡ଼ାରୁ ଶାନ୍ତି ଦେବୀ ଓ ଉଷାରାଣୀ ପଣ୍ଡା ନିର୍ବାଚିତ ହୋଇଥିଲେ। ପରେ ଆସିକାରୁ ପ୍ରଥମେ ଉଷାରାଣୀ ପଣ୍ଡା ଓ ପରେ ମଂଜୁଳା ସ୍ବାଇଁ ବିଧାନସଭାକୁ ଯିବାର ସୁଯୋଗ ପାଇଛନ୍ତି। ସାନଖେମୁ୍ଣ୍ଡିରୁ ୨୦୧୪ ନିର୍ବାଚନରେ ନିର୍ବାଚିତ ହୋଇଥିଲେ ନନ୍ଦିନୀ ଦେବୀ।
ଅବିଭକ୍ତ ଗଞ୍ଜାମ (ଗଜପତି ସହ) ଜିଲାରେ ୧୫ ବିଧାନସଭା କ୍ଷେତ୍ର ଥିଲା। ସୀମା ନିର୍ଦ୍ଧାରଣ ଓ ନିର୍ବାଚନମଣ୍ଡଳୀ ପୁନର୍ଗଠନ ପ୍ରକ୍ରିୟାରେ ଗଞ୍ଜାମରେ ୧୨ ରୁ ୧୩ ଆସନ ହୋଇଥିଲା। ଗଜପତିର ୩ କ୍ଷେତ୍ରରୁ ୨କୁ ଖସିଥିଲା। ପୂର୍ବରୁ ମୋହନା ନିର୍ବାଚନମଣ୍ଡଳୀ ଅନ୍ତର୍ଭୁକ୍ତ ଥିଲା ଦିଗପହଣ୍ଡି ବ୍ଲକ ଓ ଏନ୍ଏସି। ୨୦୦୯ ନିର୍ବାଚନ ବେଳେ ଦିଗପହଣ୍ଡି ବ୍ଲକ ଓ କୁକୁଡ଼ାଖଣ୍ଡି ବ୍ଲକକୁ ନେଇ ଦିଗପହଣ୍ଡି କ୍ଷେତ୍ର ଗଠନ କରାଯାଇଛି। ୧୯୫୭ ନିର୍ବାଚନରେ ବଡ଼ଖେମୁଣ୍ଡି ତଥା ବର୍ତ୍ତମାନର ଦିଗପହଣ୍ଡି ଆସନରୁ ବଡ଼ଖେମୁଣ୍ଡି ରାଣୀ ଅନଙ୍ଗ ମଞ୍ଜରୀ ବିଧାୟିକା ହୋଇଥିବା ତଥ୍ୟ ରହିଛି। ମହିଳାମାନେ ବିଧାନସଭା ଦେଖି ନ ଥିବା ଜିଲାର ୬ ସେଗମେଣ୍ଟକୁ ବିଭିନ୍ନ ଦଳ ଉପେକ୍ଷା କରିଥିବା ଚର୍ଚ୍ଚା ହେଉଛି।
ଆଞ୍ଚଳିକ ଦଳ ବିଜେଡି ବିଭିନ୍ନ କ୍ଷେତ୍ରରେ ମହିଳାଙ୍କୁ ଗୁରୁତ୍ୱ ଦେଉଛି। ସେମାନଙ୍କୁ ଆର୍ଥିକ କ୍ଷେତ୍ରରେ ସ୍ବାବଲମ୍ବୀ କରାଇବାକୁ ଅନେକ ଯୋଜନା ନବୀନ ସରକାରଙ୍କ ପକ୍ଷରୁ କାର୍ଯ୍ୟକାରୀ ହେଉଛି। ଉପରୋକ୍ତ ୬ କ୍ଷେତ୍ରରେ ଅନେକ ମହିଳା ରାଜନୀତିରେ ମଧ୍ୟ ସକ୍ରିୟ ଅଛନ୍ତି। ସେମାନଙ୍କୁ ନିର୍ବାଚନ ଲଢ଼ିବାର ସୁଯୋଗ ମିଳୁ ନ ଥିବା ନାମ ଗୋପନ ରଖି ମହିଳା ବିଜେଡିର ଜଣେ ଟାଣୁଆ ନେତ୍ରୀ କ୍ଷୋଭର ସହ କହିଛନ୍ତି। ୨୦୨୪ ନିର୍ବାଚନ ଲାଗି ପ୍ରମୁଖ ଦଳଗୁଡ଼ିକ ପ୍ରୟାସ କରୁଛନ୍ତି। ବିଜେଡି ମହିଳାଙ୍କ ସଶକ୍ତୀକରଣ ବିଷୟରେ ଅନେକ ପଦକ୍ଷେପ ନେଉଥିବା କହୁଛି। ଏଭଳି ସ୍ଥଳେ ବିଧାୟିକା ହେବାର ସୁଯୋଗ ମିଳି ନ ଥିବା ଜିଲାର ନିର୍ବାଚନମଣ୍ଡଳୀଗୁଡ଼ିକରେ ଆଗାମୀ ନିର୍ବାଚନରେ ମୁଖ୍ୟତଃ ବିଜେଡି ମହିଳା ପ୍ରାର୍ଥୀ ଦେବ ବୋଲି ସେ ଆଶା ରଖିଥିବା ସମ୍ପୃକ୍ତା ନେତ୍ରୀ କହିଛନ୍ତି। ଏଥିସହିତ ଭାଜପା ଓ କଂଗ୍ରେସ ମହିଳାଙ୍କ ଯୋଗଦାନକୁ ଗୁରୁତ୍ୱ ଦେଇ ପଦକ୍ଷେପ ନେଲେ ମହିଳା ବିଧାୟିକାରହିତ ନିର୍ବାଚନମଣ୍ଡଳୀରେ ସନ୍ତୁଳନତା ବଜାୟ ରଖିହୁଅନ୍ତା ବୋଲି ରାଜନୈତିକ ପର୍ଯ୍ୟବେକ୍ଷକମାନେ ମତ ଦେଉଛନ୍ତି।
