ନୂଆଦିଲ୍ଲୀ, ୨।୨ : ଦେଶରେ ଆତଙ୍କବାଦୀ ସଂଗଠନ ତଥା ଏହା ସହ ଜଡିତ ଲୋକଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଦେଶରେ ୪୨ ଆତଙ୍କବାଦୀ ସଂଗଠନ ଚିହ୍ନଟ ହୋଇଛି। ଏକ ଲିଖିତ ପ୍ରଶ୍ନର ଉତ୍ତରରେ ରାଜ୍ୟ ସଭାରେ ସରକାର ଏହି ଉତ୍ତର ଦେଇଛନ୍ତି। ସ୍ବରାଷ୍ଟ୍ର ମନ୍ତ୍ରଣାଳୟ କହିଛି ଯେ ଭାରତରେ ସମୁଦାୟ ୪୨ ଟି ସଂଗଠନକୁ ଆତଙ୍କବାଦୀ ସଂଗଠନ ଭାବେ ନାମିତ କରାଯାଇଛି।
ଏହା ସହିତ ୩୧ ଜଣଙ୍କୁ ୟୁଏପିଏ ସିଡ୍ୟୁଲ୍ ଅନ୍ତର୍ଗତ ରେ ଆତଙ୍କବାଦୀ ଭାବେ ଚିହ୍ନଟ କରାଯାଇଛି। ସେମାନେ କୌଣସି ପ୍ରକାର ଆତଙ୍କବାଦୀ କାର୍ଯ୍ୟକଳାପରେ ଜଡିତ ଥିବା ଜଣାପଡିଛି। ତେବେ ୟୁଏପିଏ ସିଡ୍ୟୁଲ୍କୁ ନେଇ ବିବାଦ ଲାଗି ରହିଛି।
ଏହାର ଅପବ୍ୟବହାର ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କ ଉପରେ ଅଭିଯୋଗ ଅଣାଯାଇଛି। ଆତଙ୍କବାଦୀ ସଂଗଠନ ଏବଂ ଏଭଳି କାର୍ଯ୍ୟକଳାପରେ ଜଡିତ ଲୋକଙ୍କ ବିଷୟରେ ସୂଚନା ଦେବା ବ୍ୟତୀତ ରାଜ୍ୟ ସଭାରେ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ ଦେଶରେ କେତେ ସଂଖ୍ୟକ ଘରୋଇ ସୁରକ୍ଷା ଏଜେନ୍ସି କାର୍ଯ୍ୟ କରୁଛନ୍ତି। କେନ୍ଦ୍ର ସ୍ବରାଷ୍ଟ୍ର ମନ୍ତ୍ରଣାଳୟ ମନ୍ତ୍ରଣାଳୟ କହିଛି ଯେ ୨୦୨୨ ଜାନୁୟାରୀ ୨୮ ସୁଦ୍ଧାରେ ଦେଶରେ ମୋଟ ୧୬,୪୨୭ ଘରୋଇ ସୁରକ୍ଷା ଏଜେନ୍ସି କାର୍ଯ୍ୟ କରୁଛନ୍ତି।
