ବ୍ରହ୍ମପୁର ଅଫିସ,୧୨।୬: କିଛି ଦିନର ନୀରବତା ପରେ ସହରରେ ପୁଣି ଚୋରଙ୍କ ଦୌରାତ୍ମ୍ୟ ଦେଖିବାକୁ ମିଳିଛି। ଏକ ଚୋର ଗ୍ୟାଙ୍ଗ ଶନିବାର ରାତିରେ ଇଞ୍ଜିନିୟରିଂ ସ୍କୁଲ ଛକଠାରେ ଥିବା ଏକାଧିକ ଦୋକାନରୁ ଚୋରି କରି ପୋଲିସକୁ ଖୋଲା ଚାଲେଞ୍ଜ ଦେଇଛନ୍ତି। ଚୋରମାନେ ଦୋକାନ ତାଲା ଭାଙ୍ଗି ଭିତରକୁ ପଶି ନଗଦ ଟଙ୍କା ସହ ବିଭିନ୍ନ ସାମଗ୍ରୀ ନେଇଯାଇଛନ୍ତି। ସେହିପରି ବୈକୁଣ୍ଠନଗରସ୍ଥିତ ଜଣେ ବ୍ୟକ୍ତିଙ୍କ ଘରୁ ଟଙ୍କା ଓ ସୁନା ଅଳଙ୍କାର ଚୋରି ହୋଇଥିବା ନେଇ ଥାନାରେ ଅଭିଯୋଗ ହୋଇଛି।
ଖବରପାଇ ବୈଦ୍ୟନାଥପୁର ଥାନା ପୋଲିସ ସନ୍ଧାନୀ କୁକୁର ସହ ସାଇଣ୍ଟିଫିକ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ପ୍ରକାଶ ଯେ, ଇଞ୍ଜିନିୟରିଂ ସ୍କୁଲ ଛକରେ ଥିବା ଆପୋଲୋ ଫାର୍ମାସୀ ଓ ସାହିଲ ଏଜେନ୍ସି ନାମକ ଏକ ଭେରାଇଟି ଷ୍ଟୋରରୁ ଚୋରି ହୋଇଛି। ଆପୋଲୋ ଫାର୍ମାସୀରୁ ନଗଦ ୫୦ ହଜାର ଟଙ୍କା ସହ ଶିଶୁଙ୍କ ପାଇଁ ଉଦ୍ଦିଷ୍ଟ କିଛି ଖାଦ୍ୟ ପ୍ୟାକେଟ ଚୋରି ହୋଇଛି। ଚୋର ଗ୍ୟାଙ୍ଗ ଶନିବାର ରାତି ୨ଟା ୪୫ରେ ଦୋକାନ ତାଲା ଭାଙ୍ଗି ଭିତରକୁ ପଶିଥିବା ସିସିଟିଭି ଫୁଟେଜରୁ ଦେଖିବାକୁ ମିଳିଛି। ଏହାପରେ ସେମାନେ କିଛି ଦୂରରେ ଥିବା ସାହିଲ ଏଜେନ୍ସିର ତାଲା ଭାଙ୍ଗି ତେଲ ବୋତଲ, ଟ୍ରାକ୍ସୁଟ, ବ୍ୟାଗ୍ ଆଦି ଜିନିଷ ଚୋରି କରି ନେଇଛନ୍ତି। ଏହି ଦୁଇ ଦୋକାନ ନିକଟରେ ଥିବା ରାଜ ବାର୍ ଓ ଏକ ଔଷଧ ଦୋକାନରୁ ଚୋରି ଉଦ୍ୟମ ହୋଇଥିଲେ ମଧ୍ୟ ଚୋର ଦଳ ସେଥିରେ ସଫଳ ହୋଇପାରି ନ ଥିଲେ। ସକାଳେ ସ୍ଥାନୀୟ ଲୋକେ ଦୋକାନ ତାଲା ଭଙ୍ଗା ଯାଇଥିବା ଦେଖି ଦୋକାନ ମାଲିକଙ୍କୁ ସୂଚନା ଦେଇଥିଲେ। ଦୋକାନ ମାଲିକ ପହଞ୍ଚି ବୈଦ୍ୟନାଥପୁର ଥାନା ପୋଲିସକୁ ଘଟଣା ସମ୍ପର୍କରେ ଜଣାଇଥିଲେ। ପରେ ପୋଲିସ ଘଟଣାସ୍ଥଳରେ ପହଞ୍ଚି ଅଞ୍ଚଳରେ ଲାଗିଥିବା ସିସିଟିଭି ଫୁଟେଜ ସଂଗ୍ରହ କରିବା ସହ ସନ୍ଧାନୀ କୁକୁର ଓ ସାଇଣ୍ଟିଫିକ ଟିମ୍ ସହାୟତାରେ ତଦନ୍ତ ଆରମ୍ଭ କରିଥିଲା।
ସେହିପରି ବୈକୁଣ୍ଠନଗରସ୍ଥିତ ଏକ ବସ୍ତିରେ ରହୁଥିବା ଜଣେ ବ୍ୟକ୍ତିଙ୍କ ଘରୁ ମଧ୍ୟ ୫୦ ହଜାର ସହ କିଛି ସୁନା ଅଳଙ୍କାର ଚୋରି ହୋଇଥିବା ଅଭିଯୋଗ ହୋଇଛି। ସୂଚନାଯୋଗ୍ୟ, ୧୫ ଦିନ ତଳେ ଇଞ୍ଜିନିୟରିଂ ସ୍କୁଲ ଛକଠାରେ ଥିବା ସାହିଲ ଏଜେନ୍ସିରୁ ନଗଦ ଟଙ୍କା ଓ ସାମଗ୍ରୀ ଚୋରି ହୋଇଥିଲା। ୨ ସପ୍ତାହ ମଧ୍ୟରେ ସାହିଲ ଏଜେନ୍ସିରୁ ଦ୍ୱିତୀୟ ଥର ଚୋରି ହୋଇଥିବାରୁ ମାଲିକ ସମ୍ପୂର୍ଣ୍ଣ ଭାଙ୍ଗି ପଡିଛନ୍ତି। ଅଞ୍ଚଳରେ ପୋଲିସ ପାଟ୍ରୋଲିଂ କଡାକଡା କରାଯାଉ ନ ଥିବାରୁ ଚୋରି ବଢ଼ିବାରେ ଲାଗିଛି ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି।
