ବଇଣ୍ଡା,୧୦।୧(ଡି.ଏନ.ଏ.): ଅନୁଗୋଳ ଜିଲା ହଣ୍ଡପା ଥାନା ଅଞ୍ଚଳରେ ବଢ଼ୁଛି ଚୋରି। ଠିକ୍ ଭାବେ ପାଟ୍ରୋଲିଂ କରାଯାଉ ନ ଥିବାରୁ ବିଳମ୍ବିତ ରାତିରେ ଦୁର୍ବୃତ୍ତମାନେ ବ୍ୟବସାୟିକ ପ୍ରତିଷ୍ଠାନ, ବ୍ୟାଙ୍କ ଆଦିକୁ ଟାର୍ଗେଟ୍ କରୁଥିବା ଅଭିଯୋଗ ହେଉଛି। ଗତ ୧୪ ଦିନ ମଧ୍ୟରେ ୧୨ଟି ସ୍ଥାନରୁ ଚୋରି ହୋଇଥିଲେ ହେଁ ପୋଲିସ ଦୁର୍ବୃତ୍ତମାନଙ୍କୁ ଧରିପାରୁ ନାହିଁ କି ଚୋରି ସାମଗ୍ରୀ ଉଦ୍ଧାର କରିପାରୁ ନାହିଁ। ଏହାକୁ ନେଇ ଚିନ୍ତାରେ ପଡ଼ିଛନ୍ତି ବ୍ୟବସାୟୀ।
ହଣ୍ଡପା ଥାନା ଅଞ୍ଚଳରେ ଥିବା ବଇଣ୍ଡା ଏକ ବ୍ୟବସାୟିକ ପେଣ୍ଠସ୍ଥଳ। ୫୫ନଂ. ଜାତୀୟ ରାଜପଥ ପାର୍ଶ୍ୱରେ ଥିବା ଏହି ବଜାରରେ ରହିଛି ୩ଟି ବ୍ୟାଙ୍କ, ଗୋଟିଏ ସେବା ସମବାୟ ସମିତି, ଗୋଟିଏ ପୋଷ୍ଟ ଅଫିସ, ୨ଟି ଗ୍ରାହକ ସେବା କେନ୍ଦ୍ର, ୫ଟି ଏଟିଏମ୍। ସରକାରୀ ଓ ବେସରକାରୀ କାର୍ଯ୍ୟାଳୟଗୁଡ଼ିକ ସହ ଶତାଧିକ ବ୍ୟବସାୟିକ ପ୍ରତିଷ୍ଠାନ ଓ ରେଳ ଷ୍ଟେଶନ ଯୋଗୁ ଆଠମଲ୍ଲିକ ଉପଖଣ୍ଡର ଏହା ଏକ ଗୁରୁତ୍ୱପୂର୍ଣ୍ଣ ଅଞ୍ଚଳ ଭାବେ ଜଣାଶୁଣା। ହେଲେ ଏଠାରେ ସୁରକ୍ଷା ବ୍ୟବସ୍ଥା ଠିକ୍ ନ ଥିବା ବଇଣ୍ଡା ଗ୍ରାମବାସୀ ଅଭିଯୋଗ କରୁଛନ୍ତି। ହଣ୍ଡପା ଥାନା ବ୍ୟତୀତ ବଇଣ୍ଡାରେ ଏକ ଫାଣ୍ଡି ଥିଲେ ମଧ୍ୟ କିଛିଦିନ ହେଲା ଏହି ଅଞ୍ଚଳରେ ଚୋରି ବୃଦ୍ଧି ପାଉଛି। ଗତ ଡିସେମ୍ବର ୨୬ରେ ଲୁହାମୁଣ୍ଡାଠାରେ ଏକ ସୁନା ଦୋକାନରୁ ଲକ୍ଷାଧିକ ଟଙ୍କାର ଗହଣା ଚୋରି ହୋଇଥିଲା। ୨୭ ତାରିଖରେ ନାକିଚି ଅଞ୍ଚଳର ୭ଟି ଦୋକାନରୁ ଲକ୍ଷାଧିକ ଟଙ୍କାର ସାମଗ୍ରୀ ଚୋରି ହୋଇଥିଲା। ସେହି ରାତିରେ ଗଦେଇମୁଣ୍ଡା ଗ୍ରାମର ମେନକା ସେନାପତିଙ୍କ ଘରୁ ୧ ଲକ୍ଷ ଟଙ୍କା ଚୋରି ହୋଇଥିଲା। ଜାନୁୟାରୀ ୩ରେ ଶରଧାମୁଣ୍ଡା ପ୍ରାଥମିକ ବିଦ୍ୟାଳୟରୁ ଚୋରି ହୋଇଥିଲା। ୬ ତାରିଖ ରାତିରେ ବଇଣ୍ଡାସ୍ଥିତ ଅନୁଗୋଳ ସଂଯୁକ୍ତ ସମବାୟ ବ୍ୟାଙ୍କରୁ ୮ ଲକ୍ଷ ୯୧ ହଜାର ୧ ଟଙ୍କା ଚୋରି ହୋଇଛି। ଥାନାରେ ମାମଲା ବଢ଼ୁଥିଲେ ବି ପୋଲିସ ଦୁର୍ବୃତ୍ତମାନଙ୍କୁ ଧରିବାରେ ବିଫଳ ହେଉଛି। ବଇଣ୍ଡା ଫାଣ୍ଡିକୁ ଥାନାରେ ପରିଣତ କରିବା ପାଇଁ ବଇଣ୍ଡା ଗ୍ରାମବାସୀ ୧୫ ଅକ୍ଟୋବର ୨୦୧୮ ଓ ୧୨ ଜାନୁୟାରୀ ୨୦୨୦ରେ ରାଜ୍ୟ ଗୃହ ବିଭାଗ ସଚିବ, ପୋଲିସ ଡିଜି, ମୁଖ୍ୟମନ୍ତ୍ରୀଙ୍କୁ ଅଭିଯୋଗ କରିଥିଲେ। ହେଲେ ଏଯାଏ ପଦକ୍ଷେପ ନିଆଯାଇ ନାହିଁ।
ସ୍ବତନ୍ତ୍ର ଟିମ୍ ଗଠନ କରାଯାଇଛି
ହଣ୍ଡପା ଥାନା ଅଞ୍ଚଳରେ ଚୋରି ରୋକିବା ଓ ଦୁର୍ବୃତ୍ତମାନଙ୍କୁ ଧରିବାକୁ କିଶୋରନଗର ଏବଂ ହଣ୍ଡପା ପୋଲିସ ପକ୍ଷରୁ ସ୍ବତନ୍ତ୍ର ଟିମ୍ ଗଠନ କରାଯାଇଛି। ବିଭିନ୍ନ ଅଞ୍ଚଳରେ ଚଢ଼ାଉ ଚାଲିଛି। ଚୋରି ସାମଗ୍ରୀ ଉଦ୍ଧାର ପାଇଁ ପଦକ୍ଷେପ ନିଆଯାଉଛି।
-ଚିନ୍ତାମଣି ପ୍ରଧାନ, ଏସ୍ଡିପିଓ, ଆଠମଲ୍ଲିକ
ନାକିଚିରେ ଫାଣ୍ଡି ସ୍ଥାପନ ହେଉ
ନାକିଚି ଅଞ୍ଚଳରୁ ଗୋଟିଏ ରାତିରେ ୭ଟି ଦୋକାନରୁ ଚୋରି ହେଲା। ହେଲେ ପୋଲିସ ଏଯାଏ ଦୁର୍ବୃତ୍ତମାନଙ୍କୁ ଧରିପାରି ନାହିଁ। ଏ ନେଇ ବ୍ୟବସାୟୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ନାକିଚି ଅଞ୍ଚଳରେ ଫାଣ୍ଡି ସ୍ଥାପନ କରାଯାଉ।
-ଗରକି ଦେଓ, ନାକିଚି
ବଜାରରେ ପୋଲିସ ମୁତୟନ ହେଉ
ବଇଣ୍ଡା ଏକ ବ୍ୟବସାୟିକ କେନ୍ଦ୍ର ହୋଇଥିବାରୁ ବାରମ୍ବାର ଚୋରି ବ୍ୟବସାୟୀଙ୍କ ମଧ୍ୟରେ ଭୟ ବଢ଼ାଇ ଦେଇଛି। ପୋଲିସ ତୁରନ୍ତ ପାଟ୍ରୋଲିଂ ବ୍ୟବସ୍ଥାକୁ କଡାକଡ଼ି କରିବା ସହ ବଜାରର ସୁରକ୍ଷା ପାଇଁ ୫ ଜଣ ହୋମଗାର୍ଡଙ୍କୁ ରାତିରେ ମୁତୟନ କରାଯାଉ।
-ପ୍ରବୀଣ କୁମାର ସାହୁ, ସଭାପତି, ବଇଣ୍ଡା ବଜାର କମିଟି
