ଅନୁଗୋଳ ଅଫିସ, ୧୬।୫: ରାତିରେ ଦାମୀ ଘର ଦେଖି କରାଯାଉଛି ଟାର୍ଗେଟ୍। ଏପରି କି ଘର ଲୋକ ଥିଲେ ମଧ୍ୟ କୌଶଳ କରି କଳାକନା ବୁଲାଇ ଦେଉଛନ୍ତି ଦୁର୍ବୃତ୍ତ। ସେହିପରି ଦିନରେ ସହର ବଜାରରେ ବୁଲି ଦୁର୍ବୃତ୍ତମାନେ ବ୍ୟାଙ୍କ ଓ ବେପାରରୁ ଫେରୁଥିବା ଲୋକଙ୍କଠାରୁ ଲୁଟ୍ପାଟ କରୁଛନ୍ତି। ଟଙ୍କା ବ୍ୟାଗ ଝାମ୍ପି ନେଇ ଆଖି ପିଛୁଳାକେ ଫେରାର ହୋଇଯାଉଛନ୍ତି। କେହି ପ୍ରତିରୋଧ କଲେ ଆକ୍ରମଣ କରିବାକୁ ଏମାନେ ପଛାଉନାହାନ୍ତି। କିଛିଦିନ ହେଲା ଅନୁଗୋଳ ସହର ସମେତ ଜିଲାର ବିଭିନ୍ନ ଥାନା ଅଞ୍ଚଳରେ ଏପରି ଆପରାଧିକ କାର୍ଯ୍ୟ ବଢ଼ିଚାଲିଥିବାରୁ ସାଧାରଣରେ ଅସନ୍ତୋଷ ଦେଖାଦେଇଛି। ଗତ ମାସକ ମଧ୍ୟରେ କେବଳ ଅନୁଗୋଳ ସହରରେ ୫ରୁ ଊର୍ଦ୍ଧ୍ୱ ଛୋଟ ବଡ଼ ଚୋରି ହୋଇଥିବା ଥାନାରେ ଅଭିଯୋଗ ହୋଇଛି।
ଅନୁଗୋଳ ଜିଲା ପ୍ରାଣୀ ଚିକିତ୍ସା ଅଧିକାରୀଙ୍କ କାର୍ଯ୍ୟାଳୟରୁ ଏପ୍ରିଲ ୧୨ ତାରିଖରେ ଏୟାର କଣ୍ଡିଶନର ସହ ଅନ୍ୟାନ୍ୟ ମୂଲ୍ୟବାନ ସାମଗ୍ରୀ ଚୋରି ହୋଇଥିଲା। ସେହିପରି ଏପ୍ରିଲ ୧୯ରେ ତାଳଚେର ଥାନା ଅଧୀନ ଏକ ବ୍ୟାଙ୍କରୁ ଟଙ୍କା ନେଇ ଆସୁଥିବା ଅବସରପ୍ରାପ୍ତ ଶିକ୍ଷକ ଦୁର୍ଗାପ୍ରସାଦ ରଥଙ୍କ ବାଇକ୍ ଡିକି ଭାଙ୍ଗି ହାଟତୋଟା ନିକଟରୁ ୩ ଲକ୍ଷ ଟଙ୍କା ଧରି ଦୁର୍ବୃତ୍ତମାନେ ଚମ୍ପଟ ମାରିଥିଲେ। ରେଙ୍ଗାଳି ଥାନା ବଜ୍ରକୋଟ ହାଟ ନିକଟରୁ ଗୁଣ୍ଡୁରି ଗ୍ରାମର ସୁଶାନ୍ତ ନନ୍ଦଙ୍କ ବାଇକ୍ ଡିକି ଭାଙ୍ଗି ୧ ଲକ୍ଷ ୮ ହଜାର ଟଙ୍କା ନେଇଯାଇଥିଲେ। ହେମସୁରପଡ଼ାର ରଞ୍ଜନ ଦେହୁରୀଙ୍କ ଘରେ କେହି ନ ଥିବାବେଳେ ଦୁର୍ବୃତ୍ତମାନେ ସୁନା, ରୁପା ସହ ନଗଦ ଟଙ୍କା ଚୋରି କରିଥିଲେ। ଅନୁଗୋଳ ଡିଆଇସି ଛକରେ ରହୁଥିବା ସନ୍ଧ୍ୟାରାଣୀ ଦାସଙ୍କ ଘରେ ଗତ ଶୁକ୍ରବାର ରାତିରେ ଦୁର୍ବୃତ୍ତମାନେ ପଶି ଲକ୍ଷାଧିକ ଟଙ୍କାର ସୁନା, ରୁପା ଓ ନଗଦ ୩୦ ହଜାର ଟଙ୍କା ଚୋରି କରିଥିଲେ। ୧୩ ତାରିଖରେ ମହୀଧରପୁର ହାଟ ସାରି ଫେରୁଥିବା କଞ୍ଜରା ଗ୍ରାମର କ୍ଷୀରୋଦ ପ୍ରଧାନଙ୍କ ମୁଣ୍ଡରେ ବନ୍ଧୁକ ଲଗାଇ ଟଙ୍କା ଲୁଟ୍ କରାଯାଇଥିଲା। ବିକ୍ରମପୁର ଥାନା ଅଧୀନରେ ଥିବା ଏକ ସିମେଣ୍ଟ ଫ୍ୟାକ୍ଟ୍ରି ଓ ନିର୍ମାଣାଧୀନ ଘରୁ ଚୋରି ହୋଇଥିଲା। ନାଲ୍କୋ ଓ ବଅଁରପାଳ ଥାନା ଅଞ୍ଚଳରୁ ମଧ୍ୟ ଚୋରି ବଢ଼ୁଥିବା ଅଭିଯୋଗ ହେଉଛି। ପୋଲିସକୁ ଖୋଲା ଚ୍ୟାଲେଞ୍ଜ ଦେଇ ଦୁର୍ବୃତ୍ତମାନେ ଜିଲାର ବିଭିନ୍ନ ଅଞ୍ଚଳରେ ଆପରାଧିକ କାର୍ଯ୍ୟ ଚଳାଇଥିବା ବେଳେ ତାହାକୁ ରୋକିବାରେ ପୋଲିସର ବିଫଳତା ଅସନ୍ତୋଷର କାରଣ ହୋଇଛି।
ସାଧାରଣ ଲୋକଙ୍କୁ ନ୍ୟାୟ ମିଳୁନାହିଁ
ପୋଲିସ ବିଭାଗର ଅନେକ କର୍ମଚାରୀ ନିଜ କ୍ଷମତାର ଅପବ୍ୟବହାର କରୁଛନ୍ତି। ନିଜ ସମ୍ପତ୍ତି ବୃଦ୍ଧିରେ ବ୍ୟସ୍ତ ରହୁଛନ୍ତି। କେବଳ ଏଥିପାଇଁ ସାଧାରଣ ଲୋକମାନେ ନ୍ୟାୟ ପାଇପାରୁନାହାନ୍ତି। ସ୍ବଚ୍ଛ ଭାବମୂର୍ତ୍ତି ସହ କର୍ତ୍ତବ୍ୟକୁ ଗୁରୁତ୍ୱ ଦେଲେ ଜିଲାରେ ଆଇନ ଶୃଙ୍ଖଳା ନିୟନ୍ତ୍ରଣରେ ରହିବ।
-ରଞ୍ଜନ ପାତ୍ର, ଅନୁଗୋଳ
ହୁଗୁଳା ପାଟ୍ରୋଲିଂ ଦାୟୀ
ପୂର୍ବରୁ ଅନୁଗୋଳର ଦୁଇଟି ବ୍ୟାଙ୍କରୁ ଡକାୟତି ହୋଇଛି। ଏଟିଏମ୍ରୁ ମଧ୍ୟ ଲୁଟ ଉଦ୍ୟମ ହୋଇଛି। ଚଳିତମାସରେ ହେମସୁରପଡ଼ାର ଦୁଇଟି ସ୍ଥାନରେ ଦୁର୍ବୃତ୍ତମାନେ ଘରେ କଳାକନା ବୁଲାଇ ଦେଇଛନ୍ତି। ପୋଲିସର ପାଟ୍ରୋଲିଂ ବ୍ୟବସ୍ଥା ହୁଗୁଳା ପାଇଁ ଏଭଳି ଚୋରି ଓ ଲୁଟ୍ ବଢ଼ିଚାଲିଛି।
-ଦିବ୍ୟରଞ୍ଜନ ଦାସ, ଅନୁଗୋଳ
ସ୍ପେଶାଲ ସ୍କ୍ବାଡ୍ ନିଷ୍କ୍ରିୟ
ଅନୁଗୋଳ ସହରରେ ଆଇନ ଶୃଙ୍ଖଳା ବ୍ୟବସ୍ଥା ହୁଗୁଳା ହୋଇପଡିଛି। କଡାକଡି ପାଟ୍ରୋଲିଂ କରାଯାଉନାହିଁ। ଏଭଳି କି ଏସ୍ପିଙ୍କ ଦ୍ୱାରା ଗଢ଼ାଯାଇଥିବା ସ୍ପେଶାଲ ସ୍କ୍ବାଡ୍ ମଧ୍ୟ ଏକପ୍ରକାର ନିଷ୍କ୍ରିୟ ହୋଇଯାଇଛି। ଫଳରେ ଆପରାଧିକ କାର୍ଯ୍ୟକଳାପ ବୃଦ୍ଧି ପାଇବା ସହ ଅପରାଧୀମାନେ ସକ୍ରିୟ ହୋଇଯାଇଛନ୍ତି।
-ଦିବ୍ୟଦର୍ଶୀ ବଳିଆରସିଂହ, ଆଇନଜୀବୀ
