ଶଙ୍କରାଖୋଲ,୯ା୭(ଡି.ଏନ୍.ଏ.)- ଚକାପାଦ ବ୍ଲକ ବେହେରାଗଁା ପଞ୍ଚାୟତ ସୁନାପାଙ୍ଗା ଗ୍ରାମର ମନୀତା ମଲିକ(୨୭)ଙ୍କ ସଙ୍ଗରୋଧ କେନ୍ଦ୍ରରୁ ଫେରିବାର ମାସକ ପରେ ବୁଧବାର ସକାଳେ ମୃତ୍ୟୁ ଘଟିଛି। ବ୍ରାହ୍ମଣପାଦ ସ୍ବାସ୍ଥ୍ୟ କେନ୍ଦ୍ର ଆୟୁଷ ଡାକ୍ତର ସନ୍ତୋଷ କୁମାର ପଟ୍ଟନାୟକ, ଏଲ୍ଏଚ୍ବି ସରୋଜିନୀ ପ୍ରଧାନ, ସ୍ବାସ୍ଥ୍ୟକର୍ମୀ ପ୍ରମୁଖ ପହଞ୍ଚତ୍ ଅନୁଧ୍ୟାନ କରିବା ପରେ କୌଣସି କରୋନା ଲକ୍ଷଣ ନଥିବା କହିଛନ୍ତି। ସାହିଭାଇ ନ ଆସିବାରୁ ପରିବାର ଲୋକେ ମୃତଦେହ ସଂସ୍କାର କରିଥିଲେ। ତାଙ୍କ ପରିବାର ସହ କେତେଜଣ ଗ୍ରାମବାସୀଙ୍କର ସ୍ବାବ୍ ନମୂନା ସଂଗ୍ରହ କରାଯିବ ବୋଲି ଆୟୁଷ ଡାକ୍ତର ପଟ୍ଟନାୟକ କହିଛନ୍ତି। ଯୁବତୀ ଜଣକ ୨୨ ମେ’ରେ ତାମିଲନାଡୁରୁ ଫେରି ଫୁଲବାଣୀ ନବୋଦୟ ବିଦ୍ୟାଳୟସ୍ଥିତ ସଙ୍ଗରୋଧ କେନ୍ଦ୍ରରେ ଥିଲେ। ୧୪ଦିନ ରହିବା ପରେ ଘରକୁ ଫେରିଥିଲେ। ବୁଧବାର ସକାଳୁ ମା’ଙ୍କ ସହ ଶୌଚ ପାଇଁ ବାହାରକୁ ଯାଇ ଫେରିବା ପରେ ହଠାତ୍ ଅସୁସ୍ଥ ହୋଇ ପଡିଥିଲେ। ତାଙ୍କୁ ଟିକାବାଲି ମେଡିକାଲ ନେବାବେଳେ ବାଟରେ ମୃତ୍ୟୁ ଘଟିଥିଲା। ଘରକୁ ଫେରି ଟିକାବାଲି ପୋଲିସକୁ ତାଙ୍କ ଭାଇ ଜଣାଇବା ପରେ ମୃତଦେହ ସଂସ୍କାର କରାଯାଇଥିଲା।
