ସଜନାଗଡ଼,୨୫।୪(ଡି.ଏନ.ଏ.): ବାଲେଶ୍ୱର ଜିଲା ନୀଳଗିରି ବଜାରରେ ସୋମବାର ଅପରାହ୍ନରେ ଜଣେ ଯୁବକ ଉନ୍ମତ୍ତକାଣ୍ଡ ଘଟାଇଛନ୍ତି। ସେହିବାଟ ଦେଇ ଯାଉଥିବା ବିଡିଓଙ୍କ ସରକାରୀ ଗାଡିକୁ ସେ ଭଙ୍ଗାରୁଜା କରିବା ସହ ଅନେକ ବାଇକ୍ ଆରୋହୀଙ୍କୁ ମାର୍ପିଟ୍ କରି ଗାଡି ଭଙ୍ଗାରୁଜା କରିଛନ୍ତି। ସ୍ଥାନୀୟ ଲୋକେ ଅଟକାଇବାକୁ ଯାଇ ଆକ୍ରମଣର ଶିକାର ହୋଇଛନ୍ତି। ବଜାର ଅଞ୍ଚଳରେ ଏକ ଭୟର ବାତାବରଣ ସୃଷ୍ଟି ହୋଇଥିବା ଖବରପାଇ ନୀଳଗିରି ଥାନା ପୋଲିସ ପହଞ୍ଚିଥିଲେ ମଧ୍ୟ ଯୁବକଜଣକ ଥାନା ଏଏସ୍ଆଇ ଅନନ୍ତ ମୁର୍ମୁ ଓ କନଷ୍ଟେବଳ ଚିତ୍ତରଞ୍ଜନ ନାୟକଙ୍କୁ ଆକ୍ରମଣ କରି ଆହତ କରିଥିଲେ। ଶେଷରେ ଥାନା ଭାରପ୍ରାପ୍ତ ଅଧିକାରୀ ବିରଞ୍ଚତ୍ ନାରାୟଣ ସାହୁ ସଦଳବଳେ ପହଞ୍ଚତ୍ ତାଙ୍କୁ କାବୁ କରି ନୀଳଗିରି ମେଡ଼ିକାଲରେ ଭର୍ତ୍ତି କରିଛନ୍ତି।
ସୂଚନା ଅନୁଯାୟୀ, କାହାଳିଆ (ଚକ୍ରଧରପୁର ଶାସନ) ଗ୍ରାମର ସମୀର କୁମାର ପଣ୍ଡା (୩୫) ଦୁର୍ଗାମଣ୍ଡପଠାରେ ଥିବା ଏକ ଗ୍ରୋସେରୀ ଦୋକାନ କରିଛନ୍ତି। ଅପରାହ୍ନ ସମୟରେ ସେ ଦୋକାନରେ ବସିଥିବା ବେଳେ ହଠାତ୍ ବାହାରକୁ ପଳାଇ ଆସି ଯାତୟାତ କରୁଥିବା ଲୋକଙ୍କୁ ଭୟଭୀତ କରି ଆକ୍ରମଣ ଆରମ୍ଭ କରିଦେଇଥିଲେ। ସେହି ସମୟରେ ବିଡିଓଙ୍କ ସରକାରୀ ଗାଡି ଆସୁଥିବା ବେଳେ ସମୀର ହଠାତ୍ ଗାଡି ଆଗକୁ ଯାଇ ନିଜ ହାତରେ ଆଗ କାଚକୁ ଭାଙ୍ଗିଦେଇଥିଲେ। ସେହି ଗାଡିରେ ବିଡିଓ ନ ଥିବା ବେଳେ ଡ୍ରାଇଭର ଅଳ୍ପକେ ବର୍ତ୍ତି ଯାଇଥିଲେ। ସେହି ରାସ୍ତାରେ ଯାଉଥିବା କାହାରିକୁ ସେ ଛାଡି ନ ଥିଲେ। ଗୋଡାଇ ଗୋଡାଇ ବାଇକ ଆରୋହୀଙ୍କୁ ଅଟକାଇବା ସହ ମାରପିଟ୍ କରି ଗାଡି ବାଇକ୍ ଭଙ୍ଗାରୁଜା କରିଥିଲା। ଘଟଣାସ୍ଥଳରେ ପୋଲିସ ପହଞ୍ଚିଯିବାରୁ ସମୀର ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ପୋଲିସ ଗାଡ଼ିକୁ ମୁଣ୍ଡରେ ପିଟି ପିଟି ଆଗ ଓ ସାଇଡ୍ କାଚକୁ ଚୁରମାର୍ କରିଥିଲେ।
