ଅଙ୍କାରା, ୬।୧୧: ତୁର୍କୀର ରୁମେୟସା ଗେଲ୍ଗିଙ୍କ ଉଚ୍ଚତା ୭ ଫୁଟ୍ ୭ ଇଞ୍ଚ (୨୧୫.୧୬ ସେଣ୍ଟିମିଟର)। ୨୦୧୪ରେ ସେ ବିଶ୍ୱର ସବୁଠୁ ଡେଙ୍ଗୀ ଟିନ୍ ଏଜର (ସ୍ବଳ୍ପ ବୟସ୍କା) ଭାବେ ଗିନିଜ୍ ବୁକ୍ ରେକର୍ଡ କରିଥିଲେ। କେବଳ ଏତିକି ନୁହେଁ, ରୁମେୟସାଙ୍କ ହାତ ଓ ଅଙ୍ଗୁଳି ମଧ୍ୟ ସବୁଠୁ ଲମ୍ବା। ବର୍ତ୍ତମାନ ସୁଦ୍ଧା ତାଙ୍କର ଏହି ରେକର୍ଡକୁ କେହି ଭାଙ୍ଗିପାରି ନାହାନ୍ତି। ରୁମେୟସାଙ୍କ ଶରୀର ତାଙ୍କର ବିମାନ ଯାତ୍ରାରେ ବାଧକ ସାଜିଥିଲା। ତେବେ ତୁର୍କିସ୍ ଏୟାରଲାଇନ୍ସ ଏକ ବିମାନରେ ସ୍ବତନ୍ତ୍ର ସୁବିଧା କରି ତାଙ୍କ ଆକାଶରେ ଉଡ଼ିବା ସ୍ବପ୍ନକୁ ସାକାର କରିଛି। ପ୍ରତ୍ୟେକ ଖରାପ ଜିନିଷକୁ ଏକ ସକାରାମତ୍କ ସୁଯୋଗରେ ପରିବର୍ତ୍ତିତ କରାଯାଇପାରେ। ତେଣୁ ବାସ୍ତବତାକୁ ସ୍ବୀକାର କରି ନିଜ ପାଇଁ ସବୁ ସମ୍ଭାବନା ଅନ୍ବେଷଣ କରିବା ଉଚିତ ବୋଲି ସେ ପ୍ରତିକ୍ରିୟାରେ କହିଛନ୍ତି।
୨୫ ବର୍ଷୀୟା ରୁମେୟସା ଜୀବନରେ ପ୍ରଥମ ଥର ପାଇଁ ବିମାନ ଯାତ୍ରା କରିଛନ୍ତି। ଏଥିଲାଗି ତୁର୍କିସ୍ ଏୟାରଲାଇନ୍ସକୁ ୬ଟି ସିଟ୍ ଖୋଲି ଏକ ସ୍ପେଶାଲ ରୁମ୍ ତିଆରି କରିବାକୁ ପଡ଼ିଥିଲା। ତାଙ୍କୁ ଏକ ଷ୍ଟ୍ରେଚରରେ ଶୁଆଇ ବିମାନରେ ନିଆଯାଇଥିଲା। ସେ ନିଜ ପ୍ରଥମ ବିମାନ ଯାତ୍ରାର ଅନୁଭୂତି ସମ୍ପର୍କରେ ଇନ୍ଷ୍ଟାଗ୍ରାମ୍ ପୋଷ୍ଟରେ ଉଲ୍ଲେଖ କରିଛନ୍ତି। ତୁର୍କୀର ଇସ୍ତାନବୁଲରୁ ଆମେରିକାର ସାନ୍ ଫ୍ରାନ୍ସସିସ୍କୋ ପର୍ଯ୍ୟନ୍ତ ଯାତ୍ରା ପାଇଁ ୧୩ ଘଣ୍ଟା ଲାଗିଥିଲା। ଟେକ୍ନୋଲୋଜି ସେକ୍ଟରରେ କାର୍ଯ୍ୟରତ ରୁମେୟସା କହିଛନ୍ତି, ଆମେରିକାରେ ସେ ୬ ମାସ ରହିବେ। ଏହା ଭିତରେ ସେ କ୍ୟାରିୟରରେ ଉନ୍ନତି ଲାଗି ଅଧିକ ସୁଯୋଗ ମିଳିବ ବୋଲି ବେଶ୍ ଆଶାବାଦୀ। ସୁଖଦ ବିମାନ ଯାତ୍ରାକୁ ସଫଳ କରାଇଥିବାରୁ ସମସ୍ତଙ୍କୁ ସେ ନିଜ ଇନ୍ଷ୍ଟାଗ୍ରାମ ପୋଷ୍ଟରେ ଧନ୍ୟବାଦ ଦେଇଛନ୍ତି। ଏଥିରେ ସେ ଲେଖିଛନ୍ତି, ଏହା ମୋର ପ୍ରଥମ ବିମାନ ଯାତ୍ରା ଥିଲା, କିନ୍ତୁ ଶେଷ ନୁହେଁ। ରୁମେୟସାଙ୍କ ‘ଥ୍ୟାଙ୍କ୍ ୟୁ ଲେଟର’ର ଉତ୍ତରରେ ତୁର୍କିସ୍ ଏୟାରଲାଇନ୍ସ ଲେଖିଛି, ଭବିଷ୍ୟତରେ ମଧ୍ୟ ଯଥାସମ୍ଭବ ସହଯୋଗ କରିବୁ।
