ଗୌପିଟାନ ଶିପ୍ଲିଫ୍ଟ ବା ଜାହାଜ ଲିଫ୍ଟ ଚାଇନାର ଗୁଇଜୋ ପ୍ରଦେଶରେ ରହିଚି। ଯାହା ଦୁନିଆର ସବୁଠୁ ବଡ଼ ଜାହାଜ ଲିଫ୍ଟ ଅଟେ। ଏହା ଇଞ୍ଜିନିୟରମାନଙ୍କର ଏକ ଉତ୍ତମ କାର୍ଯ୍ୟ। ଏହା ଦେଖିବା ପରେ ଆପଣ ଇଞ୍ଜିନିୟରମାନଙ୍କ କାର୍ଯ୍ୟକୁ ସାବାସ୍ ଦେବେ। ଜାଣି ଆଶ୍ଚର୍ଯ୍ୟ ହେବେ ଯେ, ଏହା ୫୦୦ ଟନ୍ ଓଜନ ବିଶିଷ୍ଟ ଜାହାଜଗୁଡ଼ିକୁ ମ୍ୟାଚ୍ ବକ୍ସ ପରି ୬୫୩ ଫୁଟ ଉଚ୍ଚତାକୁ ଉଠାଇ ପାରିବ। ଏହିପରି ଅନେକ ଉତ୍କୃଷ୍ଟ ନିର୍ମାଣ ପାଇଁ ଚାଇନା ସମଗ୍ର ବିଶ୍ୱରେ ପ୍ରସିଦ୍ଧ।
ଏକ ରିପୋର୍ଟ ଅନୁଯାୟୀ, ଏହି ଜାହାଜ ଲିଫ୍ଟ ନିର୍ମାଣ କରିବା ସହଜ ନ ଥିଲା। କିନ୍ତୁ ଉନ୍ନତ ଜ୍ଞାନକୌଶଳ ଯୋଗୁ ଇଞ୍ଜିନିୟରମାନେ ଏହାକୁ ସହଜରେ ନିର୍ମାଣ କରିବାରେ ସକ୍ଷମ ହୋଇଥିଲେ। ଗୌପିଟାନ ହାଇଡ୍ରୋପାଓ୍ବାର ଷ୍ଟେଶନରେ ଅନ୍ତର୍ଭୁକ୍ତ ହୋଇଥିବା ଏହି ଶିପ୍ଲିଫ୍ଟ ଏହାର ଏକ ଉତ୍ତମ ଉଦାହରଣ।
ଏହି ଜାହାଜ ଲିଫ୍ଟ ୨୦୨୧ରେ ସମାପ୍ତ ହୋଇଥିଲା। ଏହାର ସମୁଦାୟ ଦୂରତା ୨.୩ କିଲୋମିଟର। ଯେଉଁଥିରେ ତିନୋଟି ଅଲଗା ହାଇଡ୍ରୋଲିକ ଲିଫ୍ଟ ଅନ୍ତର୍ଭୁକ୍ତ। ଗୁଇଜୋରେ ଥିବା ୟାଙ୍ଗଜେ ନଦୀର ଏକ ଉପନଦୀ ଓ୍ବୁ ନଦୀରେ ଅବସ୍ଥିତ ଗୌପିଟାନ ଶିପ୍ଲିଫ୍ଟ, ବିଶ୍ୱର ଅନ୍ୟତମ ଆକର୍ଷଣୀୟ ବୈଷୟିକ ଚମତ୍କାର, ଯାହା ଜଳପଥରେ ପରିବହନକୁ ସହଜ କରିଥାଏ।
ଚାଙ୍ଗଜିଆଙ୍ଗ ଇନଷ୍ଟିଚ୍ୟୁଟ୍ ଅଫ ସର୍ଭେ ଶିପ୍ଲିଫ୍ଟ ସିଷ୍ଟମକୁ ତିନୋଟି ପୃଥକ ପର୍ଯ୍ୟାୟରେ ବିଭକ୍ତ କରିବାକୁ ନିଷ୍ପତ୍ତି ନେଇଛି। ଯାହାକି ବହୁ ଜାହାଜ ଆସିବାର ବିପଦକୁ ହ୍ରାସ କରିବ। ଗୋଟିଏ ଜାହାଜ ପ୍ରଥମ ଲିଫ୍ଟ ଅତିକ୍ରମ କରିବା ମାତ୍ରେ ଅନ୍ୟ ଜାହାଜଟି ଉଠାଯାଇପାରିବ। ଯେତେବେଳେ ପ୍ରଥମ ଜାହାଜ ଦ୍ୱିତୀୟ ଏବଂ ତୃତୀୟ ଲିଫ୍ଟ ଦେଇ ଯାତ୍ରା କରିବ।
