କଟକ ଅଫିସ,୨୨।୧୨: ଡାକ୍ତରଙ୍କ ନକଲି ପ୍ରେସ୍କ୍ରିପ୍ସନ ତିଆରି କରି ଜଣେ ମହିଳା ଗିରଫ ହୋଇଛନ୍ତି। ସ୍ବାମୀଙ୍କୁ ଜାମିନରେ ଆଣିବା ପାଇଁ ନିଜେ ଅସୁସ୍ଥ ଦର୍ଶାଇ ମହିଳା ଜଣକ ଏପରି ଚକ୍ରାନ୍ତ କରିଥିଲେ। କୋର୍ଟରେ ଧରା ପଡିବା ପରେ ତାଙ୍କୁ ଜେଲ୍ ଯିବାକୁ ପଡିଛି।
ମିଳିଥିବା ସୂଚନା ଅନୁଯାୟୀ, ଗଞ୍ଜେଇ କାରବାର ଅଭିଯୋଗରେ କନ୍ଧମାଳ ଜିଲାର ଶ୍ରୀରାମ କଅଁରଙ୍କୁ ପୋଲିସ ଗିରଫ କରିଥିଲା। ୧୩ା୭ା୨୦ରେ ସେ ଜାମିନ୍ ପାଇଁ ହାଇକୋର୍ଟରେ ଆବେଦନ କରିଥିଲେ। ତେବେ ସହଜରେ ତାଙ୍କୁ ଜାମିନ ମିଳିବା ପାଇଁ ସ୍ତ୍ରୀ ମାନସୀ କଅଁର ଏକ ଯୋଜନା କରିଥିଲେ। ୯ା୧୦ା୨୦ରେ ଏସ୍ସିବି ମେଡିସିନ ଆଉଟ୍ଡୋର୍ ନିମନ୍ତେ ଗୋଟିଏ ଟିକେଟ କାଟିଥିଲେ (ଟିକେଟ ନଂ୧୩୧/ମେଡିସିନ/୩୦୯୦୧)। ଏହି ଟିକେଟରେ ଆସୋସିଏଟ୍ ପ୍ରଫେସର ଡା.ଏସ୍. କେ. ଭୋଳ ତାଙ୍କୁ ଏକାଧିକ ରୋଗ ଓ କୋଭିଡ୍ ଲାଗି ୯ା୧୦ା୨୦ରୁ ୮ା୫ା୨୦୨୧ ଯାଏ ବେଡ୍ରେଷ୍ଟରେ ରହିବା ଲାଗି ପରାମର୍ଶ ଦେଇଛନ୍ତି ବୋଲି ପ୍ରେସ୍କ୍ରିପସନ ପ୍ରସ୍ତୁତ କରିଥିଲେ। ପରେ ଏହାକୁ ସ୍ବାମୀଙ୍କ ଜାମିନ ପାଇଁ କୋର୍ଟରେ ଦାଖଲ କରିଥିଲେ। ଏହି ପ୍ରେସ୍କ୍ରିପସନ୍ ଉପରେ କୋର୍ଟ ସନ୍ଦେହ କରି କଟକ ଡିସିପିଙ୍କୁ ତଦନ୍ତ କରିବାକୁ ନିର୍ଦ୍ଦେଶ ଦେଇଥିଲେ। ୧୧ା୧୨ା୨୦ରେ ଡିସିପି ତଦନ୍ତ କରି କୋର୍ଟରେ ରିପୋର୍ଟ ଦାଖଲ କରିଥିଲେ। ଏଥିରେ ସେ ଦର୍ଶାଇଥିଲେ, ଏସ୍ସିବି ମେଡିସିନ ବିଭାଗରେ ଆସୋସିଏଟ୍ ପ୍ରଫେସର ଡା. ଏସ୍. କେ. ଭୋଳ ନାମରେ କେହି ଡାକ୍ତର ନାହାନ୍ତି। ଉକ୍ତ ପ୍ରେସ୍କ୍ରିପ୍ସନ୍ରେ ଲାଗିଥିବା ସିଲ୍ ସହ ଏସ୍ସିବି ମେଡିସିନ ବିଭାଗର ସିଲ୍ରେ ସାମଞ୍ଜସ୍ୟ ନାହିଁ। ତେଣୁ ଏହା ନକଲି ବୋଲି ଡିସିପି ତାଙ୍କ ରିପୋର୍ଟରେ ଉଲ୍ଲେଖ କରିଥିଲେ। ଫଳରେ ହାଇକୋର୍ଟ ଅଦାଲତ ଅବମାନନା ଘଟଣାରେ ମାନସୀଙ୍କୁ ତୁରନ୍ତ ଗିରଫକରି ୨୧ ତାରିଖରେ ଫୁଲବାଣୀ ସେସନ୍ସ କୋର୍ଟ କମ୍ ସ୍ପେଶାଲ ଜଜ୍ଙ୍କ ଠାରେ ହାଜର କରିବା ପାଇଁ ନିର୍ଦ୍ଦେଶ ଦେଇଥିଲେ। ମାନସୀଙ୍କୁ ଗିରଫ କରାଯାଇ ଜେଲରେ ରଖାଯାଇଥିବାବେଳେ ସୋମବାର ଭିଡିଓ କନ୍ଫରନ୍ସ ଯୋଗେ ତାଙ୍କୁ ଫୁଲବାଣୀ ସେସନ୍ସ କୋର୍ଟ କମ୍ ସ୍ପେଶାଲ ଜଜ୍ଙ୍କ ଠାରେ ହାଜର କରାଯାଇଥିଲା। ଜଷ୍ଟିସ ଏସ୍. କେ. ସାହୁଙ୍କ ଦ୍ୱାରା ଗଠିତ ଖଣ୍ଡପୀଠ ମାମଲାର ଶୁଣାଣି କରିଥିଲେ। ମାମଲାର ପରବର୍ତ୍ତୀ ଶୁଣାଣି ଆସନ୍ତା ଜାନୁୟାରୀ ୪ରେ ହେବା ପାଇଁ ଧାର୍ଯ୍ୟ ହୋଇଛି।
