ଇଂଲଣ୍ଡରେ ଜଣେ ମହିଳା ବିଳାସପୂର୍ଣ୍ଣ ବିବାହ ପାଇଁ ମିଛ କହିବାର ସବୁ ସୀମା ଟପିଯାଇଛନ୍ତି। ବିବାହର ଏପରି କ୍ରେଜ୍ ଥିଲା ଯେ ସେ ବର୍ଷବର୍ଷ ଧରି ମିଥ୍ୟା କହି ଆସୁଥିଲେ। ମହିଳା ହେଲେ ୨୯ ବର୍ଷିୟ ଟୋନି ଷ୍ଟାଣ୍ଡନ। ନିଜକୁ କର୍କଟ ହୋଇଥିବା ଟୋନି ତାଙ୍କ ବନ୍ଧୁମାନଙ୍କୁ କହିଥିଲେ। ତାଙ୍କର ହାତରେ ଆଉ କିଛି ଦିନ ସମୟ ବାକି ଅଛି। ଏଣୁ ସେ ଜାକଜମକରେ ବିବାହ କରିବାକୁ ଚାହୁଁଥିବା କହିଥିଲେ। ଏହା ପରେ ତାଙ୍କ ବନ୍ଧୁମାନେ ପାଣ୍ଠି ଯୋଗାଡ଼ କରି ଟୋନିଙ୍କ ସ୍ବପ୍ନ ପୂରଣ କରିବାକୁ ଚାହିଁଥିଲେ। ହେଲେ କିଛି ଦିନ ପରେ ଟୋନିଙ୍କ ଏହି ମିଛ ଧରାପଡ଼ି ଯାଇଛି।
୨୦୧୫ ରେ ଟୋନି ତାଙ୍କର ଦୁଇ ବନ୍ଧୁ ଆଶଲି ଏବଂ ଜେନିଫର୍ ଡଗଲସଙ୍କୁ କହିଥିଲେ ସେ କର୍କଟ ସହ ଲଢ଼ୁଛନ୍ତି। ତାଙ୍କ ଅବସ୍ଥା ବିଷୟରେ ସେ ନିଜ ସାଙ୍ଗମାନଙ୍କୁ କ୍ରମାଗତ ଭାବରେ ଅପଡେଟ୍ କରୁଥିଲେ। ଯାହାଫଳରେ ସେ ମିଛ କହୁଥିବାର ସନ୍ଦେହ ହେଉ ନ ଥିଲା। ଟୋନି ମଧ୍ୟ ଲଣ୍ଡା ଥିଲେ ଯାହାଦ୍ୱାରା ସେ କର୍କଟ ଚିକିତ୍ସା କରୁଛନ୍ତି ବୋଲି ପ୍ରମାଣିତ ହେଉଥିଲା।
ଟୋନିଙ୍କ ଘନିଷ୍ଠ ବନ୍ଧୁମାନେ ଏକ ପେଜ କରି ୮,୩୪୪ ପାଉଣ୍ଡ ଅର୍ଥାତ ପ୍ରାୟ ସାଢ଼େ ଆଠ ଲକ୍ଷ ଟଙ୍କା ପାଣ୍ଠି ଗ୍ରହଣ କରଥିଲେ। ଏହା ବ୍ୟତୀତ ଜଣେ ସ୍ଥାନୀୟ ବ୍ୟବସାୟୀ ତାଙ୍କୁ ୨,୦୦୦ ହଜାର ପାଉଣ୍ଡର ଆର୍ଥିକ ସହାୟତା ଦେଇଥିଲେ। ସେହିପରି ବିବାହ ପାଇଁ ଉପହାର ସ୍ବରୂପ ଟୋନି ଏକ କାର ମଧ୍ୟ ପାଇଥିଲେ।
ଟୋନିଙ୍କ ପିତା ପ୍ରକୃତରେ କର୍କଟ ରୋଗରେ ପୀଡିତ ଥିଲେ। ଝିଅର ବିବାହ ପୂର୍ବରୁ ତାଙ୍କର ଦେହାନ୍ତ ହୋଇଯାଇଥିଲା। ହେଲେ ସେ ତାଙ୍କ ଝିଅ ପାଇଁ ଏକ ଭିଡିଓ ତିଆରି କରିଥିଲେ ଯାହା ଟୋନିଙ୍କ ବିବାହ ଦିନ ଚଲାଯାଇଥିଲା। ଏହା ବ୍ୟତୀତ ଇଂଲଣ୍ଡ ଫୁଟବଲ କ୍ଲବ ଏଭର୍ଟନର ଖେଳାଳି ମଧ୍ୟ ତାଙ୍କୁ ଏକ ଭିଡିଓ ମେସେଜ ପଠାଇ ବିବାହ ପାଇଁ ଶୁଭେଚ୍ଛା ଜଣାଇଥିଲେ। ତାଙ୍କ ବିବାହ ଦିନ ଟୋନି ବହୁତ ଖୁସି ଦେଖାଯାଉଥିଲେ, ଯାହା ପରେ ତାଙ୍କ ଅସୁସ୍ଥତା ଉପରେ ସନ୍ଦେହ ସୃଷ୍ଟି ହୋଇଥିଲା ।
ଶେଷରେ ଟୋନି ସାଙ୍ଗମାନଙ୍କୁ ଫୋନକରି ମିଥ୍ୟା ବିଷୟରେ ଜଣାଇଥିଲେ। ଯାହା ତାଙ୍କ ସାଙ୍ଗମାନେ ରେକର୍ଡ କରିଥିଲେ। ସେ ସ୍ପଷ୍ଟ ଭାବରେ କହିଥିଲେ ଯେ, ତାଙ୍କ ସ୍ବପ୍ନର ବିବାହ ଏବଂ ବିଳାସପୂର୍ଣ୍ଣ ଛୁଟି କାଟିବା ପାଇଁ ସେ ଏପରି ପଦକ୍ଷେପ ନେଇଛନ୍ତି। ଟୋନି ତାଙ୍କ ସାଙ୍ଗମାନଙ୍କୁ ମଧ୍ୟ କହିଛନ୍ତି ଯେ, ଯେହେତୁ ତାଙ୍କ ସ୍ବାମୀଙ୍କର ଏ ବିଷୟରେ କୌଣସି ଧାରଣା ନ ଥିଲା, ତେଣୁ ସେ ବହୁତ ଆଶ୍ଚର୍ଯ୍ୟ ହୋଇଯାଇଛନ୍ତି। ଏ ନେଇ ସେ ତାଙ୍କୁ ଛାଡପତ୍ର ଦେଇପାରନ୍ତି। ପରେ ତାଙ୍କୁ ୫ ମାସ ଦଣ୍ଡ ଶୁଣାଯାଇ ଜେଲ୍ ପଠାଯାଇଥିବା ଜଣାପଡ଼ିଛି।
