ଜେରୁଜେଲମ୍,୨୩ା୧: ବନ୍ଧୁକର ଗୁଳି ଅଧିକାଂଶ ଲୋକଙ୍କ ଜୀବନ ନେଇଥାଏ। ମାତ୍ର ଯଦି ଜଣଙ୍କ ଶରୀରରେ ଗୁଳି ରହିବା ପରେ ବି ସେ ଜାଣି ପାରି ନ ଥିଲେ ତାହା ନିଶ୍ଚିତ ଆଶ୍ଚର୍ଯ୍ୟଜନକ। ଇସ୍ରାଏଲର ଜଣେ ମହିଳାଙ୍କ ସହିତ ଏପରି ଘଟିଛି। ବାସ୍ତବରେ ମହିଳାଙ୍କ ଶରୀରରେ ତିନିମାସ ଧରି ଏକ ଗୁଳି ଅଟକି ରହିଥିଲା। କିନ୍ତୁ ସେ ଏ ବିଷୟରେ ଜାଣି ନ ଥିଲେ।
ଏକ ରିପୋର୍ଟ ଅନୁଯାୟୀ, ଏହି ମହିଳାଙ୍କ ନାମ ଆଡି ବ୍ଲଏ। ସେ ଅନୁଭବ କଲେ ତାଙ୍କ ମାଂସପେଶୀରେ ଏକପ୍ରକାର ଯନ୍ତ୍ରଣା ହେଉଛି। ଯେତେବେଳେ ସେ ସିଟି ସ୍କାନ କଲେ, ସେତେବେଳେ ଜାଣିବାକୁ ପାଇଲେ ତାଙ୍କ ଶରୀର ଭିତରେ କିଛି ଧାତୁ ଅଛି। ଏହା ପରେ ତାଙ୍କର ଅସ୍ତ୍ରୋପଚାର କରାଯାଇଥିଲା। ପରେ ଡାକ୍ତରମାନେ ମଧ୍ୟ ଆଶ୍ଚର୍ଯ୍ୟ ହୋଇଗଲେ ଯେ ତାଙ୍କ ଶରୀରରେ ଏକ ଗୁଳି ଥାଇ ସେ ଏତେଦିନ ପର୍ଯ୍ୟନ୍ତ ଜାଣି ପାରି ନ ଥିଲେ।
ମହିଳା ଜଣକ କହିଥିଲେ, ପ୍ରାୟ ତିନିମାସ ତଳେ ଏକ ବିବାହରେ ଗୁଳି ଫୁଟିଥିଲା। କିନ୍ତୁ ସେ ଜାଣି ନ ଥିଲେ ଗୁଳିଟି ତାଙ୍କ ଦେହରେ ବାଜିଛି ବୋଲି। ପ୍ରାରମ୍ଭରେ ସେ ଭାବିଲେ ତାଙ୍କ ମାଂସପେଶୀରେ ଏକ ପ୍ରକାର ଦରଜ ହେଉଛି। ପରେ ଦେଖିଲେ ପଛରେ ଟିକିଏ ସ୍କ୍ରାଚ୍ ଅଛି। ଯାହାକୁ ସେ ଅଣଦେଖା କରିଥିଲେ। କିନ୍ତୁ ଯେତେବେଳେ ଯନ୍ତ୍ରଣା ବଢ଼ିଲା ସେତେବେଳେ ସେ ଡାକ୍ତରଖାନା ଗଲେ।
ଏହି ପ୍ରସଙ୍ଗରେ ପୋଲିସ କହିଛି, ତାଙ୍କ ଦେହରୁ ମିଳିଥିବା ଗୁଳିଟି ନିଶ୍ଚିତ ଭାବରେ ପାଲେଷ୍ଟାଇନ ଦ୍ୱାରା ଗୁଳି ଚଳାଯାଇଥିଲା। ବର୍ତ୍ତମାନ ଏହି ଦୁର୍ଘଟଣା ବିଷୟରେ ଅଧିକ ସୂଚନା ମିଳିନାହିଁ। ମହିଳା ଜଣକ ଆହୁରି କହିଛନ୍ତି, ତାଙ୍କ ପିଠିରେ ଏବଂ ବେକରେ ମଧ୍ୟ ଯନ୍ତ୍ରଣା ହେଉଛି। ଏହା ସହିତ ସେ ଆଜିକାଲି ମାନସିକ କଷ୍ଟ ଅନୁଭବ କରୁଛନ୍ତି। ଅନେକ ଥର ରାସ୍ତାରେ ଯିବାବେଳେ ସେ ଭୟଭୀତ ହେଉଛନ୍ତି। ବର୍ତ୍ତମାନ ଏହି ଖବର ସମଗ୍ର ବିଶ୍ୱରେ ଚର୍ଚ୍ଚା ପାଲଟିଛି।
