ସେଣ୍ଟ୍ ଜର୍ଜ, ୨୮ା୬(ଏପି)-ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଅନ୍ତର୍ଜାତୀୟ ଟି୨୦ କ୍ରିକେଟ ମ୍ୟାଚ୍ରେ ଓ୍ବେଷ୍ଟଇଣ୍ଡିଜ ୮ଉଇକେଟରେ ବିଜୟ ହାସଲ କରିଛି। ଭ୍ରମଣକାରୀ ଦଳ ଦ୍ୱାରା ଧାର୍ଯ୍ୟ ୧୬୧ରନର ବିଜୟ ଲକ୍ଷ୍ୟକୁ ଘରୋଇ ଦଳ ୧୫ ଓଭରରେ ମାତ୍ର ୨ ଉଇକେଟ ବିନିମୟରେ ହାସଲ କରିନେଇଥିଲା। ଦଳ ପକ୍ଷରୁ ଏଭିନ୍ ଲିଓ୍ବିସ୍ ମାତ୍ର ୨୨ ବଲ୍ରେ ଅର୍ଦ୍ଧଶତକ ହାସଲ ସହ ୭୧ (୩୫ବଲ୍) ରନ କରି ଦଳକୁ ଜିତାଇବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ଲିଓ୍ବିସ୍ ପ୍ରଥମ ଉଇକେଟରେ ଆନ୍ଦ୍ରେ ଫ୍ଲେଚରଙ୍କ ସହ ୮୫ ରନ ଏବଂ କ୍ରିସ୍ ଗେଲ୍ଙ୍କ ସହ ଦ୍ୱିତୀୟ ଉଇକେଟରେ ୩୯ରନ ଯୋଗ କରି ଦଳର ବିଜୟପଥକୁ ସୁଗମ କରିଥିଲେ। ସେ ୧୨ତମ ଓଭରରେ ଆଉଟ୍ ହେବା ବେଳକୁ ଓ୍ବେଷ୍ଟଇଣ୍ଡିଜ ସ୍କୋର ୧୨୪/୨ ରହିଥିଲା। ତୃତୀୟ ଉଇକେଟରେ ଗେଲ୍ ଓ ଆନ୍ଦ୍ରେ ରସେଲ ଅପରାଜିତ ୩୭ରନ ଯୋଗ କରି ଦଳକୁ ବିଜୟୀ କରାଇଥିଲେ। ଓ୍ବେଷ୍ଟଇଣ୍ଡିଜ ଦକ୍ଷିଣ ଆଫ୍ରିକା ଦ୍ୱାରା ଧାର୍ଯ୍ୟ ବିଜୟ ଲକ୍ଷ୍ୟକୁ ମାତ୍ର ୧୫ ଓଭରରେ ଅତିକ୍ରମ କରିଯାଇଥିଲା। ଗେଲ୍ ୩୪ରନ (୨୪ବଲ୍) ଓ ରସେଲ ୨୩ (୧୨ ବଲ୍)ରନ କରି ଅପରାଜିତ ରହିଥିଲେ। ଓ୍ବେଷ୍ଟଇଣ୍ଡିଜ ସ୍କୋରରେ ୧୫ଟି ଛକା ମଧ୍ୟରୁ କେବଳ ଲିଓ୍ବିସ୍ଙ୍କର ୭ ଛକା ରହିଥିଲା। ଟସ୍ରେ ହାରି ପ୍ରଥମେ ବ୍ୟାଟିଂ କରିଥିବା ଦକ୍ଷିଣ ଆଫ୍ରିକା ନିର୍ଦ୍ଧାରିତ ଓଭରରେ ୬ ଉଇକେଟ ବିନିମୟରେ ୧୬୦ରନ କରିବାରେ ସମର୍ଥ ହୋଇଥିଲା। ଦଳପକ୍ଷରୁ ଟପ୍ ସ୍କୋର ରସି ଭାନ୍ ଡର୍ ଡସେନ ୫୬ରନ କରି ଅପରାଜିତ ରହିଥିବାବେଳେ କ୍ୱିଣ୍ଟନ ଡି’କକ୍ ୩୭ ରନ କରିଥିଲେ। ଓ୍ବେଷ୍ଟଇଣ୍ଡିଜ ପକ୍ଷରୁ ଫାବିଆନ ଆଲେନ୍ ଓ ଡ୍ବେନ ବ୍ରାଭୋ ଦୁଇଟି ଲେଖାଏ ଉଇକେଟ ଅକ୍ତିଆର କରିଥିଲେ।
