ଗୋପାଳପୁର,୧୧।୭: ଗତ କିଛି ବର୍ଷ ଧରି ଗଞ୍ଜାମ ଜିଲା ଗୋଳନ୍ଥରା ଥାନା ରାମେୟାପାଟଣା ଗ୍ରାମରେ ସମୁଦ୍ର ଜୁଆର ମାଡ଼ିଆସି ବହୁ ଧନ ସମ୍ପତ୍ତି ନଷ୍ଟ କରୁଛି। ଗତ ୧ ତାରିଖରେ ସମୁଦ୍ରରେ ଜୁଆର ଆସି ୩ଟି ଘର ଭାଙ୍ଗିଯାଇଥିଲା। ରବିବାର ପୁଣି ଜୁଆର ମାଡ଼ରେ ଆର୍.ଚନ୍ଦ୍ରମ୍ମା, ଆର୍.ତ୍ରିନାଥ ଓ ଏଲ୍.ହେମାବତୀଙ୍କ ୩ଟି ଘର ଭାଙ୍ଗିଯାଇଛି। ଆହୁରି ଅନେକ ଘର ବିପଦସଙ୍କୁଳ ଅବସ୍ଥାରେ ରହିଥିବାରୁ ଗ୍ରାମବାସୀ ଭୟଭୀତ ଅବସ୍ଥାରେ ଅଛନ୍ତି। ଖବର ପାଇ ଚିକିଟି ତହସିଲଦାର ଓ ବିଡିଓ ଘଟଣାସ୍ଥଳରେ ପହଞ୍ଚତ୍ଥିଲେ। ଏହାର ସ୍ଥାୟୀ ପ୍ରତିକାର ପାଇଁ ଗ୍ରାମବାସୀ ଦୀର୍ଘଦିନ ଧରି ସରକାରଙ୍କଠାରେ ଦାବି କରି ଆସୁଥିଲେ ମଧ୍ୟ ପ୍ରଶାସନ ଓ ରାଜନୈତିକ ବ୍ୟକ୍ତିଙ୍କ ଇଚ୍ଛାଶକ୍ତି ଅଭାବରୁ ତାହା ସମ୍ଭବ ହୋଇପାରୁନାହିଁ। ଗତ ୩ ତାରିଖରେ ଜଳ ସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ଧୀରେନ କୁମାର ସାମଲ ଘଟଣାସ୍ଥଳ ପରିଦର୍ଶନ କରି ୧୦ ଦିନ ମଧ୍ୟରେ ଟେଣ୍ଡର ଡକାଯାଇ ଗାର୍ଡ ଓ୍ବାଲ କାର୍ଯ୍ୟ ଆରମ୍ଭ ହେବ ବୋଲି ଗ୍ରାମବାସୀଙ୍କୁ ପ୍ରତିଶ୍ରୁତି ଦେଇଥିଲେ। କିନ୍ତୁ ଅଦ୍ୟାବଧି କାମ ଆରମ୍ଭ ହୋଇନାହିଁ। ଫଳରେ ସମୁଦ୍ର କୂଳ ଲଙ୍ଘୁଛି। ତେବେ ଏହାର ସ୍ଥାୟୀ ପ୍ରତିକାର କରା ନ ଗଲେ ଆଗାମୀ ଦିନରେ ଗ୍ରାମ ସମୁଦ୍ରରେ ଲୀନ ହୋଇଯିବ ବୋଲି ଗ୍ରାମବାସୀଙ୍କ ପକ୍ଷରୁ କୁହାଯାଇଛି।
ସୂଚନାନୁସାରେ, ରାମେୟାପାଟଣା ଗ୍ରାମର ୬୫୦ ପରିବାର ସମୁଦ୍ରରେ ମାଛ ମାରି ଜୀବିକା ନିର୍ବାହ କରିଥାନ୍ତି। ୨୦୧୬ରେ ବାହୁଦା ନଦୀ ମୁହାଣରେ ବାଲି ଭର୍ତ୍ତି ହେବା ଫଳରେ ଦକ୍ଷିଣା ପବନ ବହିବା ଯୋଗୁ ସମୁଦ୍ର ଦିଗ ପରିବର୍ତ୍ତନ କରି ରାମେୟାପାଟଣା ଗ୍ରାମ ଭିତରେ ଜୁଆର ପାଣି ପଶି ବହୁ ଧନସମ୍ପତ୍ତି ନଷ୍ଟ ହୋଇଥିଲା। ସେହି ସମୟରେ ଏକ ସାହି ମଧ୍ୟ ସମୁଦ୍ରରେ ଲୀନ ହୋଇଯାଇଥିଲା।
