ରାୟଗଡ଼ା,୨୦।୨(ସ୍ବ.ପ୍ର.): ଜିଲାରେ ଧାନ ବିକ୍ରି ପରେ ନିଜ ଟଙ୍କାକୁ ଚାହିଁ ବସିଛନ୍ତି ଚାଷୀ। ଜାନୁୟାରୀ ୨୫ ତାରିଖ ପରେ ଧାନ ବିକ୍ରି କରିଥିବା କୌଣସି ଚାଷୀଙ୍କୁ ସେମାନଙ୍କ ଟଙ୍କା ମିଳିନାହିଁ। ସମଗ୍ର ଜିଲାରେ ଶତାଧିକ ଚାଷୀ ଟଙ୍କା ପାଇନାହାନ୍ତି। ଧାନ ବିକିବାର ୪୮ ଘଣ୍ଟା ମଧ୍ୟରେ ବ୍ୟାଙ୍କ ଆକାଉଣ୍ଟ ମାଧ୍ୟମରେ ଟଙ୍କା ପାଇବା ନେଇ ରାଜ୍ୟ ସରକାର ଘୋଷଣା କରିଥିଲେ ମଧ୍ୟ ଦୀର୍ଘ ୨୬ ଦିନ ହେଲାଣି ଚାଷୀ ଟଙ୍କା ପାଇ ନ ଥିବା ଜଣାପଡ଼ିଛି। ଫଳରେ ଚାଷୀମାନେ ନାହିଁ ନ ଥିବା ଦୁର୍ଦ୍ଦଶା ଭୋଗୁଛନ୍ତି। ଅପରପକ୍ଷେ ବ୍ୟାଙ୍କ ଓ ଲ୍ୟାମ୍ପସରୁ କୃଷି ଋଣ ନେଇଥିବା ଚାଷୀଙ୍କୁ ସଂସ୍ଥା ପକ୍ଷରୁ ଋଣ ପରିଶୋଧ ପାଇଁ ନୋଟିସ ଗଲାଣି। ଚାଷୀ ଧାନ ବିକ୍ରି କରିଥିବା ନେଇ ପୋର୍ଟାଲରେ ଦେଖି ବ୍ୟାଙ୍କ ପକ୍ଷରୁ ବାରମ୍ବାର ଫୋନ କରି ଖରିଫ ଋତୁର ଋଣ ଟଙ୍କା ପଇଠ କରିବାକୁ କୁହାଯାଉଛି। ହେଲେ ଚାଷୀ ଧାନ ବିକିବା ପରେ ଟଙ୍କା ପାଇ ନ ଥିବା ବ୍ୟାଙ୍କ ଓ ଲ୍ୟାମ୍ପ୍ସ କର୍ତ୍ତୃପକ୍ଷ ଜାଣିନାହାନ୍ତି। ତେବେ ସରକାରଙ୍କ ନିକଟରେ ପାଣ୍ଠି ଅଭାବରୁ ଏଭଳି ଅବ୍ୟବସ୍ଥା ହୋଇଥିବା ଏକ ବିଶ୍ୱସ୍ତ ସୂତ୍ରରୁ ଜଣାପଡିଛି। ହେଲେ ବର୍ତମାନ ଚାଷି ନିଜର ପ୍ରାପ୍ୟ କେବେ ପାଇବେ ତାହାର କୌଣସି ସୂଚନା ଜିଲାସ୍ତରୀୟ ଅଧିକାରୀଙ୍କ ନିକଟରେ ନାହିଁ। ଧାନ ଟଙ୍କା ପାଇଁ ଚାଷୀମାନେ ବାରମ୍ବାର ଦୌଡୁଥିଲେ ମଧ୍ୟ କେହି ସମାଧାନ କରୁ ନ ଥିବା ସେମାନେ ଅଭିଯୋଗ କରିଛନ୍ତି। ଏଭଳିକି ଫେବୃୟାରୀ ୧୭ରେ ଅନୁଷ୍ଠିତ ଜିଲ୍ଲା ପରିଷଦ ବୈଠକରେ ସଭ୍ୟ ଓ ସଭ୍ୟାମାନେ ଏହି ପ୍ର୍ରସଙ୍ଗ ଉଠାଇ ବିଭାଗୀୟ ଅଧିକାରୀଙ୍କଠାରୁ ଉତର ଚାହିଁଥିଲେ। ତେବେ ଯୋଗାଣ, ସମବାୟ ଓ କୃଷି ବିଭାଗ ଅଧିକାରୀ ମଧ୍ୟ ହାତ ଟେକି ଦେଇଥିଲେ। ଯଦ୍ୱାରା ଚାଷୀଙ୍କୁ ସେମାନଙ୍କ ଧାନ ବିକ୍ରି ଟଙ୍କା ମିଳିବା ନା ନାହିଁ ତାହା ପ୍ରଶ୍ନବାଚୀ ସୃଷ୍ଟି କରିଛି। ଏ ନେଇ ଜିଲା ଯୋଗାଣ ଅଧିକାରୀ ରାଜକିଶୋର ପାଣିଗ୍ରାହୀଙ୍କୁ ପଚାରିବାରୁ କିଛି ଟେକ୍ନିକାଲ ସମସ୍ୟା ହେତୁ ଚାଷୀଙ୍କୁ ଟଙ୍କା ମିଳିପାରିନାହିଁ। ଜଲଦି ଚାଷୀଙ୍କୁ ଟଙ୍କା ଦିଆଯିବ ବୋଲି ସେ କହିଛନ୍ତି।
ସୂଚନା ମୁତାବକ ଚଳିତବର୍ଷ ୧୯ ହଜାର ୧୨୪ ଜଣ ଚାଷୀ ଧାନ ବିକ୍ରି ପାଇଁ ଯୋଗ୍ୟ ବିବେଚିତ ହୋଇଛନ୍ତି। ସାଟେଲାଇଟ ସର୍ଭେ ପରେ ଯୋଗ୍ୟ ତାଲିକ ପ୍ରକାଶ ପାଇଥିଲା। ଡିସେମ୍ବର ୧୯ରୁ ଜିଲାରେ ଧାନ ମଣ୍ଡି ଖୋଲିଛି। ଆସନ୍ତା ମାର୍ଚ୍ଚ ମାସରେ ଖରିଫ ଧାନ ମଣ୍ଡି ବନ୍ଦ ହୋଇଯିବ। ତେଣୁ ଜାନୁୟାରୀ ଓ ଫେବୃୟାରୀ ମାସ ଚାଷୀଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ହେଲେ ଏହି ମାସରେ ହିଁ ଚାଷୀଙ୍କୁ ଠକୁଛନ୍ତି ସରକାର। ତେଣୁ ତୁରନ୍ତ ସରକାର ଏହି ସମସ୍ୟାର ସମାଧାନ କରି ଚାଷୀଙ୍କ ଧାନ ବିକ୍ରି ପ୍ରାପ୍ୟ ପ୍ରଦାନ କରିବାକୁ ଦାବି ହୋଇଛି।