ପାରଳାଖେମୁଣ୍ଡି, ୭ା୨(ଡି.ଏନ୍.ଏ.) ଗଜପତି ଜିଲା ଗୁମ୍ମା ବ୍ଲକ ଭୁବନି ପଞ୍ଚାୟତରେ ସରପଞ୍ଚ ପଦବୀ ପାଇଁ ୨ ଭାଇଙ୍କ ସମେତ ମୋଟ ୮ ଜଣ ପ୍ରାର୍ଥୀ ହୋଇଛନ୍ତି। ଏହି ପଞ୍ଚାୟତର ଏଲିଅ ଗମାଙ୍ଗ ଓ ତାଙ୍କ ସାନଭାଇ ଯଜ୍ଞ ଗମାଙ୍ଗ ପ୍ରାର୍ଥୀ ହେବାପରେ ଉଭୟେ ଅଲଗା ଅଲଗା ପ୍ରଚାର କରିବାକୁ ନିଷ୍ପତ୍ତି ନେଇଛନ୍ତି। କେହି କାହା ବିରୋଧରେ ପ୍ରଚାର ନ କରି ସରପଞ୍ଚ ହେଲେ ନିଜେ କ’ଣ କରିବେ ତାହା ଲୋକଙ୍କୁ ଜଣାଉଛନ୍ତି। ଘରେ ପରସ୍ପର ମଧ୍ୟରେ ଆଲୋଚନା କଲେ ମଧ୍ୟ ନିର୍ବାଚନ ମଇଦାନକୁ ଆସିଲେ ରାଜନୈତିକ ପ୍ରତିଦ୍ୱନ୍ଦ୍ୱୀ ପାଲଟି ଯାଉଛନ୍ତି। ଅନ୍ୟପକ୍ଷରେ ପଞ୍ଚାୟତରେ ସମିତି ସଭ୍ୟ ପଦବୀ ପାଇଁ ୪ଜଣ, ୧୧ଟି ୱାର୍ଡମେମ୍ବର ପାଇଁ ୧୩ଜଣ ପ୍ରାର୍ଥୀ ହୋଇଛନ୍ତି। ଏହି ପଞ୍ଚାୟତରେ ସମସ୍ତ ୧୩ଟି ପଦ ପାଇଁ ମୋଟ ୨୫ଜଣ ପ୍ରାର୍ଥୀ ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହୋଇଛନ୍ତି। ପଞ୍ଚାୟତର ଲୋକ ସଂଖ୍ୟା ୫ ହଜାର। ଭୋଟର ସଂଖ୍ୟା ୩୧୮୩। ସେମାନଙ୍କ ମଧ୍ୟରୁ ୧୬୫୮ ମହିଳା ଏବଂ ୧୫୨୫ ପୁରୁଷ ଭୋଟର।
