ଧର୍ମଶାଳା/ଚଢ଼େଇଧରା/ଜେନାପୁର,୨୯ା୧୧(ଡି.ଏନ.ଏ.): ଯାଜପୁର ଜିଲା ଧର୍ମଶାଳା ତହସିଲ ଅଧୀନ ଚଢ଼େଇଧରା ଉପରଛକଠାରେ ରବିବାର କଳାପଥର ପରିବହନକୁ ନେଇ ବିବାଦୀୟ ପରିସ୍ଥିତି ସୃଷ୍ଟି ହୋଇଛି। କଳାପଥର ବୋଝେଇ ଗାଡ଼ି ଚେକିଂ ବେଳେ ତହସିଲଦାର ଜଣେ ଚାଳକଙ୍କୁ ମାଡ଼ ମାରିଥିବା ଅଭିଯୋଗରେ ଚାଳକ ସଂଘ ପକ୍ଷରୁ ରାସ୍ତାରୋକୋ କରାଯିବା ସହ ଚଢ଼େଇଧରା ବିଟ୍ ହାଉସ୍ ଆଗରେ ହୋହଲ୍ଲା କରାଯାଇଥିଲା। ସ୍ଥିତିକୁ ଦେଖି ଏକ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଥିଲା।
ବେଆଇନ ସୈରାତରୁ କଳାପଥର ପରିବହନ ହେଉଥିବା ଖବର ପାଇ ତହସିଲଦାର ସ୍ବାଗତ କୁମାର ଦାସ, ଅତିରିକ୍ତ ତହସିଲଦାର ଦେବୀ ପ୍ରସାଦ ମହାନ୍ତି ସଦଳବଳ ଚଢ଼ାଉ କରିବାକୁ ଯାଇଥିଲେ। ଚଢ଼େଇଧରା ଛକ ନିକଟରେ କଳାପଥର ବୋଝେଇ ହୋଇ ଆସୁଥିବା ଟ୍ରକ୍ଗୁଡିକୁ ଅଟକାଇ ୱାଇ ଫର୍ମ ଯାଞ୍ଚ କରିଥିଲେ। ଯାଞ୍ଚବେଳେ ୱାଇ ଫର୍ମଗୁଡ଼ିକ ନକଲି ବୋଲି ତହସିଲଦାର ଜାଣିବାକୁ ପାଇଥିଲେ। ଫଳରେ ତହସିଲଦାର ଓ ଟ୍ରକ୍ ଚାଳକଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ଏହାକୁ ନେଇ ତହସିଲଦାର ଟ୍ରକ୍ ଚାଳକ ଅଲେଖ କରଣ ଓ ରାକେଶ କରଣକୁ ମାଡ଼ ମାରିଥିବା ଅଭିଯୋଗ ହୋଇଥିଲା। ଘଟଣା ପ୍ରଚାର ହେବାପରେ ସ୍ଥାନୀୟ ଚାଳକ ସଂଘ କର୍ମକର୍ତ୍ତା ତହସିଲଦାର କ୍ଷମା ପ୍ରର୍ଥନା କରନ୍ତୁ ବୋଲି ଦାବି କରି ଚଣ୍ଡିଖୋଲ-ଡୁବୁରୀ ୫୩ ନଂ. ଜାତୀୟ ରାଜପଥରକୁ ଚଢ଼େଇଧରା ଉପରଛକ ନିକଟରେ ୨ ଘଣ୍ଟା ଧରି ଅବରୋଧ କରିଥିଲେ। ଜେନାପୁର ଥାନା ଅଧିକାରୀ ଉମାକାନ୍ତ ନାୟକ, ଚଣ୍ଡିଖୋଲ ଟ୍ରାଫିକ ଥାନାଧିକାରୀ ହୃଦାନନ୍ଦ ବେହେରା ପହଞ୍ଚତ୍ ସେମାନଙ୍କୁ ବୁଝାଶୁଝା କିରବା ସହ ଘଟଣାର ଆପୋସ ସମାଧାନ ପାଇଁ ଚଢ଼େଇଧରାସ୍ଥିତ ବିଟ୍ ହାଉସକୁ ଡାକିଥିଲେ। ଫଳରେ ଚାଳକମାନେ ରାସ୍ତା ଅବରୋଧରୁ ହଟିଯାଇ ବିଟ୍ ହାଉସ ନିକଟରେ ପହଞ୍ଚତ୍ ହୋହଲ୍ଲା କରିଥିଲେ। ଏହାପରେ ଯାଜପୁର ରୋଡ୍ ଏସ୍ଡିପିଓ ଚିନ୍ମୟ ନାୟକ ଓ ଯାଜପୁର ଉପଜିଲାପାଳ ଶରତ ମହାପାତ୍ର ପହଞ୍ଚତ୍ଥିଲେ। ଉଭୟ ତହସିଲଦାରଙ୍କ ଉପସ୍ଥିତିରେ ଚାଳକମାନଙ୍କ ସହିତ ଆଲୋଚନା କରି ଘଟଣାର ଆପୋସ ସମାଧାନ କରିଥିଲେ। ଏହି ଘଟଣାରେ ତହସିଲ ପକ୍ଷରୁ ୮ ଗାଡ଼ି ଜବତ କରାଯାଇଛି। ସେଥିରୁ ୨ଟି ହାଇୱା ଚଢ଼େଇଧରା ବିଟ୍ ହାଉସରେ ଅଟକ ରଖାଯାଇଛି। ଅନ୍ୟ ୬ଟି ଗାଡ଼ି ଧର୍ମଶାଳା ତହସିଲ କାର୍ଯ୍ୟାଳୟରେ ରଖାଯାଇଛି। ଜବତ ଗାଡ଼ିଗୁଡ଼ିକରୁ ଜରିମାନା ଆଦାୟ କରାଯିବ ବୋଲି ତହସିଲଦାର କହିଛନ୍ତି। ଡ୍ରାଇଭରଙ୍କୁ ମାଡ଼ ମାରିବା ନେଇ ତହସିଲଦାରଙ୍କୁ ପଚାରିବାରେ ସେ କାହାକୁ ମାଡ଼ ମାରି ନ ଥିବା ପ୍ରକାଶ କରିଛନ୍ତି। ଜେନାପୁର ଥାନାଧିକାରୀ ଉମାକାନ୍ତ ନାୟକ କହିଛନ୍ତି, ଚାଳକ ନିଜ ଦୋଷ ଢାଙ୍କିବାକୁ ଏପରି କରିଛନ୍ତି। ତେବେ ସମସ୍ତଙ୍କ ଉପସ୍ଥିତିରେ ସମସ୍ୟାର ଆପୋସ ସମାଧାନ କରାଯାଇଛି ବୋଲି ସେ ପ୍ରକାଶ କରିଛନ୍ତି।
