କେନ୍ଦୁଝର,୨୦ା୧୨(ନରେଶ ଚନ୍ଦ୍ର ପଟ୍ଟନାୟକ): ହାଟଡିହି ବ୍ଲକ ଅନ୍ତର୍ଗତ ଜଙ୍ଗଲ ମଧ୍ୟରେ ଥିବା କଅଁଳେଇ ବାଲିପାଳ ପଞ୍ଚାୟତର ପୁରାତନ ବସତି କଅଁଳେଇ ବାଲିପାଳ ଗ୍ରାମବାସୀ ଜଙ୍ଗଲ ଅଧିକାର ଆଇନ ଅନୁଯାୟୀ,ବ୍ୟକ୍ତିଗତ ଗୋଷ୍ଠୀଗତ ଅଧିକାର ସହ ତାଙ୍କ ଗ୍ରାମ ଜଙ୍ଗଲ କିସମ ମଧ୍ୟରେ ଥିବାରୁ ରାଜସ୍ବ ଗ୍ରାମରେ ପରିଣତ କରାଯାଉ ନ ଥିବାରୁ ଦ୍ୱିତୀୟ ଥର ଭୋଟ୍ବର୍ଜନ ପାଇଁ ଜିଲାପାଳଙ୍କୁ ଜନଶୁଣାଣିରେ ଦେଖା କରି ଲିଖିତ ଅଭିଯୋଗ କରିଛନ୍ତି। ଏଥି ସହିତ ରାସ୍ତା ଆଲୋକ ପିଇବା ପାଣି ସହ ସର୍ବନିମ୍ନ ସୁବିଧା ଆଜି ପର୍ଯ୍ୟନ୍ତ ପ୍ରଶାସନ ପକ୍ଷରୁ କରାଯାଇ ନ ଥିବାରୁ ଅଭିଯୋଗ ଦାଖଲ କରିଥିଲେ।
ସୂଚନାଯୋଗ୍ୟ, କନଲେଇ ବାଳିପାଲ ପଞ୍ଚାୟତର ୫ଟି ପୁରୁଣା ବସତିକୁ ଜଙ୍ଗଲ ଅଧିକାର ଆଇନ ଅନୁଯାୟୀ ରାଜସ୍ବ ଗ୍ରାମରେ ପରିଣତ ପାଇଁ ଦୀର୍ଘ ୩ ବର୍ଷରୁ ଅଧିକ ହେବ ଲିଖିତ ଅଭିଯୋଗ ସବୁ ବିଭାଗକୁ ଜଣାଇଛନ୍ତି। ଏପରିକି ମହାମହିମ ରାଷ୍ଟ୍ରପତିଙ୍କୁ ଲିଖିତ ଭାବେ ଜଣାଇବା ପରେ ରାଷ୍ଟ୍ରପତିଙ୍କ କାର୍ଯ୍ୟାଳୟରୁ ଓଡ଼ିଶା ମୁଖ୍ୟ ସଚିବଙ୍କୁ ପଦକ୍ଷେପ ଗ୍ରହଣ ପାଇଁ ଚିଠି ଆସିଛି।
ତେବେ ଅଦ୍ୟାବଧି ସେମାନଙ୍କୁ ନ୍ୟାୟ ମିଳୁ ନାହିଁ କିମ୍ବା ଦାବି ପୂରଣ ହେଉନାହିଁ। ପୂର୍ବ ବର୍ଷ ଭଳି ସେମାନେ ଭୋଟ୍ ବର୍ଜନ କରିବାକୁ ବାଧ୍ୟ ହେବେ ବୋଲି ବୁଦ୍ଧିରାମ ପୂର୍ତ୍ତି, ପ୍ରଫୁଲ୍ଲ ନାୟକ, ସୁନାରାମ ପୂର୍ତ୍ତି, ରୀତା ହୋ, ସୀଙ୍ଗରାୟଙ୍କ ପୂର୍ତ୍ତି ସମେତ ଲିଖିତ ଜିଲାପାଳଙ୍କୁ ଜଣାଇଛନ୍ତି।
