ଦିଗପହଣ୍ଡି,୨୪।୬(ଡି.ଏନ୍.ଏ.): ଗଞ୍ଜାମ ଜିଲା ଦିଗପହଣ୍ଡି ବ୍ଲକ କୈଠଡ଼ା ପଞ୍ଚାୟତ ଓଡ଼ାସିଙ୍ଗି ଗ୍ରାମର ମୁଖ୍ୟରାସ୍ତା ପାର୍ଶ୍ୱରେ ଥିବା ଏକ ଘରମଧ୍ୟରୁ ଜଣେ ବୃଦ୍ଧଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଛି। ସେ ହେଲେ କେ. କୋରା ରେଡ୍ଡୀ। ବୁଧବାର ପୂର୍ବାହ୍ନରେ ଦିଗପହଣ୍ଡି ପୋଲିସ ମୃତଦେହ ଉଦ୍ଧାର କରିଛି। ଏ ନେଇ କେସ୍ ନଂ.୮/୨୦ରେ ଏକ ମାମଲା ରୁଜୁ ହୋଇ ମୃତଦେହ ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ବଡ ଡ଼ାକ୍ତରଖାନାକୁ ପଠାଯାଇଥିବା ଆଇଆଇସି ବସନ୍ତ କୁମାର ସେଠୀ କହିଛନ୍ତି। ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତକାରଣ ଜଣାପଡ଼ିବ ବୋଲି ପୋଲିସ କହିଛି।
ସମ୍ପତ୍ତି ଭାଗବଣ୍ଟାକୁ କେନ୍ଦ୍ରକରି ଦୀର୍ଘଦିନ ଧରି କେ. କୋରା ତାଙ୍କ ସ୍ତ୍ରୀଙ୍କ ମଧ୍ୟରେ କଳହ ଲାଗିରହିଥିଲା। କେ. କୋରା ଘରେ ଏକୁଟିଆ ରହୁଥିଲା ବେଳେ ସ୍ତ୍ରୀ ଗୁଜରାଟର ସୁରଟ ଅଞ୍ଚଳରେ ତାଙ୍କ ପୁଅ ପାଖରେ ରହୁଥିଲେ। ଗତ କିଛିଦିନ ହେଲା ସ୍ତ୍ରୀ ଓ ପୁଅମାନେ ସୁରଟରୁ ଫେରିଥିଲେ। ଗାଁ ରେ ଥିବା ୨ ଟି ଘର ବିକ୍ରିକରି ଦିଗପହଣ୍ଡି କିମ୍ବା ବ୍ରହ୍ମପୁରରେ ରହିବାକୁ ପରିବାର ଲୋକେ ଚାହୁଁଥିବା ବେଳେ କୋରା ଗାଁ ଛାଡ଼ିବାକୁ ରାଜି ହେଉ ନ ଥିଲେ। ଫଳରେ ବୁଧବାର ଭୋର ସମୟରେ ପାରିବାରିକ କଳହ ଉଗ୍ରରୂପ ନେଇଥିଲା। ଘରେ ଅନ୍ୟକେହି ନ ଥିବା ବେଳେ ସ୍ବାମୀଙ୍କ ମାଡ଼ରେ ସ୍ତ୍ରୀ ଲହୁ ଲୁହାଣ ହୋଇ ଚେତାଶୂନ୍ୟ ହୋଇଯାଇଥିଲେ। ସ୍ତ୍ରୀଙ୍କ ଚେତା ଫେରିବା ପରେ ଦିଗପହଣ୍ଡିରେ ହୁଥିବା ଝିଅ ତିଳୋତ୍ତମାଙ୍କୁ ଘରକୁ ଡ଼କାଇଥିଲେ। ସ୍ତ୍ରୀଙ୍କ ମୃତ୍ୟୁ ଘଟିଥିବା ଆଶଙ୍କାରେ ମାନସିକ ଭାରସାମ୍ୟ ହରାଇ କୋରା ରଶି ଲଗାଇ ଆତ୍ମହତ୍ୟା କରିଥିବା ପୋଲିସର ପ୍ରାଥମିକ ତଦନ୍ତରୁ ଅନୁମାନ କରୁଛି। ପରେ ସ୍ତ୍ରୀ ଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ପ୍ରଥମେ ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ପରେ ବ୍ରହ୍ମପୁର ବଡ ଡ଼ାକ୍ତରଖାନାକୁ ସ୍ଥାନାନ୍ତରିତ କରାଯାଇଛି।
