କେନ୍ଦ୍ରାପଡ଼ା ଅଫିସ, ୨୮। ୮: କେନ୍ଦ୍ରାପଡ଼ା ଜିଲାରେ ଗତ ତିନିଦିନ ମଧ୍ୟରେ ୧୮୮୦ ମିଲିମିଟର ବର୍ଷା ହୋଇଛି। ଏଥିସହିତ ମହାନଦୀ, ବ୍ରାହ୍ମଣୀ ଓ ବୈତରଣୀ ସିଷ୍ଟମରେ ଥିବା ଜିଲାର ୭ ନଦୀ ଓ ୨୭ ଶାଖା ନାଳରେ ବନ୍ୟା ଜଳ ପ୍ରବେଶ କରିଛି। ଫଳରେ ଜିଲାର ୫୫ ପଞ୍ଚାୟତରେ ବନ୍ୟା ପରିସ୍ଥିତି ସୃଷ୍ଟି ହୋଇଥିବା ବେଳେ ପ୍ରାୟ ୯୦ ହଜାର ହେକ୍ଟର ଜମି ପାଣି ଘେରରେ ଅଛି। ମହାକାଳପଡା, ରାଜନଗର, ଆଳି, ପଟ୍ଟାମୁଣ୍ଡାଇ, ରାଜକନିକା ଆଦି ବ୍ଲକର ଶତାଧିକ ଗ୍ରାମକୁ ଯୋଗାଯୋଗ ବ୍ୟାହତ ହୋଇଛି ା ଏହି ସମସ୍ତ ଗ୍ରାମକୁ ଆମ୍ବୁଲାନ୍ସ, ଫାୟାର ସର୍ଭିସ ପରି ଜରୁରୀ ସେବା ପହଞ୍ଚିପାରୁ ନାହିଁ। ସେହିପରି ଚିହ୍ନଟ ହୋଇଥିବା ୨୪ ଦୁର୍ବଳ ନଦୀବନ୍ଧ ସ୍ଥାନ ସହିତ ଚଳିତ ବର୍ଷାରେ ନଷ୍ଟ ହୋଇଥିବା ନଦୀବନ୍ଧ ନିକଟବର୍ତ୍ତୀ ଗ୍ରାମର ଅଧିବାସୀଙ୍କୁ ବନ୍ୟା ଆଶଙ୍କା ଘାରିଛି। ଅପରପକ୍ଷେ ଜିଲା ପ୍ରଶାସନ ପକ୍ଷରୁ ଗୋଟିଏ ଏନ୍ଡିଆର୍ଏଫ୍ ଟିମ୍ ମହାକାଳପଡ଼ା ବ୍ଲକ ଅଞ୍ଚଳରେ ମୁତୟନ କରାଯାଇଥିବା ବେଳେ ଜିଲାର ବିଭିନ୍ନ ଅଧିକାରୀ ବନ୍ୟା ପରିସ୍ଥିତିର ସମୀକ୍ଷା କରୁଛନ୍ତି ା ଜିଲା ଜଳସମ୍ପଦ ବିଭାଗ ତଥ୍ୟ ଅନୁଯାୟୀ, ପୂର୍ବାହ୍ନ ୧୧ଟା ସୁଦ୍ଧା ଲୁଣା ନଦୀର ଜଳସ୍ତର ଦାନପୁର ଓ ମାର୍ଶାଘାଇଠାରେ ବିପଦ ସଙ୍କେତଠାରୁ ୪ ଫୁଟ ତଳେ ଅଛି। ଚିତ୍ରୋତ୍ପଳା ନଦୀର ଜଳସ୍ତର ପାଟକୁରାଠାରେ ବିପଦ ସଙ୍କେତଠାରୁ ୩ ଫୁଟ ତଳେ ଅଛି। ବ୍ରାହ୍ମଣୀ ନଦୀର ଜଳସ୍ତର ଇନ୍ଦୁପୁରଠାରେ ବିପଦ ସଙ୍କେତଠାରୁ ୧ମିଟର କମ୍ ଥିବାବେଳେ ଅଳଭାଠାରେ ବିପଦ ସଙ୍କେତ ଉପରେ ଅଛି। ଏହି ସବୁ ନଦୀରେ ବନ୍ୟା ଜଳ କ୍ରମଶ ବଢ଼ୁଥିବା ବେଳେ ପାଇକା, ଗୋବରୀ, ମହାନଦୀ, ଖରସ୍ରୋତା, ହଂସୁଆ ଆଦିର ଜଳସ୍ତର ବଢ଼ିଚାଲିଛି। ସେହିପରି ଗୋବରୀ ନଦୀ କେନ୍ଦ୍ରାପଡା ସହରାଞ୍ଚଳର ଦୁର୍ଦ୍ଦଶା ବଢ଼ାଇଛି। ଜିଲା ଜରୁରିକାଳୀନ ବିଭାଗ ତଥ୍ୟ ଅନୁଯାୟୀ, ବ୍ରାହ୍ମଣୀ ସିଷ୍ଟମରେ ଥିବା ବଙ୍ଗାଳିଢ଼ଇ, ସତୁପୁର, ନନ୍ଦିନୀନଗର, ଷଣ୍ଢପଲ୍ଲୀ, ନୀଳକଣ୍ଠପୁର, ଖଡିପାଳ, ଆଗେଡିଆ, ବାଲିପାଟଣା, ବଛରା, ମାଣ୍ଡପଡା ଆଦି ଅଞ୍ଚଳ ବନ୍ୟାଜଳ ଦ୍ୱାରା ବିଶେଷ କ୍ଷତି ହୋଇପାରେ। ସେହିପରି ଆଳି, ରାଜନଗର, ରାଜକନିକା, ମହାକାଳପଡା ବ୍ଲକର ୧୫୩ ଗଁାକୁ ବନ୍ୟାଜଳ ପଶିବା ସମ୍ଭାବନା ଅଛି। ଏଥିପାଇଁ ପ୍ରଶାସନିକ ବ୍ୟବସ୍ଥାକୁ ତ୍ୱରାନ୍ବିତ କରାଯାଇଥିବା ଜରୁରିକାଳୀନ ଅଧିକାରୀ ସମ୍ବିତ କୁମାର ଶତପଥୀ କହିଛନ୍ତି ା ଅପରପକ୍ଷେ ଜଳ ନିଷ୍କାସନ ହୋଇପାରି ନଥିବାରୁ କୃଷକ ନେତା ଗୟାଧର ଧଳ, ହଳଧର ଦାଶ, ବିଧୁଭୂଷଣ ମହାପାତ୍ର ପ୍ରମୁଖ କ୍ଷୋଭ ପ୍ରକାଶ କରିଛନ୍ତି ା ସେମାନେ କହିଛନ୍ତି, ଲଘୁଚାପ ବର୍ଷାରେ ୧୦ଦିନ ଧରି ପାଣି ଜମିରହି ଫସଲ ନଷ୍ଟ ହୋଇଛି। ତୁରନ୍ତ ଚାଷୀଙ୍କୁ କ୍ଷତିପୂରଣ ନ ମିଳିଲେ ବିଭିନ୍ନ କୃଷକ ସଂଗଠନ ପକ୍ଷରୁ ଆନ୍ଦୋଳନ ହେବ। ଜିଲାପାଳ ସମର୍ଥ ବର୍ମା କହିଛନ୍ତି, ସମ୍ଭାବ୍ୟ ବନ୍ୟା ପ୍ରତି ସତର୍କ ଦୃଷ୍ଟି ରଖାଯାଇଛି। ପ୍ରଶାସନିକ ଅଧିକାରୀ ଏହାର ତଦାରଖ କରୁଛନ୍ତି। ଜଳ ନିଷ୍କାସନ ସରିବା ପରେ ରାଜସ୍ବ ଓ କୃଷି ବିଭାଗ ପକ୍ଷରୁ ତଦନ୍ତ ହେବ।
