ଭୁବନେଶ୍ୱର, ୨୦ା୪(ବ୍ୟୁରୋ): ନିୟନ୍ତ୍ରଣକୁ ଆସୁନି ତାତି। ଆଜି କମିବ କାଲି କମିବ ଶୁଣି ଶୁଣି ମନ ଭାଙ୍ଗିଗଲାଣି। କେବେ ତାତିରୁ ତ୍ରାହି ମିଳିବ ତାହା କହିବା ମୁସ୍କିଲ। ବେଳକୁ ବେଳ ଅସହ୍ୟ ହେଉଛି ଗ୍ରୀଷ୍ମର ଜ୍ୱାଳା। ପାଣିପାଗ ଅନୁମାନ ମଧ୍ୟ କାମ କରୁନି। ସାରା ରାଜ୍ୟରେ ଖରାର ପ୍ରକୋପ ଅସମ୍ଭାଳ କରି ପକାଇଛି। ପ୍ରତ୍ୟେକ ଦିନ ୧ରୁ ୨ ଡିଗ୍ରୀ ତାପମାତ୍ରା ବଢ଼ିଯାଉଛି। ପ୍ରଚଣ୍ଡ ଗ୍ରୀଷ୍ମ ସାଙ୍ଗକୁ ଗୁଳୁଗୁଳି ଜନଜୀବନକୁ ଅସ୍ତବ୍ୟସ୍ତ କରିଛି। ସକାଳ ୮ଟାରୁ ମାଡ଼ିଆସୁଛି ପ୍ରଚଣ୍ଡ ଗ୍ରୀଷ୍ମ। ସନ୍ଧ୍ୟା ୬ଟା ଯାଏ ମଧ୍ୟ ଗରମ ପବନରୁ ନିସ୍ତାର ମିଳୁନି। ରାତିରେ ଖରା ନ ଥିଲେ ମଧ୍ୟ ଗୁଳୁଗୁଳି କଲବଲ କରୁଛି। ଫ୍ୟାନ୍ ପବନ କାମ ଦେଉନାହିଁ। ମଣିଷ, ଜୀବଜନ୍ତୁ ସମସ୍ତେ ଛଟପଟ। ଭାରତୀୟ ପାଣିପାଗ ବିଭାଗ ସୂଚନା ଅନୁଯାୟୀ ୨୨ ତାରିଖ ଯାଏ ତାତି ପ୍ରକୋପ ଜାରି ରହିବ। ଗୁରୁବାର ଖୋର୍ଦ୍ଧା, କଟକ, ମୟୂରଭଞ୍ଜ, କେନ୍ଦୁଝର, ସୁନ୍ଦରଗଡ଼, ସମ୍ବଲପୁର, ସୋନପୁର, ବୌଦ୍ଧ, ବଲାଙ୍ଗୀର, ଦେବଗଡ଼ ଏବଂ ଅନୁଗୋଳର କେତେକ ସ୍ଥାନରେ ପ୍ରଚଣ୍ଡ ଗ୍ରୀଷ୍ମ ଲହରି ଜାରି ରହିବ। ଏନେଇ ପାଣିପାଗ ବିଭାଗ ପକ୍ଷରୁ ୟେଲୋଓ୍ବାର୍ନିଂ ଜାରି କରାଯାଇଛି। ବୁଧବାର ରାଜ୍ୟର ୧୬ଟି ସହରରେ ତାପମାତ୍ରା ୪୨ ଡିଗ୍ରୀ ସେଲ୍ସିୟସ ଉପରେ ରହିଥିବା ବେଳେ ୨ଟି ସ୍ଥାନରେ ସର୍ବୋଚ୍ଚ ତାପମାତ୍ରା ୪୪ ଡିଗ୍ରୀ ଉପରେ ରହିଛି ା ସେହିପରି ୧୦ଟି ସ୍ଥାନରେ ପାରଦ ୪୩ ଡିଗ୍ରୀ ସେଲ୍ସିୟସ ଉପରେ ରହିଛି।
ଆଞ୍ଚଳିକ ପାଣିପାଗ କାର୍ଯ୍ୟାଳୟ ସୂଚନା ଅନୁଯାୟୀ ବାରିପଦାରେ ସର୍ବାଧିକ ତାପମାତ୍ରା ୪୪.୫ ଡିଗ୍ରୀ ସେଲ୍ସିୟସ ରେକର୍ଡ କରାଯାଇଥିବା ବେଳେ ନୂଆପଡ଼ା ୪୪.୪, ବଲାଙ୍ଗୀର ୪୪, ବୌଦ୍ଧ ୪୩.୯, ତାଳଚେର ୪୩.୮, ଅନୁଗୋଳ ୪୩.୭, ଝାରସୁଗୁଡ଼ା ୪୩.୬, ରାଉରକେଲା ୪୩.୩, ସମ୍ବଲପୁର ୪୩.୨, ଟିଟିଲାଗଡ଼ ୪୩.୧, ସୁନ୍ଦରଗଡ଼ ୪୩, ସୋନପୁର ୪୨.୫, ଭୁବନେଶ୍ୱର ୪୨.୫, ଭବାନୀପାଟଣା ୪୨.୫, ହୀରାକୁଦ ୪୨.୪, କଟକ ୪୨.୨, ଢେଙ୍କାନାଳ ୪୨, ନୟାଗଡ଼ ୪୨, ପାରଳାଖେମୁଣ୍ଡି ୪୧.୮, କେନ୍ଦ୍ରାପଡ଼ା ୪୧.୮, ଜଗତ୍ସିଂହପୁର ୪୧.୫, ଦେବଗଡ଼ ୪୧.୪, ଯାଜପୁର ୪୧, କେନ୍ଦୁଝର ୪୧, ଭଦ୍ରକ ୪୧, ଚାନ୍ଦବାଲି ୪୦.୯, ମାଲକାନଗରି ୪୦.୯, ବରଗଡ଼ ୪୦.୬, ଖୋର୍ଦ୍ଧା ୪୦.୫ ଏବଂ ରାୟଗଡ଼ାରେ ସର୍ବାଧିକ ତାପମାତ୍ରା ୪୦.୫ ଡିଗ୍ରୀ ସେଲ୍ସିୟସ ରେକର୍ଡ କରାଯାଇଛି।
