ଦୁବାଇ,୩୦।୬: ଆଇସିସି ଟି -୨୦ବିଶ୍ୱକପ ଆୟୋଜନ ବିଷୟରେ ସୂଚନା ଦେଇଛି। ୟୁଏଇ ବ୍ୟତୀତ ଏହି ଟୁର୍ନାମେଣ୍ଟ ଓମାନରେ ମଧ୍ୟ ଅନୁଷ୍ଠିତ ହେବ ବୋଲି ଆଇସିସି ଟୁଇଟର୍ ମାଧ୍ୟମରେ ଜଣାଇଛି। କରୋନା କାରଣରୁ, ବିସିସିଆଇ ଆନୁଷ୍ଠାନିକ ଭାବେ ଆଇସିସିକୁ ଗୋଟିଏ ଦିନ ପୂର୍ବରୁ ସୂଚନା ଦେଇଥିଲା। ଅକ୍ଟୋବର ୧୭ ରୁ ଟି-୨୦ ବିଶ୍ୱକପ ୨୦୨୧ଆରମ୍ଭ ହେବ। ନଭେମ୍ବର ୧୪ ରେ ଫାଇନାଲ ଖେଳାଯିବ। ଟି -୨୦ ବିଶ୍ୱକପ ପୂର୍ବରୁ ଆଇପିଏଲର ଅବଶିଷ୍ଟ ୩୧ଟି ମ୍ୟାଚ ମଧ୍ୟ ୟୁଏଇରେ ଅନୁଷ୍ଠିତ ହେବ। ବିସିସିଆଇ ବିଶ୍ୱକପ୍ର ଆୟୋଜକ ଭାବେ କାର୍ଯ୍ୟ ଜାରି ରଖିବ।
ଆଇସିସି ଏକ ବିବୃତ୍ତି ଜାରି କରି କହିଛି ଯେ ଟୁର୍ନାମେଣ୍ଟର ମ୍ୟାଚ ଦୁବାଇ, ଶାରଜା, ଆବୁଧାବି ବ୍ୟତୀତ ଓମାନରେ ଅନୁଷ୍ଠିତ ହେବ। ଏହି ଟୁର୍ନାମେଣ୍ଟରେ ମୋଟ ୧୬ଟି ଦଳ ଅଂଶଗ୍ରହଣ କରୁଛନ୍ତି। ଯୋଗ୍ୟତା ପର୍ଯ୍ୟାୟରେ ୮ଟି ଦଳକୁ ଦୁଇଟି ଦଳରେ ବିଭକ୍ତ କରାଯିବ। ଗୋଟିଏ ଗ୍ରୁପ୍ର ମ୍ୟାଚ ୟୁଏଇରେ ଥିବାବେଳେ ଅନ୍ୟ ଦଳର ମ୍ୟାଚ ଓମାନରେ ହେବ। ଉଭୟ ଦଳର ଟପ-୨ ଦଳ ସୁପର -୧୨ କୁ ଯିବେ। ୨୦୧୬ ଠାରୁ ପ୍ରଥମ ଥର ପାଇଁ ଏହି ଟୁର୍ନାମେଣ୍ଟ ଆୟୋଜିତ ହେଉଛି। ଗତ ସିଜିନର ଫାଇନାଲରେ ୱେଷ୍ଟଇଣ୍ଡିଜ ଇଂଲଣ୍ଡକୁ ପରାସ୍ତ କରିଥିଲା।
ବାଂଲାଦେଶ, ଶ୍ରୀଲଙ୍କା, ଆୟର୍ଲାଣ୍ଡ, ନେଦରଲ୍ୟାଣ୍ଡ, ସ୍କଟଲ୍ୟାଣ୍ଡ, ନାମିବିଆ, ଓମାନ ଏବଂ ପାପୁଆ ନ୍ୟୁ ଗିନିର ଦଳ ଯୋଗ୍ୟତା ପର୍ଯ୍ୟାୟରେ ପ୍ରବେଶ କରିବେ। ଆଇସିସି ସିଇଓ ଜିଓ ଆଲାର୍ଡାଇସ କହିଛନ୍ତି ଯେ ଆମର ଲକ୍ଷ୍ୟ ହେଉଛି ଟି -୨୦ ବିଶ୍ୱକପ ଚଳିତ ସିଜନରେ ସମ୍ପୂର୍ଣ୍ଣ ସୁରକ୍ଷା ସହିତ ଅନୁଷ୍ଠିତ ହେବ। ତେବେ ଏହି କାର୍ଯ୍ୟକ୍ରମ ଭାରତରେ ଆୟୋଜିତ ହେଉ ନ ଥିବାରୁ ଆମେ ନିରାଶ ହୋଇଛୁ ବୋଲି ସେ କହିଛନ୍ତି।
