ନୂଆଦିଲ୍ଲୀ,୩୦।୬: ଦେଶରେ କରୋନା ମହାମାରୀ ସଂକ୍ରମଣ ଯୋଗୁ ମୃତ୍ୟୁ ଘଟିଥିବା ମୃତକଙ୍କ ପରିବାର ସଦସ୍ୟଙ୍କୁ ଅନୁକମ୍ପାମୂଳକ ଆର୍ଥିକ ସହାୟତା ଯୋଗାଇ ଦେବା ନେଇ ସୁପ୍ରିମ୍କୋର୍ଟ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଜାରି କରିଛନ୍ତି। ତେବେ ଅନୁକମ୍ପାମୂଳକ ଆର୍ଥିକ ସହାୟତା କେତେ ଟଙ୍କା ଦିଆଯିବ ତାହା କେନ୍ଦ୍ର ସରକାରଙ୍କୁ ନିଶ୍ଚିତ କରିବାକୁ ସର୍ବୋଚ୍ଚ ନ୍ୟାୟାଳୟ ନିର୍ଦ୍ଦେଶ ଦେଇଛନ୍ତି। ପୂର୍ବରୁ ୪ ଲକ୍ଷ ଟଙ୍କାର କ୍ଷତି ପୂରଣ ଦେବାକୁ କୁହାଯାଇଥିଲା। ତେବେ ଏନେଇ ସରକାର ସତ୍ୟପାଠ ଦାଖଲ କରି ଏଭଳି କରି ହେବ ନାହିଁ ବୋଲି କହିଥିଲେ। କରୋନା ମୃତକ ପରିବାରକୁ ସର୍ବନିମ୍ନ କେତେ ଟଙ୍କାର ଅନୁକମ୍ପାମୂଳକ ଆର୍ଥିକ ସହାୟତା ପ୍ରଦାନ କରାଯିବ ତାହା ସରକାର ନିଶ୍ଚିତ କରିବା ସହିତ ମୃତକଙ୍କ ମୃତ୍ୟୁ ପ୍ରମାଣ ପତ୍ର ପ୍ରକିୟାକୁ ସରଳ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଜାତୀୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ ଅନୁକମ୍ପାମୂଳକ ଆର୍ଥିକ ସହାୟତା ପରିମାଣ ନେଇ ନିଷ୍ପତ୍ତି ଶୀଘ୍ର ଗ୍ରହଣ କରିବାକୁ କୋର୍ଟ କହିଛନ୍ତି। ଏନେଇ ୬ ସପ୍ତାହ ମଧ୍ୟରେ ଆବଶ୍ୟକ ମାର୍ଗଦର୍ଶିକା ପ୍ରସ୍ତୁତ କରି ବିଭିନ୍ନ ରାଜ୍ୟ ସରକାରଙ୍କ ଲାଗି ଜାରି କରିବାକୁ ସୁପ୍ରିମ୍କୋର୍ଟ ନିର୍ଦ୍ଦେଶ ଦେଇଛନ୍ତି।
