ନୟାଗଡ ଅଫିସ,୨୯।୧: ହାଇକୋର୍ଟଙ୍କ ନିର୍ଦ୍ଦେଶ ଅନୁସାରେ ଗୁରୁବାର ଚିନିକଳ ସମ୍ପତ୍ତିର ପୁନଃ ଆକଳନ କରାଯାଇଛି । ମାଜିଷ୍ଟ୍ରେଟ ନୟାଗଡ ଉପଜିଲାପାଳ ଲଗ୍ନଜିତ୍ ରାଉତ ଓ ନୟାଗଡ଼ ତହସିଲଦାର ଭିକାରୀ ସାହୁଙ୍କ ସମେତ ଆକଳନ ଟିମ୍ ଚିନିକଳରେ ପହଞ୍ଚିବା ପରେ ସେମାନଙ୍କୁ ଘେର ବିରୋଧର ସମ୍ମୁଖୀନ ହେବାକୁ ପଡିଥିଲା । ଆନ୍ଦୋଳନରତ କଂଗ୍ରେସ ନେତା ଓ କର୍ମୀମାନେ ଏହି ଟିମ୍କୁ ଭିତରକୁ ଛାଡି ନ ଥିଲେ । ପ୍ରାୟ ୨୦ମିନିଟ୍ ଧରି ଆଲୋଚନା ଚାଲିଥିଲା ।ପ୍ରଥମ ସମ୍ପତ୍ତି ଆକଳନ ରିପୋର୍ଟ ସୋମବାର ଦିଆଯିବ ବୋଲି ଉପଜିଲାପାଳ ଓ ଚିନିକଳର ପରିଚାଳନା ନିର୍ଦ୍ଦେଶକ ସବୀର ପଣ୍ଡା ପ୍ରତିଶ୍ରୁତି ଦେବା ପରେ କଂଗ୍ରେସ ପକ୍ଷରୁ ଧାରଣା ପ୍ରତ୍ୟାହୃତ ହୋଇଥିଲା । ଧାରଣା ହଟିବା ପରେ ଆସ୍କା ଚିନିକଳର ୩ ଜଣିଆ ବୈଷୟିକ ଟିମ୍ ଯାଞ୍ଚ କରି ସମ୍ପତ୍ତି ତାଲିକା ପ୍ରସ୍ତୁତ କରିଥିଲେ ।
ଯାଞ୍ଚ ସମୟରେ ଚିନିକଳର ବହୁ ଯନ୍ତ୍ରାଂଶ ନ ଥିବା ଜଣାପଡିଛି । ଯାଞ୍ଚର ଶେଷ ପର୍ଯ୍ୟାୟରେ ନୟାଗଡ ଜିଲାପାଳ ପୋମା ଟୁଡୁ ପହଞ୍ଚି ପରିସ୍ଥିତି ଅନୁଧ୍ୟାନ କରିଥିଲେ । ଏସ୍ପି ସିଦ୍ଧାର୍ଥ କଟାରିଆ, ନୟାଗଡ ସଦର ଥାନା ଆଇଆଇସି ଶରତ ପାତ୍ର ପ୍ରମୁଖ ଉପସ୍ଥିତ ଥିଲେ । ଆଇନଶୃଙ୍ଖଳା ପରିସ୍ଥିତିକୁ ଏଡାଇବା ପାଇଁ ୨ ପ୍ଲାଟୁନ ଫୋର୍ସ ମୁତୟନ କରାଯାଇଥିଲା। ଏନେଇ ନୟାଗଡ ଜିଲାପାଳ ଟୁଡୁ କହିଛନ୍ତି, ହାଇକୋର୍ଟଙ୍କ ନିର୍ଦ୍ଦେଶ ଅନୁସାରେ ଗୁରୁବାର ଚିନିକଳର ପୁନଃ ସମ୍ପତ୍ତି ତାଲିକା ଆକଳନ କରାଯାଇଛି। ପ୍ରଥମ ଆକଳନ ଓ ଦ୍ୱିତୀୟ ଆକଳନକୁ ଅନୁଧ୍ୟାନ କଲାପରେ ଜଣାପଡିବ କେଉଁ ଯନ୍ତ୍ରାଂଶ ଚୋରି ହୋଇଛି । ଚିନିକଳରୁ ଚୋରି ନେଇ ନୟାଗଡ ସଦର ଥାନା ପକ୍ଷରୁ ମାମଲା ରୁଜୁ କରାଯାଇ କେତେଜଣ ଚୋରଙ୍କୁ ଗିରଫ କରାଯାଇଛି । ଚିନିକଳର ମାମଲା ହାଇକୋର୍ଟରେ ବିଚାରଧୀନ ଥିବାରୁ ସମ୍ପତ୍ତି ଆକଳନ ନେଇ କିଛି କହିବା ଠିକ୍ ହେବ ନାହିଁ ବୋଲି ସେ କହିଛନ୍ତି ।
ଏସ୍ପି କଟାରିଆ କହିଛନ୍ତି, ଚିନିକଳରୁ ଚୋରି ନେଇ ୩ ମାମଲାରେ ୧୩ ଜଣଙ୍କୁ ଗିରଫ କରାଯାଇ କୋର୍ଟଚାଲାଣ କରାଯାଇଛି । ୨ ଚାର୍ଜଶିଟ୍ ହୋଇଛି । ଯଦି ଚୋରି ହେଉଛି ଥାନାରେ ଅଭିଯୋଗ କରନ୍ତୁ । ଚିନିକଳର ସୁରକ୍ଷା ପାଇଁ ସିସିଟିଭି କ୍ୟାମେରା ଲାଗିଛି । ଜିଲାପାଳ ଓ ମୁଁ ଜଏଣ୍ଟ ଭେରିଫିକେଶନ କରିଛୁ । ଗାର୍ଡ ପୋଷ୍ଟ କରି ୬ଜଣ ପୋଲିସ ମୁତୟନ ଅଛନ୍ତି । ଚିନିକଳର ଡେପୁଟି ମ୍ୟାନେଜିଂ ଡାଇରେକ୍ଟର ସବ୍ୟସାଚୀ ମିଶ୍ର କହିଛନ୍ତି, ଚିନିକଳ ସମ୍ପର୍କରେ ଯାହା ଅଭିଯୋଗ ଅଛି କୋର୍ଟରେ କହିବୁ। ଚିନିକଳକୁ ଆମେ ଲିଜ୍ ନେଇ ନ ଥିଲୁ। ସେଲ ପର୍ଚେ୍ସ ଏଗ୍ରିମେଣ୍ଟରେ ୫କୋଟି ୨୨ ଲକ୍ଷ ଟଙ୍କାରେ କିଣିଥିଲୁ । ତେବେ ପଟ୍ଟା କି ଆରଓ ଏଯାବତ ମିଳିନାହିଁ । ମୁଁ ଟେକ୍ନିକାଲ ଲୋକ ନୁହେଁ ତେବେ ସମ୍ପତ୍ତି ଆକଳନ ଦେଖି ମୁଁ ଜାଣି ପାରିଛି ପ୍ରାୟ ୩୦ରୁ ୪୦ କୋଟିି ଟଙ୍କାର ଉପକରଣ ଚୋରି ହୋଇ ଯାଇଛି। ଅନ୍ୟପକ୍ଷେ ସେ କହିଛନ୍ତି ନୟାଗଡ ଚିିନକଳରେ ଯାହା ଉପକରଣ ଅଛି ତାହା ନୟାଗଡ ସୁଗାରସ୍ ଲିମିଟେଡର। ନୟାଗଡ କୋପରେଟିଭ୍ ସୁଗାରସ୍ ଲିମିଟେଡ ଆସି ଗତ ମାର୍ଚ୍ଚରେ ଚିନିକଳର ସମ୍ପତ୍ତି ହିସାବ କରିଥିଲେ । ମାର୍ଚ୍ଚ ୧୨ରେ ସମ୍ପତ୍ତି ଆକଳନ କରି ପ୍ରଶାସନ ସିଲ୍ କରିଦେଲା । ତେବେ ସିଲ୍ ପରେ ସୁରକ୍ଷା ନ ଦେବାରୁ ଚିିନିକଳରୁ କୋଟି କୋଟି ଟଙ୍କାର ଉପକରଣ ଚୋରି ହୋଇଗଲା । ସୁରକ୍ଷା ନ ଦେଇ ହାଇକୋର୍ଟଙ୍କ ନିର୍ଦ୍ଦେଶକୁ କାହିଁକି ଅପେକ୍ଷା କରାଗଲା ବୋଲି ପ୍ରଶ୍ନବାଚୀ ସୃଷ୍ଟି ହୋଇଛି। ଏଣୁ ଏହା ଯୋଜନାବଦ୍ଧ ଭାବେ ଚୋରି ବୋଲି ସ୍ପଷ୍ଟ ହେଉଛି ବୋଲି ସେ କହିଛନ୍ତି। ଚିନିକଳର ଚାବି ନେବାକୁ ଜିଲାପାଳଙ୍କ ପରାମର୍ଶକୁ ବ୍ୟାଙ୍କ ଗ୍ରହଣ କରି ନାହିଁ । ବ୍ୟାଙ୍କ ପକ୍ଷର କୁହାଯାଇଛି ଆମେ ସମ୍ପତ୍ତି ଆକଳନରେ ସାକ୍ଷୀ ପଡିଛୁ। ତେବେ ଆମେ ୩୧ ଓ ୩୪ ଧାରାରେ ସମ୍ପତ୍ତି ନିଲାମ କରି ପାରିବୁ । ସମ୍ପତ୍ତି ଆକଳନ କରିବା ଆମର କ୍ଷମତା ନାହିଁ। ଆମକୁ ଚାବି ଦିଅନ୍ତୁ ନାହିଁ । ପ୍ରଥମ ଥର ଆକଳନରେ ଚାବି ଆମକୁ ଜୋର ଜବରଦସ୍ତ ଦିଆଯାଇଥିଲା। ଆମେ ଫେରାଇ ଥିଲେ ମଧ୍ୟ କେହି ନେଇ ନ ଥିଲେ ବୋଲି ମ୍ୟାନେଜିଂ ଡାଇରେକ୍ଟର ମିଶ୍ର କହିଛନ୍ତି । ଜିଲା କଂଗ୍ରେସ ସଭାପତି ରଣଜିତ ଦାଶ କହିଛନ୍ତି, ଚିନିକଳର ୨ ସମ୍ପତ୍ତି ତାଲିକା ଆକଳନ ରିପୋର୍ଟକୁ କଂଗ୍ରେସ ଅନୁଧ୍ୟାନ କରିବ । ରାଜନୈତିକ ଇଚ୍ଛାଶକ୍ତି ଅଭାବରୁ ଚିନିକଳର ପୁନରୁଦ୍ଧାର ହୋଇପାରିଲା ନାହିଁ । କଂଗ୍ରେସ ଏହାର ଅନୁଧ୍ୟାନ କରିବା ପରେ ପରବର୍ତ୍ତୀ ପଦକ୍ଷେପ ନେବ।
