ଦିଗପହଣ୍ଡି, ୧୦।୯ (ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ସହରର ଗଣପର୍ବ ଭାବେ ପରିଚିତ ମା’ ବୁଢ଼ୀ ଠାକୁରାଣୀଙ୍କ ଶାରଦୀୟ ଯାତ୍ରା ମହୋତ୍ସବ ପରିଚାଳନା ନିମନ୍ତେ ଏକ ଯାତ୍ରା କମିଟି ଗଠନ କରାଯାଇଛି। ଏନେଇ ମା’ ବୁଢ଼ୀ ଠାକୁରାଣୀଙ୍କ ମନ୍ଦିର ପ୍ରାଙ୍ଗଣରେ ଏକ ଆଲୋଚନା ସଭା ଅନୁଷ୍ଠିତ ହୋଇଥିଲା। କାଉନସିଲର ନୀଳମାଧବ ଗୌଡ଼ ସଭାରେ ଅଧ୍ୟକ୍ଷତା କରିଥିଲେ।
ଆସନ୍ତା ଅକ୍ଟୋବର ୧୭ ତାରିଖ ଆଶ୍ୱିନ ଶୁକ୍ଳ ମହାସପ୍ତମୀଠାରୁ ୨୫ ତାରିଖ ଆଶ୍ୱିନ ଶୁକ୍ଳ କୁମାର ପୂର୍ଣ୍ଣିମା ପର୍ଯ୍ୟନ୍ତ ୮ ଦିନ ଧରି ମା’ଙ୍କ ଶାରଦୀୟ ଯାତ୍ରା ମହୋତ୍ସବ ଆୟୋଜନ ନେଇ ସଭାରେ ବିସ୍ତୃତ ଆଲୋଚନା ହୋଇଥିଲା।
ଚଳିତବର୍ଷର ଯାତ୍ରା ମହୋତ୍ସବ ପରିଚାଳନା ନିମନ୍ତେ ସର୍ବସମ୍ମତିକ୍ରମେ ବିଚିତ୍ରାନନ୍ଦ ପଟ୍ଟନାୟକଙ୍କୁ ସଭାପତି ଭାବେ ଚୟନ କରାଯାଇଥିବା ବେଳେ ଏ. ସୁଶାନ୍ତଙ୍କୁ ଉପସଭାପତି, କାଉନସିଲର ଦୀପକ କୁମାର ମିଶ୍ରଙ୍କୁ ସମ୍ପାଦକ, ଶିବଶଙ୍କର ମହାରଣାଙ୍କୁ ସହସମ୍ପାଦକ, ଆଶିଷ କୁମାର ପଟ୍ଟନାୟକଙ୍କୁ କୋଷାଧ୍ୟକ୍ଷ, କେ. ରାଜେନ୍ଦ୍ର ସାହୁଙ୍କୁ ସହକୋଷାଧ୍ୟକ୍ଷ ଏବଂ ସତ୍ୟନାରାୟଣ ଦାଶଙ୍କୁ ପରିମଳ ପରିଚାଳନା କମିଟିର ମୁଖ୍ୟ ଭାବେ ମନୋନୀତ କରାଯାଇଛି।
ସେହିପରି ଏନଏସି ଅଧ୍ୟକ୍ଷ ପ୍ରଫୁଲ୍ଲ ପଣ୍ଡା, ସାମାଜିକ କର୍ମୀ ଶିବଶଙ୍କର ମହାଙ୍କୁଡ, ଅର୍ଦ୍ଦୁ. ଗୋବିନ୍ଦ, କୁରେଶୁ ମହାରଣା, ପ୍ରଦୀପ କୁମାର ପଣ୍ଡା, କାଉନସିଲର ନୀଳମାଧବ ଗୌଡ଼, ପଞ୍ଚାନନ ସୱାଇଁ, ରବୀନ୍ଦ୍ର କୁମାର ମାର୍ଥା, କେ. କୁନା ଏବଂ ଦୁର୍ଗା ପ୍ରସାଦ ମେକାପଙ୍କୁ ନେଇ ଏକ ଉପଦେଷ୍ଟା ମଣ୍ଡଳୀ ଗଠନ କରାଯାଇଛି।
ମୁଖ୍ୟ ପୁରୋହିତ ପଣ୍ଡିତ ସନାତନ ରଥ ଶର୍ମାଙ୍କ ପରାମର୍ଶକ୍ରମେ ଆସନ୍ତା ସେପ୍ଟେମ୍ବର ୨୩ ତାରିଖ ରାତିରେ ବଜାର ସାହି ଗାନ୍ଧୀ ଛକସ୍ଥିତ ଅସ୍ଥାୟୀ ଯାତ୍ରାପୀଠକୁ ଶୁଭଖୁଣ୍ଟି ଅଣାଯିବ ବୋଲି ସଭାରେ ନିଷ୍ପତ୍ତି ହୋଇଛି।
ପ୍ରତିବର୍ଷ ଭଳି ଚଳିତବର୍ଷ ମଧ୍ୟ ପ୍ରତିଦିନ ସନ୍ଧ୍ୟାରେ ମା’ଙ୍କ ଘଟ ଶୋଭାଯାତ୍ରା ସହରର ବିଭିନ୍ନ ସାହି ଓ ବସ୍ତି ପରିକ୍ରମା କରିବ। ଏଥିସହ ଯାତ୍ରାପୀଠରେ ପ୍ରତିଦିନ ବିଭିନ୍ନ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ। ଯାତ୍ରାକୁ ଅଧିକ ଆକର୍ଷଣୀୟ କରିବା ପାଇଁ ରାମଦୋଳି ଓ ମୀନାବଜାର ଆୟୋଜନ କରାଯିବା ନେଇ ମଧ୍ୟ ଆଲୋଚନା ହୋଇଛି।
ସଭାରେ ମନ୍ଦିରର ମୁଖ୍ୟ ସେବାୟତ ଆଦିତ୍ୟ ପାତ୍ର, ଯାତ୍ରା ପରିଚାଳନା କମିଟି ସଦସ୍ୟ ପ୍ରଶାନ୍ତ ପୂଜାରୀ, ତାରିଣୀ ପାତ୍ର, ବୈକୁଣ୍ଠ ସୱାଇଁ, ଏମ. ବୀର, ଦିବାକର ପ୍ରଧାନ, ଏ. ବନମାଳୀଙ୍କ ସମେତ ସହରର ବହୁ ଗଣ୍ୟମାନ୍ୟ ବ୍ୟକ୍ତି ଉପସ୍ଥିତ ରହି ବିଭିନ୍ନ ଆଲୋଚନାରେ ଅଂଶଗ୍ରହଣ କରିଥିଲେ।