ଆଠମଲ୍ଲିକ, ୩।୧୧ (ଉଦୀପ୍ତ ପୁରୋହିତ): ଅନୁଗୋଳ ଜିଲା ଆଠମଲ୍ଲିକ ଉପଖଣ୍ଡରେ ଥିବା ବିଭିନ୍ନ ବିଭାଗରୁ ଅଧିକାରୀଙ୍କ ବଦଳି ହେଉଛି। କେତେଜଣଙ୍କୁ ପଦୋନ୍ନତି ଦିଆଯାଇ ଅନ୍ୟତ୍ର ନିଆଯାଉଛି। ହେଲେ ସେମାନଙ୍କ ସ୍ଥାନରେ ନୂଆ ନିଯୁକ୍ତି ଦିଆଯାଉ ନାହିଁ। ଫଳରେ ବହୁ ବିଭାଗରେ ଅଧିକାରୀଙ୍କ ପଦବୀ ଖାଲି ପଡ଼ିଥିବାବେଳେ ଅନ୍ୟ ଅଧିକାରୀମାନଙ୍କୁ ଭାରପ୍ରାପ୍ତ ଦାୟିତ୍ୱ ଦିଆଯାଇ କାମ ଚଳାଇ ନିଆଯାଉଛି। କିଛି ମାସ ହେଲା ସରକାରୀ ସ୍ତରରେ କରାଯାଉଥିବା ଏପରି କାର୍ଯ୍ୟ ପାଇଁ ଉପଖଣ୍ଡର ବିକାଶ ବାଧାପ୍ରାପ୍ତ ହେଉଥିବା ସାଧାରଣରେ ଅଭିଯୋଗ ହେଉଛି।
ସୂଚନା ଅନୁଯାୟୀ, ୩ ମାସ ତଳୁ ଆଠମଲ୍ଲିକ ଉପଜିଲାପାଳ ଡ. ଜିତେନ୍ଦ୍ର କୁମାର ପାତ୍ରଙ୍କ ଭୁବନେଶ୍ୱରକୁ ବଦଳି ହୋଇଯାଇଛି। ତାଙ୍କ ଦାୟିତ୍ୱ ସହକାରୀ ଜିଲାପାଳ ଡ. ପ୍ରଭୁ ପୀୟୂଷ ମହାପାତ୍ର ତୁଲାଉଛନ୍ତି। ଫଳରେ ୩ ମାସ ହେଲା ସ୍ଥାୟୀ ଉପଜିଲାପାଳ ନାହାନ୍ତି। ସେହିପରି ଗୋଷ୍ଠୀ ଉନ୍ନୟନ ଅଧିକାରୀ ସୌଭାଗ୍ୟ ବେହେରାଙ୍କ ଅନ୍ୟତ୍ର ବଦଳି ହୋଇଥିବା ନେଇ ଖବର ପ୍ରକାଶ ପାଇଥିବା ବେଳେ ସେ ପୂର୍ବରୁ ଖାଲିଥିବା ତହସିଲଦାର ଦାୟିତ୍ୱ ମଧ୍ୟ ସମ୍ଭାଳୁଛନ୍ତି। କୃଷି ପ୍ରଧାନ ଅଞ୍ଚଳ ଆଠମଲ୍ଲିକରେ ଗୁରୁତ୍ୱ ବହନ କରୁଥିବା କୃଷି ବିଭାଗରେ ମଧ୍ୟ କୃଷି ଅଧିକାରୀ ନ ଥିବା ବେଳେ ବ୍ଲକ କୃଷି ଅଧିକାରୀ ସେହି ଦାୟିତ୍ୱ ସମ୍ଭାଳୁଛନ୍ତି। ୧୦ ବର୍ଷରୁ ଅଧିକ ହେବ ଉପଖଣ୍ଡ ସୂଚନା ଓ ଲୋକ ସମ୍ପର୍କ ଅଧିକାରୀ ପଦବୀ ଖାଲି ପଡ଼ିଥିବା ବେଳେ ଦୀର୍ଘଦିନ ହେବ ଭାରପ୍ରାପ୍ତ ଅଧିକାରୀଙ୍କୁ ନେଇ ବିଭାଗ ଚାଲିଛି। ଏବେ ସହକାରୀ ଜିଲାପାଳ ତନ୍ମୟ ରଞ୍ଜନ ପାତ୍ର ଭାରପ୍ରାପ୍ତ ସୂଚନା ଓ ଲୋକ ସମ୍ପର୍କ ଅଧିକାରୀ ଭାବରେ ଦାୟିତ୍ୱ ତୁଲାଉଛନ୍ତି। ଜନସ୍ବାସ୍ଥ୍ୟ ବିଭାଗ କନିଷ୍ଠ ଯନ୍ତ୍ରୀ ଦେବୀ ପ୍ରସାଦ ମିଶ୍ର ଦୀର୍ଘଦିନ ହେଲା ଅନୁଗୋଳ ଜନସ୍ବାସ୍ଥ୍ୟ ବିଭାଗକୁ ଡେପୁଟେଶନରେ ଯାଇ ଅନୁଗୋଳରେ କାର୍ଯ୍ୟରତ ଥିବାବେଳେ ଆଠମଲ୍ଲିକ ଜନସ୍ବାସ୍ଥ୍ୟ ବିଭାଗରେ ସହକାରୀ ଯନ୍ତ୍ରୀ ପଦବୀ ଖାଲି ପଡ଼ିଛି। ଆଠମଲ୍ଲିକ କଲେଜ ଅଧ୍ୟକ୍ଷ ପଦବୀ ଦୀର୍ଘ ବର୍ଷ ହେଲା ଖାଲି ପଡ଼ିଥିବା ବେଳେ ବରିଷ୍ଠ ଅଧ୍ୟାପକମାନେ ଏହି ଦାୟିତ୍ୱ ସମ୍ଭାଳୁଛନ୍ତି। ଆଠମଲ୍ଲିକ ଉପଖଣ୍ଡ ମୁଖ୍ୟ ଚିକିତ୍ସାଳୟରେ ମାତ୍ର ୩ ଜଣ ବିଶେଷଜ୍ଞ ଡାକ୍ତର ଥିବାବେଳେ ବହୁ ବିଶେଷଜ୍ଞ ଓ ଡାକ୍ତର ପଦବୀ ମଧ୍ୟ ଖାଲି ପଡ଼ିଥିବାରୁ ସ୍ବାସ୍ଥ୍ୟସେବା ବାଧାପ୍ରାପ୍ତ ହେଉଥିବା ଅଭିଯୋଗ ହେଉଛି। ରାଜ୍ୟରେ ଗଠନ ହୋଇଥିବା ନୂତନ ସରକାର ଗୁରୁତ୍ୱ କୁ ଉପଲବଧି କରି ଲୋକଙ୍କ ସୁବିଧା ଦୃଷ୍ଟି ରୁ ଅତି ଶୀଘ୍ର ସମସ୍ତ ବିଭାଗ ର ଅଧିକାରୀ ପଦବୀ ପୂରଣ କରିବାକୁ ସାଧାରଣରେ ଦାବି ହେଉଛି l
