ବେଲପଡ଼ା,୨୫ା୩(ଡି.ଏନ୍.ଏ.): ବିଦ୍ୟାଳୟକୁ ଦଣ୍ଡମୁକ୍ତ ଅଞ୍ଚଳ ଘୋଷଣା କରାଯାଇଥିବା ସତ୍ତ୍ୱେ ଜଣେ ୪ର୍ଥ ଶ୍ରେଣୀ ଛାତ୍ରୀଙ୍କୁ ମାଡ଼ ମରାଯିବା ଭଳି ଅଭାବନୀୟ ଘଟଣା ଘଟିଛି ବଲାଙ୍ଗୀର ଜିଲା ବେଲପଡ଼ା ଥାନା ଅନ୍ତର୍ଗତ କଦଳୀ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ। ଏହି ବିଦ୍ୟାଳୟର ପ୍ରଧାନ ଶିକ୍ଷକଙ୍କ ମାଡ଼ରେ ସମ୍ପୃକ୍ତ ଛାତ୍ରୀଙ୍କ ବାମହାତ ଭାଙ୍ଗିଯାଇଥିବା ଅଭିଯୋଗ ହୋଇଛି।
ପ୍ରକାଶ ଯେ, ୨୩ ତାରିଖ ଗୁରୁବାର ସକାଳ ପ୍ରାୟ ୯ଟାରେ ସେହି ସ୍କୁଲର ଚତୁର୍ଥ ଶ୍ରେଣୀ ଛାତ୍ରୀ ଅନୁ ନାଗ (୯)ଙ୍କୁ ଉକ୍ତ ସ୍କୁଲର ପ୍ରଧାନ ଶିକ୍ଷକ ବାଳକୃଷ୍ଣ ଶବର କୌଣସି କାରଣରୁ ଏକ ବାଡ଼ିରେ ମାଡ଼ ମାରିଥିଲେ। ପରେ ଛାତ୍ରୀ ଜଣକ କାନ୍ଦି କାନ୍ଦି ଘରକୁ ଯାଇ ପରିବାରବର୍ଗଙ୍କୁ ଏକଥା କହିଥିଲେ। ଏହାପରେ ପରିବାର ଲୋକେ ଓ ଗ୍ରାମବାସୀ ସ୍କୁଲକୁ ଆପତ୍ତି କରିବା ପାଇଁ ଆସିଥିଲେ। ସେତେବେଳକୁ ସ୍କୁଲ ଛୁଟି ହୋଇ ନ ଥିବା ବେଳେ ପ୍ରଧାନ ଶିକ୍ଷକ ଶବର କେଉଁଆଡ଼େ ପଳାଇଯାଇଥିଲେ। ଏହାକୁ ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା। ଅନ୍ୟପକ୍ଷରେ ପରିବାର ଲୋକେ ଛାତ୍ରୀଙ୍କୁ ବେଲପଡ଼ାର ଏକ ଘରୋଇ କ୍ଳିନିକ୍କୁ ନେଇ ଏକ୍ସ-ରେ କରାଇଥିଲେ। ରିପୋର୍ଟ ଆସିବା ପରେ ଛାତ୍ରୀଙ୍କ ବାମ ହାତ ଭାଙ୍ଗିଯାଇଥିବା ଜଣାପଡ଼ିଥିଲା। ଉଚ୍ଚତର ଚିକିତ୍ସା ପାଇଁ ତାଙ୍କୁ ବଲାଙ୍ଗୀର ନେବାକୁ ଡାକ୍ତର କହିଥିବା ଜଣାଯାଇଛି। ଆର୍ଥିକ ପରିସ୍ଥିତି ସ୍ବଚ୍ଛଳ ନ ଥିବାରୁ ଛାତ୍ରୀଙ୍କ ବାପା ଗୋପାଳ ନାଗ ସାହାଯ୍ୟ ଲୋଡିଛନ୍ତି। ଏନେଇ ଛାତ୍ରୀ ଅନୁଙ୍କୁ ପଚାରିବାରୁ କ୍ଲାସ୍ରୁମ୍ରେ ଆମେ ଥିଲୁ। ଏହି ସମୟରେ ହଠାତ୍ ପ୍ରଧାନ ଶିକ୍ଷକ ପାଖକୁ ଆସି ଏକ ବାଉଁଶ ବାଡିରେ ବାମହାତକୁ ଜୋରରେ ପିଟିଥିଲେ ବୋଲି ସେ କହିଥିଲେ। ଏ ସଂକ୍ରାନ୍ତରେ ସିଆର୍ସିସି ପ୍ରଦୀପ ସିଂ ବାବୁଙ୍କୁ ପଚାରିବାରେ ପ୍ରଧାନ ଶିକ୍ଷକ ଶବର ଛାତ୍ରୀଙ୍କୁ ମାଡ ମାରିବା ଘଟଣା ସତ। କିନ୍ତୁ କେଉଁ କାରଣରୁ ମାଡ ମାରିଲେ ତାହା ଜାଣିନାହିଁ ଓ ତଦନ୍ତ ପରେ ଜଣାପଡିବ ବୋଲି ପ୍ରକାଶ କରିଥିଲେ। ଶୁକ୍ରବାର ପ୍ରଧାନ ଶିକ୍ଷକ କୌଣସି କାରଣବଶତଃ ସ୍କୁଲରେ ଅନୁପସ୍ଥିତ ରହିଥିବା ଦେଖିବାକୁ ମିଳିଥିଲା। ଫୋନରେ ଯୋଗାଯୋଗ ପାଇଁ ଉଦ୍ୟମ କରାଯାଇଥିଲେ ହେଁ ଫୋନ ସୁଇଚ ଅଫ୍ ଥିବାରୁ ତାଙ୍କ ମତାମତ ମିଳିପାରିନାହିଁ। ପ୍ରକାଶ ଥାଉକି ପ୍ରଧାନ ଶିକ୍ଷକ ଏହାପୂର୍ବରୁ ଅନ୍ୟ ଛାତ୍ରୀଛାତ୍ରଙ୍କୁ ମାଡ଼ ମାରିବା ଘଟଣା ନେଇ ସ୍କୁଲ ପରିଚାଳନା କମିଟି ପକ୍ଷରୁ ବୈଠକ କରାଯାଇଛି। ଏଥିପ୍ରତି ବଲାଙ୍ଗୀର ଜିଲାପାଳ ଓ ଜିଲା ଶିକ୍ଷାଧିକାରୀ ଦୃଷ୍ଟିଦେଇ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି ହେଉଛି।
